།སྲས་པོ་བླ་མེད་ལྗོན་པ་རིམ་གྲོ་པ། །ང་རོ་སྙན་ཅེས་བྱ་བ་མཁས་པ་སྟེ། །བདེ་བར་སོང་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་རྩ་དྲུག་སྟེ། །ཀུན་ལའང་བྱེ་ཕྲག་ཉི་ཤུ་གཉིས་གཉིས་ཡོད། །མི་ཚེ་ལོ་གྲངས་སྟོང་ཕྲག་ཉི་ཤུ་གཉིས། །ཟད་མཐར་ཕྱིན་པའི་དམ་པའི་ཆོས་དག་ཀྱང་། །ལོ་གྲངས་སྟོང་ཕྲག་དགུ་བཅུ་གསུམ་དུ་གནས། །སྐུ་གདུང་རྒྱས་འགྱུར་རིན་པོ་ཆེ་ཡིས་སྤྲས། །མཆོད་རྟེན་བྱེ་བ་བརྒྱད་ཅུ་རྩ་དྲུག་སྟེ། །རིན་ཆེན་སྣ་བདུན་དག་གིས་བརྒྱན་པར་འགྱུར། །འཇིག་རྟེན་འདྲེན་པ་ན་ཚོད་བཟང་པོ་ཡི། །སྐྱེ་བའི་ཡུལ་ནི་རིན་ཆེན་བརྒྱན་ཅེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །ཉི་ཤུ་གཉིས་ཡོད་ཡབ་ནི་འབྱོར་པ་ཡིན། །སྐྱེ་བའི་མཆོད་རྟེན་ཡུམ་ཡིན་སྲས་པོ་ནི། །སྒྲ་གཅན་དགའ་བ་བཟང་པོ་རིམ་གྲོ་པ། །རྐང་འགྲོ་ཞེས་བྱ་དེ་ནི་མཁས་པ་སྟེ། །རྣམ་པར་སྒྲོགས་ཞེས་བྱ་བ་རྫུ་འཕྲུལ་མཆོག ། འདུས་པ་དག་ནི་ལན་གྲངས་བརྒྱད་ཅུ་སྟེ། །ཀུན་ལའང་དགྲ་བཅོམ་ཐམས་ཅད་གཡོ་མེད་པ། །རྣམ་གྲོལ་དྲི་མེད་བྱེ་བ་ཕྲག་བཅུ་བཅུ། །མི་ཚེ་ལོ་གྲངས་དག་ནི་བརྒྱད་ཁྲི་ཡིན། །འཇིག་རྟེན་མཁྱེན་པ་མྱ་ངན་འདས་ནས་ཀྱང་། །ལོ་སྟོང་བར་དུ་ཆོས་ཀྱི་འཁོར་ལོ་སྐོར། །སྐུ་གདུང་རྒྱས་འགྱུར་ཁོ་ར་ཁོར་ཡུག་ཏུ། །མཆོད་རྟེན་སྟོང་ཕྲག་དྲུག་ཅུ་རྩ་བཞིས་བརྒྱན། །དེ་བཞིན་གཤེགས་པ་ལྷ་དགའ་ཞེས་བྱ་བའི། །སྐྱེ་བའི་ཡུལ་ནི་ལྷ་ཡིས་བརྒྱན་ཅེས་བྱ། །རིགས་ནི་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་བྱེ་བ་ཡབ་ནི་ན་ཚོད་བཟང་། །མཉམ་པར་སེམས་ཞེས་བྱ་བ་རྒྱལ་བའི་ཡུམ། །སྲས་པོ་དགའ་སྡུག་དགའ་བོ་རིམ་གྲོ་པ། །མི་ཡི་སེང་གེ་ཞེས་བྱ་མཁས་པ་སྟེ། །བདུད་འཇོམས་པ་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་རྩ་དྲུག་སྟེ། །འདུས་པ་ཀུན་ལའང་བློ་གྲོས་རབ་ཞི་བ། །བྱེ་བ་བརྒྱ་ཕྲག་དྲུག་ཅུ་གཉིས་གཉིས་ཡོད། །མི་ཚེ་ལོ་གྲངས་སྟོང་ཕྲག་ཉི་ཤུ་གསུམ། །སྟོན་པ་མྱ་ངན་འདས་ནས་དམ་ཆོས་དག །ལོ་གྲངས་སྟོང་ཕྲག་བདུན་ཅུ་གཉིས་སུ་འབར། །སྐུ་གདུང་རྒྱས་འགྱུར་མཆོད་རྟེན་བཟང་པོ་དག །བྱེ་བ་སྟོང་ཕྲག་དགུ་བཅུ་རྩ་དགུ་འབྱུང་། །དེ་བཞིན་གཤེགས་པ་རིན་ཆེན་ཕུང་པོ་ཡི།