།རིགས་ནི་རྒྱལ་རིགས་འོད་ཚད་ཞིང་གི་གྲངས། །སྟོང་སྙེད་ཁྱབ་པ་ཡབ་ནི་རིན་ཆེན་བཟངས། །རིན་ཆེན་མཆོག་མ་ཞེས་བྱ་རྒྱལ་བའི་ཡུམ། །སྲས་པོ་དགའ་བྱིན་ཁྱད་འཕགས་རིམ་གྲོ་པ། །ཡོན་ཏན་ཚོགས་ཞེས་བྱ་བ་མཁས་པ་སྟེ། །རྣམ་གྲངས་སེམས་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་བརྒྱད་དེ་ཀུན་ལ་ཡང་། །སྲིད་པར་འཆིང་བ་གཅོད་པར་བྱེད་པ་པོ། །བྱེ་བ་ཕྲག་ནི་ཉི་ཤུ་དྲུག་དྲུག་འདུས། །མི་ཚེ་ལོ་གྲངས་དྲུག་ཁྲི་བཞི་སྟོང་ཡིན། །དམ་པའི་ཆོས་དག་ལོ་གྲངས་སྟོང་ཕྲག་ནི། །བརྒྱད་ཅུ་རྩ་ལྔའི་བར་དུ་གནས་པར་འགྱུར། །རྒྱལ་བའི་མཆོད་རྟེན་དཔག་ཚད་གསུམ་པ་དག །རིན་ཆེན་གཙུག་ཕུད་བྱེ་བ་དག་གིས་སྤྲས། །འགྲོ་བ་དག་གིས་མཆོད་པ་དཔལ་འོད་ཀྱི། །སྐྱེ་བའི་ཡུལ་ནི་པད་མ་ཅན་ཞེས་བྱ། །རིགས་ནི་བྲམ་ཟེ་ཡིན་ཏེ་འོད་ཀྱི་ཚད། །དཔག་ཚད་གཅིག་ཡོད་ཡབ་ནི་བཀྲ་ཤིས་ཡིན། །ལེགས་མཆོད་མ་ཞེས་བྱ་བ་རྒྱལ་བའི་ཡུམ། །སྲས་པོ་མགོན་བྱིན་མགོན་བཟངས་རིམ་གྲོ་པ། །སྡུག་དགའ་ཞེས་ནི་བྱ་བ་མཁས་པ་སྟེ། །ཐར་པ་རྣམ་པར་སྒྲོགས་པ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །ཟླ་བ་ཉ་འདྲ་དྲི་མ་མེད་པ་པོ། །བྱེ་བ་ཕྲག་ནི་ཉི་ཤུ་གསུམ་གསུམ་ཡོད། །མི་ཚེ་ལོ་གྲངས་ཉི་ཁྲི་ཆིག་སྟོང་ཡིན། །མི་ཡི་རབ་མཆོག་དག་གི་དམ་ཆོས་རྣམས། །ལོ་གྲངས་ཉི་ཁྲི་ཆིག་སྟོང་བར་དུ་གནས། །སྐུ་གདུང་རྒྱས་འགྱུར་མཆོད་རྟེན་བཟང་པོའི་གྲངས། །བྱེ་བ་ཕྲག་ནི་སུམ་ཅུ་རྩ་གསུམ་འབྱུང་། །རྒྱལ་བ་བདུད་དག་འདུལ་བར་མཛད་པ་པོའི། །སྐྱེ་བའི་ཡུལ་ནི་བསོད་ནམས་ལྡན་ཞེས་བྱ། །རིགས་ནི་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་ལྔ་བརྒྱ་ཁྱབ་གྱུར་ཕལ་ཆེན་ཡབ། །འོད་ཀྱི་ཚོགས་ཞེས་བྱ་བ་རྒྱལ་བའི་ཡུམ། །སྲས་པོ་དེས་ལྡན་ཆུ་ལྷ་རིམ་གྲོ་པ། །ཡེ་ཤེས་འོད་མཆོག་ཅེས་བྱ་མཁས་པ་སྟེ། །དོན་ལ་རྣམ་པར་ངེས་པ་རྫུ་འཕྲུལ་ཅན། །འདུས་པ་དག་ནི་ལན་གྲངས་བརྒྱད་ཅུ་སྟེ། །ཆགས་མེད་ཡིད་ལྡན་དེ་དག་ཐམས་ཅད་གྲངས། །ཐེར་འབུམ་ཕྲག་གཉིས་སྙེད་ནི་འདུས་པར་འགྱུར། །མི་ཚེ་ལོ་གྲངས་ཉི་ཁྲི་ཉིས་སྟོང་ཡིན། །གྲགས་པ་མཐའ་ཡས་དག་གི་དམ་ཆོས་རྣམས། །ལོ་གྲངས་བཞི་ཁྲི་དྲུག་སྟོང་བར་དུ་གནས།