།སྨྲ་བའི་ཆུ་མཆོག་ཅེས་བྱ་རྫུ་འཕྲུལ་ཅན། །འདུས་པ་ལན་གྲངས་དགུ་སྟེ་ཀུན་ལ་ཡང་། །སྲིད་པའི་རྒྱ་མཚོ་སྐེམས་པའི་ཡིད་ལྡན་པ། །བྱེ་བ་ཕྲག་ནི་སུམ་ཅུ་དགུ་དགུ་ཡོད། །མི་ཚེ་ལོ་གྲངས་ཉི་ཁྲི་ཉིས་སྟོང་ཡིན། །ཞི་བར་ཕྱིན་པའི་དམ་པའི་ཆོས་དག་ཀྱང་། །ལོ་གྲངས་བདུན་ཁྲི་ཆིག་སྟོང་བར་དུ་གནས། །སྐུ་གདུང་རྒྱས་འགྱུར་ས་གཞི་ཐམས་ཅད་དུ། །མཆོད་རྟེན་གྲངས་ནི་དགུ་ཁྲི་འབྱུང་བར་འགྱུར། །ཡོན་ཏན་མངའ་བ་གློག་གི་འོད་སྐྱེ་བའི། །ཡུལ་ནི་གཟི་བྱིན་ཤིན་ཏུ་བརྒྱན་ཅེས་བྱ། །རིགས་ནི་བྲམ་ཟེ་ཡིན་ཏེ་འོད་ཀྱི་ཚད། །དཔག་ཚད་ལྔ་བརྒྱ་ཡབ་ནི་ལག་བཟངས་ཡིན། །ལྷས་བསམས་མ་ཞེས་བྱ་བ་རྒྱལ་བའི་ཡུམ། །སྲས་པོ་སྒོམ་བྱེད་ངོས་བཟངས་རིམ་གྲོ་པ། །གྲགས་མཆོག་ཅེས་ནི་བྱ་བ་མཁས་པ་སྟེ། །ཁ་ལོ་སྒྱུར་བའི་རྒྱལ་པོ་རྫུ་འཕྲུལ་ཅན། །འདུས་པ་ལན་གྲངས་བཅུ་གཅིག་ཀུན་ལ་ཡང་། །ཚུལ་བཞིན་ཆོས་ལ་འཇིགས་མེད་ཐོབ་གྱུར་པ། །བྱེ་བ་ཕྲག་ནི་ཉི་ཤུ་རེ་རེ་ཡོད། །མི་ཚེ་ལོ་གྲངས་ཉི་ཁྲི་སུམ་སྟོང་ཡིན། །འགྲོ་ལ་ཕན་ཕྱིར་དམ་པའི་ཆོས་དག་ཀྱང་། །ལོ་གྲངས་དགུ་འབུམ་བར་དུ་གནས་པར་འགྱུར། །རྒྱལ་བའི་མཆོད་རྟེན་དཔག་ཚད་བཞི་པ་དག །གསེར་གྱི་མཆོད་རྟེན་རྒྱལ་མཚན་དག་གིས་བསྐོར། །བདེ་གཤེགས་མགོན་པོ་ཡོན་ཏན་རྒྱ་ཆེན་གྱི། །སྐྱེ་བའི་ཡུལ་ནི་མཚན་མོ་རྒྱས་ཞེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་དྲུག་ཡོད་ཡབ་ནི་བློ་བཟང་ཡིན། །བློ་ལྡན་མ་ཞེས་བྱ་བ་རྒྱལ་བའི་ཡུམ། །སྲས་པོ་རྟོགས་བྱེད་བློ་ལྡན་རིམ་གྲོ་པ། །བློས་འགྲོ་བ་ཞེས་བྱ་བ་མཁས་པ་སྟེ། །རྣམ་པར་འཕྲུལ་པའི་བློ་ནི་རྫུ་འཕྲུལ་ཅན། །འདུས་པ་ལན་གྲངས་བདུན་ཏེ་ཀུན་ལ་ཡང་། །ལྷུན་པོའི་རྩེ་ལྟར་གཡོ་བ་མེད་པ་པོ། །བྱེ་བ་ཕྲག་ནི་དགུ་བཅུ་དགུ་དགུ་ཡོད། །མི་ཚེ་ལོ་གྲངས་དག་ནི་དགུ་ཁྲི་ཡིན། །རྒྱལ་བ་ཐུབ་པ་ཞི་བར་ཕྱིན་པ་ཡི། །དམ་པའི་ཆོས་དག་ལོ་གྲངས་སྟོང་དུ་གནས། །མཆོད་རྟེན་ཐེར་འབུམ་ཕྲག་ནི་གཉིས་ཡོད་དེ། །རིན་ཆེན་ཆུན་ཕྲེང་སྟོང་སྙེད་དག་གིས་སྤྲས། །མི་ཡི་འདྲེན་པ་རིན་པོ་ཆེ་དག་གི། །སྐྱེ་བའི་ཡུལ་ནི་རིན་ཆེན་མང་ཞེས་བྱ། །རིགས་ནི་རྒྱལ་རིགས་འོད་ཚད་ཞིང་གི་གྲངས།