།ཞི་བར་ཕྱིན་པའི་དམ་པའི་ཆོས་དག་ཀྱང་། །ལོ་གྲངས་དགུ་ཁྲི་དགུ་སྟོང་བར་དུ་གནས། །རྒྱལ་བའི་མཆོད་རྟེན་དགུ་བཅུ་རྩ་བཞི་སྟེ། །རིན་ཆེན་རྟ་བབས་གསེར་གྱིས་རྣམ་པར་སྤྲས། །དེ་བཞིན་གཤེགས་པ་དགེ་མཆོག་རྒྱལ་པོ་ཡི། །སྐྱེ་བའི་ཡུལ་ནི་མི་འཇིགས་བརྫི་བ་མེད། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་བརྒྱ་ཡོད་གླང་པོའི་དབང་པོ་ཡབ། །སེམས་མཚུངས་མ་ཞེས་བྱ་བ་རྒྱལ་བའི་ཡུམ། །སྲས་པོ་སྲིད་དགའ་མཆོད་པ་རིམ་གྲོ་པ། །སྤོབས་པའི་ང་རོ་ཞེས་བྱ་བློ་ལྡན་ཏེ། །གྲགས་པ་ཀུན་འཕགས་པ་ནི་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་རྩ་དྲུག་སྟེ། །ཀུན་ལའང་དྲང་སྲོང་བདུད་ཡུལ་བྲལ་བ་པོ། །བྱེ་བ་ཕྲག་ནི་ཉི་ཤུ་གཉིས་གཉིས་ཡོད། །མི་ཚེ་ལོ་གྲངས་ཉི་ཁྲི་ཉིས་སྟོང་ཡིན། །ཞི་བར་ཕྱིན་པའི་དམ་པའི་ཆོས་དག་ཀྱང་། །ལོ་གྲངས་སུམ་སྟོང་ཚང་བར་གནས་པར་འགྱུར། །དཔག་ཚད་གཉིས་པའི་སྐུ་གདུང་མཆོད་རྟེན་གཅིག ། གསེར་གྱི་རྒྱལ་མཚན་གདུགས་ཀྱིས་རྣམ་པར་སྤྲས། །བདེ་གཤེགས་ཡོན་ཏན་རྒྱ་མཚོ་སྐར་རྒྱལ་གྱི། །སྐྱེ་བའི་ཡུལ་ནི་མཚན་གྱིས་སྤྲས་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་དགུ་ཡོད་ཡབ་ནི་བློ་ལྡན་ཡིན། །ཡིད་དགའ་མ་ཞེས་བྱ་བ་རྒྱལ་བའི་ཡུམ། །སྲས་པོ་ཁྲོས་ཅན་རྡུལ་བྲལ་རིམ་གྲོ་པ། །ཡིད་གཉིས་སྤོང་ཞེས་བྱ་བ་མཁས་པ་སྟེ། །ཐེ་ཚོམ་འཇོམས་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་རྩ་གཉིས་ཏེ། །ཀུན་ལའང་དངོས་པོ་བསལ་བར་གྱུར་པ་པོ། །འཆིང་བ་བཅད་པ་ཐེར་འབུམ་ཐེར་འབུམ་ཡོད། །མི་ཚེ་ལོ་གྲངས་སུམ་ཁྲི་ཉིས་སྟོང་ཡིན། །དམ་པའི་ཆོས་དག་ལོ་གྲངས་སྟོང་ཕྲག་ནི། །སུམ་ཅུ་རྩ་གཉིས་བར་དུ་གནས་པར་འགྱུར། །མཆོད་རྟེན་གྲངས་ནི་དགུ་ཁྲི་དགུ་སྟོང་སྟེ། །ལྷ་ཡི་གཞལ་མེད་ཁང་ལྟར་ཤིན་ཏུ་སྤྲས། །དེ་བཞིན་གཤེགས་པ་འོད་ཟེར་ཆེན་པོ་ཡི། །སྐྱེ་བའི་ཡུལ་ནི་བསོད་ནམས་སྣང་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བཅུ་ཡོད་ཡབ་ནི་ཏོག་བཟངས་ཡིན། །ཏོག་གི་བློ་གྲོས་མ་ནི་རྒྱལ་བའི་ཡུམ། །སྲས་པོ་ལྷས་བྱིན་བླ་མ་རིམ་གྲོ་པ། །སྲིད་པའི་རྒྱ་མཚོ་འཁྲུགས་བྱེད་མཁས་པ་སྟེ། །སྨྲ་བའི་ཆུ་མཆོག་ཅེས་བྱ་རྫུ་འཕྲུལ་ཅན།