།ལོ་གྲངས་བཞི་ཁྲི་དྲུག་སྟོང་བར་དུ་གནས། །སྐུ་གདུང་བཅས་པའི་མཆོད་རྟེན་བཟང་པོ་དག །འཇིག་རྟེན་དག་ཏུ་ཐེར་འབུམ་ཕྲག་གཉིས་འབྱུང་། །དེ་བཞིན་གཤེགས་པ་གོ་ཆ་བགོས་པ་ཡི། །སྐྱེ་བའི་ཡུལ་ནི་བལྟ་ན་མཛེས་ཞེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །ཉི་ཤུ་རྩ་བཞི་ཡབ་ནི་ལེགས་སྣང་ཡིན། །ངེས་བྱམས་མ་ཞེས་བྱ་བ་རྒྱལ་བའི་ཡུམ། །སྲས་པོ་གསེར་ཡིན་རྣམ་དག་རིམ་གྲོ་པ། །མེ་ཏོག་དགའ་ཞེས་བྱ་བ་བློ་ལྡན་ཏེ། །གཟུགས་བརྩེགས་པ་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་བྱེ་བ་ཕྲག་བཞི་དང་། །གཞན་ཡང་དྲུག་ཅུ་རྩ་དྲུག་ཀུན་ལ་ཡང་། །བརྒྱད་ཁྲི་བརྒྱད་ཁྲི་དག་ནི་ཚོགས་པར་འགྱུར། །མི་ཚེ་ལོ་གྲངས་བདུན་ཁྲི་ལྔ་སྟོང་ཡིན། །མགོན་པོ་མཆོག་མའི་དམ་པའི་ཆོས་དག་ཀྱང་། །ལོ་གྲངས་བདུན་ཁྲི་ལྔ་སྟོང་བར་དུ་གནས། །རྒྱལ་བའི་མཆོད་རྟེན་དཔག་ཚད་བཞི་པ་ཀུན། །གསེར་གྱི་འོད་ཀྱིས་རྣམ་པར་མཛེས་པར་བྱས། །དེ་བཞིན་གཤེགས་པ་སེང་གེའི་ཕྱག་དག་གི། །སྐྱེ་བའི་ཡུལ་ནི་ངེས་པའི་དོན་ཞེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །བདུན་ཅུ་རྩ་དྲུག་ཡབ་ནི་མི་དམན་པ། །བདུད་རྩི་དགའ་ཞེས་བྱ་བ་རྒྱལ་བའི་ཡུམ། །སྲས་པོ་ཆོས་བཟངས་ཕན་འདོད་རིམ་གྲོ་པ། །ཡེ་ཤེས་མཆོག་ཅེས་བྱ་བ་མཁས་པ་སྟེ། །ངེས་པར་ཐོབ་ཅེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་བརྒྱད་དེ་ཀུན་ལ་ཡང་། །ཐེག་པ་མཆོག་གིས་རྣམ་ཐར་ཐོབ་པ་པོ། །བྱེ་བ་ཕྲག་ནི་བཅུ་བཅུ་ཚོགས་པར་འགྱུར། །མི་ཚེ་ལོ་གྲངས་དྲུག་ཁྲི་ཉིས་སྟོང་ཡིན། །འཇིག་རྟེན་མཁྱེན་པ་མྱ་ངན་འདས་ནས་ཀྱང་། །དམ་ཆོས་ལོ་གྲངས་དགུ་བཅུ་རྩ་དགུར་གནས། །དཔག་ཚད་ལྔ་པའི་མཆོད་རྟེན་སྐུ་གདུང་བཅས། །གཅིག་སྟེ་རིན་ཆེན་བརྒྱ་སྙེད་དྲ་བས་སྤྲས། །མི་ཡི་འདྲེན་པ་མེ་ཏོག་བཟང་པོ་ཡི། །སྐྱེ་བའི་ཡུལ་ནི་མེ་ཏོག་བརྒྱན་ཞེས་བྱ། །རིགས་ནི་བྲམ་ཟེ་ཡིན་ཏེ་འོད་ཀྱི་ཚད། །དཔག་ཚད་ལྔ་ཡོད་ཡབ་ནི་མཆོད་ལེགས་ཡིན། །མེ་ཏོག་མཆོག་མ་རྒྱལ་ཡུམ་སྲས་པོ་ནི། །མེ་ཏོག་བཟང་པོ་མེ་ཏོག་རིམ་གྲོ་པ། །འགྲོས་མཛེས་པ་ཞེས་བྱ་བ་མཁས་པ་སྟེ། །གཟི་བརྗིད་མངོན་འཕགས་པ་ནི་རྫུ་འཕྲུལ་ཅན།