།འདུས་པ་ལན་གྲངས་དྲུག་ཅུ་རྩ་དྲུག་འདུས། །མི་ཚེ་ལོ་གྲངས་ཉི་ཤུ་རྩ་ཡང་གཉིས། །གྲགས་པ་མཐའ་ཡས་དེ་ཡི་དམ་ཆོས་དག །ལོ་གྲངས་སུམ་བརྒྱ་ཚང་བའི་བར་དུ་གནས། །རྒྱལ་བའི་མཆོད་རྟེན་བཟང་པོ་གཅིག་ཡིན་ཏེ། །དཔག་ཚད་བརྒྱད་པ་ཀུན་ཏུ་མཛེས་པ་ཡིན། །བདེ་བར་གཤེགས་པ་ཚངས་པའི་དབྱངས་དག་གི། །སྐྱེ་བའི་ཡུལ་ནི་དགའ་བའི་དབྱངས་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་དགུ་ཡོད་ཡབ་ནི་ན་ཚོད་བཟང་། །ལྷ་དགའ་ཞེས་ནི་བྱ་བ་ཡུམ་ཡིན་ནོ། །སྲས་པོ་དགའ་བོ་དུལ་བ་རིམ་གྲོ་པ། །ཡོན་ཏན་རྒྱ་མཚོ་ཞེས་བྱ་མཁས་པ་སྟེ། །ཡེ་ཤེས་རྣམ་པར་འཕྲུལ་པ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །ཐ་བ་མེད་ཅིང་ཞི་དུལ་དགའ་བ་པོ། །བསམ་གཏན་པ་ནི་བྱེ་བ་བྱེ་བ་ཡོད། །མི་ཚེ་ལོ་གྲངས་སྟོང་ཕྲག་བཅུ་དྲུག་ཡིན། །དམ་ཆོས་ལོ་གྲངས་དག་ནི་བརྒྱད་ཁྲིར་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་གྲངས་ནི་བརྒྱད་ཁྲི་ཚང་བ་སྟེ། །རིན་ཆེན་རྒྱལ་མཚན་དྲ་བ་དག་གིས་གཡོགས། །དེ་བཞིན་གཤེགས་པ་སེང་གེའི་ཟླ་བ་ཡི། །སྐྱེ་བའི་ཡུལ་ནི་རྟག་ཏུ་མཐོང་ཞེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །དགུ་བཅུ་གཉིས་ཡོད་ཡབ་ནི་ལེགས་བྱིན་ཡིན། །སངས་རྒྱས་བློ་གྲོས་ཡུམ་ཡིན་སྲས་པོ་ནི། །མིག་མི་འཐུན་པ་ཟླ་བ་རིམ་གྲོ་པ། །རབ་ཏུ་བརྒྱན་པའི་གཟི་བརྗིད་བློ་ལྡན་ཏེ། །རྣམ་པར་ངེས་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །འཇིག་རྟེན་ཆགས་མེད་གཡོ་མེད་ང་མེད་པ། །འབུམ་ཕྲག་དྲུག་ཅུ་རྩ་ནི་གསུམ་གསུམ་ཡོད། །མི་ཚེ་ལོ་གྲངས་དག་ནི་བརྒྱད་ཁྲི་ཡིན། །མགོན་པོ་མཆོག་མ་མྱ་ངན་འདས་ནས་ཀྱང་། །དམ་པའི་ཆོས་ནི་ལོ་གྲངས་སྟོང་དུ་གནས། །རྒྱལ་བའི་སྐུ་གདུང་རིལ་གཅིག་མཆོད་རྟེན་གཅིག །དཔག་ཚད་གསུམ་པ་རྒྱལ་མཚན་དག་གིས་བརྒྱན། །སངས་རྒྱས་མཚུངས་པ་མེད་པ་དཔལ་དག་གི། །སྐྱེ་བའི་ཡུལ་ནི་འཇིག་རྟེན་མཛེས་ཞེས་བྱ། །རྒྱལ་བ་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་གཅིག་ཡོད་ཡབ་ནི་མྱ་ངན་མེད། །