།རྒྱལ་བ་མྱ་ངན་འདས་ནས་དམ་ཆོས་དག །ལོ་གྲངས་དྲུག་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་བརྒྱད་ཁྲི་དག་ནི་ཚང་བར་འགྱུར། །བདེ་བར་གཤེགས་པ་སྐལ་ལྡན་ཤིང་རྟ་ཡི། །སྐྱེ་བའི་ཡུལ་ནི་སྐར་མའི་འོད་ཅེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བཅུ་ཡོད་ཡབ་ནི་ཡུལ་འཁོར་བཟང་། །རིན་ཆེན་མཆོག་མ་རྒྱལ་ཡུམ་སྲས་པོ་ནི། །དགའ་བའི་དབང་ཕྱུག་ལེགས་དགའ་རིམ་གྲོ་པ། །འོད་བྱེད་ཅེས་ནི་བྱ་བ་མཁས་པ་སྟེ། །ཡོན་ཏན་འབྱུང་གནས་ཞེས་བྱ་རྫུ་འཕྲུལ་ཅན། །འདུས་པ་དག་ནི་ལན་གྲངས་བརྒྱད་ཅུ་སྟེ། །ཀུན་ལའང་སེམས་ནི་རྣམ་པར་གྲོལ་བ་ཀུན། །བྱེ་བ་ཕྲག་ནི་དགུ་བཅུ་རྩ་གཉིས་གཉིས། །དེ་དག་ཚེ་ཚད་ལོ་གྲངས་བརྒྱ་ཡང་ཡིན། །ཟད་མཐར་ཕྱིན་པའི་དམ་པའི་ཆོས་དག་ཀྱང་། །ལོ་གྲངས་སྟོང་ཕྲག་ཉི་ཤུ་གསུམ་དུ་གནས། །སྐུ་གདུང་མཆོད་རྟེན་བྱེ་སྟོང་བདུན་ཅུ་དྲུག །རིན་ཆེན་བརྒྱ་ཡི་དྲ་བས་རྣམ་པར་སྤྲས། །འཇིག་རྟེན་མགོན་པོ་ཀུན་ཏུ་རྒྱལ་བ་ཡི། །སྐྱེ་བའི་ཡུལ་ནི་བདེན་པས་བརྒྱན་ཅེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །བྱེ་བ་བཅུ་གཉིས་ཡབ་ནི་རྒྱ་མཚོ་ཡིན། །གཟི་བརྗིད་བདག་མོ་རྒྱལ་ཡུམ་སྲས་པོ་ནི། །བསམ་གཏན་དགའ་བ་ལྷ་ནི་རིམ་གྲོ་པ། །དགྲ་བཅོམ་དག་གིས་བསྟོད་པ་མཁས་པ་སྟེ། །རྒོལ་བ་རབ་ཏུ་འཇོམས་པ་རྫུ་འཕྲུལ་ཅན། །འདུས་པ་དག་ནི་ལན་གྲངས་བརྒྱད་ཡིན་ཏེ། །འདུས་པ་ཀུན་ལའང་ང་རྒྱལ་རྒྱལ་མཚན་དག །སྤངས་པ་ཐམས་ཅད་བྱེ་བ་ཕྲག་སྟོང་སྟོང་། །མི་ཚེ་ལོ་གྲངས་དག་ནི་བརྒྱད་ཁྲི་ཡིན། །མི་ཡི་མཆོག་རབ་དག་གི་དམ་ཆོས་དག །ལོ་གྲངས་བྱེ་བ་ཚང་བར་གནས་པར་འགྱུར། །མཆོད་རྟེན་བྱེ་བ་བརྒྱ་ཕྲག་ཚང་བ་ལ། །དངུལ་གྱིས་སྤྲས་ཤིང་མུ་ཏིག་རབ་ཏུ་སྦྱངས། །དེ་བཞིན་གཤེགས་པ་དགའ་བ་བཀོད་པ་ཡི། །སྐྱེ་བའི་ཡུལ་ནི་རྟག་ཏུ་མཐོང་ཞེས་བྱ། །རིགས་ནི་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་བྱེ་བ་ཡབ་ནི་འཁྲུག་པ་མེད། །སྐད་སྙན་མ་ཞེས་བྱ་བ་རྒྱལ་བའི་ཡུམ། །སྲས་པོ་འཇམ་དབྱངས་སྐར་མ་རིམ་གྲོ་པ།