།སྐྱེ་བའི་ཡུལ་ནི་པད་མ་དཀར་ཞེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །ཉི་ཤུ་གཉིས་ཡོད་ཡབ་ནི་ལེགས་དགའ་ཡིན། །དགའ་མཆོག་མ་ཞེས་བྱ་བ་རྒྱལ་བའི་ཡུམ། །སྲས་པོ་ཤེས་དགའ་ཚངས་བཟངས་རིམ་གྲོ་པ། །མཉམ་པར་སེམས་ཞེས་བྱ་བ་མཁས་པ་སྟེ། །འཇིག་རྟེན་འོད་བྱེད་པ་ནི་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་རྩ་དྲུག་སྟེ། །ཀུན་ལའང་གཏི་མུག་མ་རིག་མུན་བཅོམ་པ། །འགོག་པ་ཐོབ་པ་བརྒྱད་ཅུ་བརྒྱད་ཅུ་ཡོད། །མི་ཚེ་ལོ་གྲངས་དག་ནི་སུམ་སྟོང་ཡིན། །མཚུངས་པ་མེད་པ་མྱ་ངན་འདས་ནས་ཀྱང་། །དམ་ཆོས་ལོ་གྲངས་སྟོང་གི་བར་དུ་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་བཟང་པོ་སྟོང་ཕྲག་སུམ་ཅུ་དྲུག །འཇིག་རྟེན་མགོན་པོ་བཟང་པོ་བྱིན་པ་ཡི། །སྐྱེ་བའི་ཡུལ་ནི་པད་མའི་ཏོག་ཅེས་བྱ། །རིགས་ནི་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་བཅུ་གཉིས་ཡབ་ནི་ཕུང་པོ་བཟང་། །ཉི་མའི་རྒྱུད་ཅེས་བྱ་བ་ཡུམ་ཡིན་ནོ། །སྲས་པོ་ཚངས་དགའ་གྲུབ་པ་རིམ་གྲོ་པ། །ལྷ་ཡིས་མཆོད་ཅེས་བྱ་བ་མཁས་པ་སྟེ། །གསལ་བ་གཏི་མུག་མེད་པ་རྫུ་འཕྲུལ་ཅན། །འདུས་པ་དག་ནི་ལན་གྲངས་སུམ་ཅུ་སྟེ། །འདུས་པ་ཀུན་ལའང་རྒྱལ་སྲས་ཐམས་ཅད་དག །བྱེ་བ་ཕྲག་ནི་བདུན་ཅུ་གསུམ་གསུམ་ཡོད། །སྐུ་ཚེ་ལོ་གྲངས་འབུམ་དུ་ཚང་བར་འགྱུར། །མཚུངས་པ་མེད་པ་མྱ་ངན་འདས་ནས་ཀྱང་། །དམ་ཆོས་ལོ་གྲངས་བདུན་ཅུའི་བར་དུ་གནས། །བདེ་བར་གཤེགས་པ་མྱ་ངན་འདས་ནས་ཀྱང་། །སྐུ་གདུང་རྒྱས་འགྱུར་མཆོད་རྟེན་བཞི་ཞིག་འབྱུང་། །མི་ཡི་འདྲེན་པ་བདེ་གཤེགས་ཟླ་བ་ཡི། །སྐྱེ་བའི་ཡུལ་ནི་གཟི་བརྗིད་སྤྲུལ་ཅེས་བྱ། །རྒྱལ་བ་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་བརྒྱད་ཡོད་ཡབ་ནི་ཏོག་བཟངས་ཡིན། །བཟང་ལྡན་མ་ནི་རྒྱལ་ཡུམ་སྲས་པོ་ནི། །རྩི་སྨན་ཡན་ལག་མཉམ་པ་རིམ་གྲོ་པ། །ཡོན་ཏན་ཚོགས་ཞེས་བྱ་བ་མཁས་པ་སྟེ། །མངོན་པར་འཕགས་པའི་ལྷ་ནི་རྫུ་འཕྲུལ་ཅན། །དྲང་སྲོང་ཆེན་པོའི་སྲས་པོ་ཆགས་མེད་པ། །སེམས་ཞི་རི་དང་མཚུངས་པ་ཐམས་ཅད་དག །འདུས་པ་ལན་གྲངས་དྲུག་ཅུ་རྩ་དྲུག་འདུས།