།རྒྱ་མཚོའི་མཛོད་ཅེས་བྱ་བ་མཁས་པ་སྟེ། །བསོད་ནམས་སྟོབས་ཞེས་བྱ་བ་རྫུ་འཕྲུལ་ཅན། །འདུས་པ་དང་པོར་ཁྲི་ཕྲག་བཅུ་ཡོད་ལ། །གཉིས་པར་བརྒྱད་ཁྲི་གསུམ་པར་དྲུག་ཁྲི་ཡོད། །མི་རྣམས་དག་གི་ཚེ་ཚད་ལོ་གྲངས་ནི། །བརྒྱད་ཅུ་རྩ་བཞི་ཐམ་སྟེ་དེའི་ཡང་ཡིན། །དེ་ཡི་དམ་ཆོས་ལོ་གྲངས་སྟོང་ཕྲག་ནི། །དགུ་བཅུ་རྩ་གཉིས་བར་དུ་གནས་འགྱུར་ལ། །སྲིད་པ་མཐར་མཛད་གྲགས་པ་མཐའ་ཡས་དེའི། །སྐུ་གདུང་རྣམས་ཀྱང་རྒྱས་པ་དག་ཏུ་འགྱུར། །དེ་བཞིན་གཤེགས་པ་ཆོས་ཀྱི་དབང་ཕྱུག་གི། །སྐྱེ་བའི་ཡུལ་ནི་བློ་ཡི་ཏོག་ཅེས་བྱ། །རིགས་ནི་བྲམ་ཟེ་ཡིན་ཏེ་འོད་ཀྱི་ཚད། །དཔག་ཚད་བཅུ་ཡོད་ཡབ་ནི་ལེགས་བྱིན་ཡིན། །མཁས་པའི་ང་རོ་ཞེས་བྱ་ཡུམ་ཡིན་ནོ། །བསོད་ནམས་ཅན་སྲས་ལེགས་དགའ་རིམ་གྲོ་པ། །ཤེས་རབ་ཅན་གྱི་མཆོག་དང་རྫུ་འཕྲུལ་ཅན། །ཤིན་ཏུ་མཐོང་ཞེས་བྱ་བ་འབྱུང་བར་འགྱུར། །ཚོགས་འདུས་དང་པོ་བྱེ་བ་སུམ་ཅུ་གཉིས། །གཉིས་པར་བྱེ་བ་ཕྲག་ནི་ཉི་ཤུ་གཅིག །གསུམ་པར་བྱེ་ཕྲག་སུམ་ཅུ་སྐུ་ཚེའི་ཚད། །ལོ་གྲངས་སྟོང་ཕྲག་སུམ་ཅུ་རྩ་དྲུག་ཡིན། །གསུང་བའི་མཆོག་གི་དམ་པའི་ཆོས་དག་ཀྱང་། །ལོ་གྲངས་སྟོང་ཕྲག་བདུན་ཅུ་ཐམ་པར་གནས། །རྒྱལ་བ་མཚན་དང་གཟི་བརྗིད་དཔལ་རྒྱས་པའི། །མཆོད་རྟེན་དག་ཀྱང་ཉི་ཤུ་རྩ་གཅིག་འབྱུང་། །དེ་བཞིན་གཤེགས་པ་བློ་གྲོས་གྲགས་པ་ཡི། །སྐྱེ་བའི་ཡུལ་ནི་བསོད་ནམས་འོད་ཅེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་གཉིས་ཡོད་ཡབ་ནི་ན་ཚོད་བཟང་། །དེ་ཡི་ཡུམ་ནི་གསེར་གྱི་ཕྲེང་ཞེས་བྱ། །སྲས་པོ་ལེགས་འབྱོར་བློ་ལྡན་རིམ་གྲོ་པ། །ཚོགས་ཅན་རྒྱལ་པོ་མཁས་ཤིང་མཛངས་པ་སྟེ། །རྒྱལ་བས་བྱིན་པ་རྫུ་འཕྲུལ་ཅན་ཡང་ཡིན། །ཚོགས་བདག་དམ་པའི་འདུས་པ་དང་པོ་ལ། །དགྲ་བཅོམ་སུམ་ཁྲི་གཉིས་པར་ཉི་ཁྲི་ཡོད། །གསུམ་པར་ཆིག་ཁྲི་སྐུ་ཚེ་ལོ་སྟོང་ཡིན། །དམ་ཆོས་ལོ་གྲངས་བྱེ་བ་ཕྲག་གཉིས་གནས། །ཡེ་ཤེས་འབྱུང་གནས་འཇིག་རྟེན་མཁྱེན་པ་པོ། །ཡོན་ཏན་ཐམས་ཅད་བསགས་པར་གྱུར་པ་དེའི། །སྐུ་གདུང་རྒྱས་པར་འགྱུར་ལ་མཆོད་རྟེན་ཡང་། །དྲུག་ཅུ་གཉིས་ཏེ་དེ་ནི་དེ་འདྲར་འགྱུར།