།རྫུ་འཕྲུལ་ཅན་རྣམས་ཀྱི་མཆོག་ནི་བརྡ་ལ་མཁས་པ་ཞེས་བྱའོ། །འདུས་པ་ནི་ལན་སུམ་ཅུ་སྟེ། ཐམས་ཅད་ལ་ཡང་འབུམ་འབུམ་མོ། །སྐུ་ཚེའི་ཚད་ནི་ལོ་ཉི་ཁྲི་བརྒྱད་སྟོང་ངོ་། །དམ་པའི་ཆོས་ནི་ལོ་བཞི་ཁྲིའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་ཞི་བའི་གཟི་བརྗིད་སྐྱེ་བའི་ཡུལ་ནི་གཟི་བརྗིད་མཐའ་ཡས་པ་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་གླིང་ཆེན་པོ་བཞི་པའི་འཇིག་རྟེན་གྱི་ཁམས་བརྒྱ་སྙེད་ཙམ་མོ། །ཡབ་ནི་གཟི་བརྗིད་མཐའ་ཡས་ཞེས་བྱའོ། །ཡུམ་ནི་གཟི་ལྡན་མ་ཞེས་བྱའོ། །སྲས་ནི་གཟི་བརྗིད་མེ་ཏོག་ཅེས་བྱའོ། །རིམ་གྲོ་པ་ནི་གཟི་བརྗིད་འཇམ་པ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་ཐོགས་པ་མེད་པའི་གཟི་བརྗིད་ཅེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་མཐུ་རྩལ་གཟི་བརྗིད་ཅེས་བྱའོ། །འདུས་པ་ནི་ལན་དྲུག་ཅུ་རྩ་དགུ་སྟེ། ཐམས་ཅད་ལ་ཡང་བྱེ་བ་ཕྲག་བརྒྱད་བརྒྱད་དོ། །སྐུ་ཚེའི་ཚད་ནི་ལོ་བྱེ་བའོ། །དམ་པའི་ཆོས་ནི་ལོ་ཁྲི་བཞི་སྟོང་གི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་དགའ་བའི་ཏོག་གི་ནི། །སྐྱེ་བའི་ཡུལ་ནི་དགའ་བར་བྱེད་ཅེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བཅུ་ཡོད་ཡབ་ནི་ལེགས་བཟངས་ཡིན། །ཆོས་ཀྱི་བློ་གྲོས་ཞེས་བྱ་ཡུམ་ཡིན་ནོ། །སྲས་པོ་འོད་བྱེད་དགེ་བ་རིམ་གྲོ་པ། །གྲགས་མཆོག་ཅེས་བྱ་བ་ནི་མཁས་པ་སྟེ། །རྣམ་པར་སྣང་བྱེད་ཅེས་བྱ་རྫུ་འཕྲུལ་ཅན། །འདུས་པ་དག་ནི་ལན་གྲངས་བརྒྱད་ཅུ་སྟེ། །ཀུན་ལའང་ཉོན་མོངས་སྤངས་པ་དགྲ་བཅོམ་པ། །བྱེ་བ་སྟོང་ཕྲག་བདུན་ཅུ་རྩ་གསུམ་གསུམ། །མི་ཚེ་ལོ་གྲངས་སྟོང་ཕྲག་བདུན་ཅུ་གསུམ། །འཇིག་རྟེན་མཁྱེན་པ་མྱ་ངན་འདས་ནས་ཀྱང་། །དམ་ཆོས་ལོ་གྲངས་བརྒྱད་ཁྲིའི་བར་དུ་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །དེ་ཡི་མཆོད་རྟེན་སྟོང་ཕྲག་བདུན་ཅུ་དྲུག །དེ་བཞིན་གཤེགས་པ་སྒྲ་གཅན་ལྷ་ཡི་ནི། །སྐྱེ་བའི་ཡུལ་ནི་དགའ་བར་བྱེད་ཅེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་བརྒྱད་ཡོད་ཡབ་ནི་གཟི་བརྗིད་བཟང་། །སྐལ་ལྡན་ཤིང་རྟ་ཞེས་བྱ་ཡུམ་ཡིན་ནོ། །སྲས་པོ་བླ་མེད་ལྗོན་པ་རིམ་གྲོ་པ།