།སྟོང་ཕྲག་བདུན་ཅུ་རྩ་གཉིས་དག་ཏུ་འགྱུར། །དམ་པའི་ཆོས་ཀྱང་ལོ་གྲངས་བྱེ་བར་གནས། །སྐུ་གདུང་མཆོད་རྟེན་གཅིག་ཅིག་འབྱུང་བར་འགྱུར། །དེ་བཞིན་གཤེགས་པ་རིན་ཆེན་འབྱུང་གནས་ཀྱི། །སྐྱེ་ཡུལ་གྲོང་ཁྱེར་བཟང་པོ་ཞེས་ཀྱང་བྱ། །འོད་ཀྱི་ཚད་ནི་དཔག་ཚད་དྲུག་ཅུ་ཡོད། །སྨན་པ་ཡབ་ཡིན་ཡུམ་ནི་ཟླ་ཉི་བཟང་། །རིན་ཆེན་མཆོག་མ་ཞེས་བྱ་སྲས་ཡིན་ལ། །རིམ་གྲོ་པ་ནི་བློ་གྲོས་བཟང་པོ་ཡིན། །མཐོང་དགའ་མཁས་པ་ཟླ་བ་རྫུ་འཕྲུལ་ཅན། །དེ་ཡི་འདུས་པ་དང་པོར་ཁྲི་ཕྲག་གཅིག །གཉིས་པར་དྲུག་ཅུ་རྩ་དྲུག་གསུམ་པར་ནི། །དྲུག་ཅུ་ཐམ་པ་རྒྱལ་དེའི་སྐུ་ཚེའི་ཚད། །ལོ་གྲངས་སྟོང་ཕྲག་དགུ་བཅུ་རྩ་ཡང་གཉིས། །ལྔ་འགྱུར་དུ་ནི་དམ་པའི་ཆོས་ཀྱང་གནས། །དེ་ཡི་སྐུ་གདུང་དག་ཀྱང་རྒྱས་འགྱུར་ཞིང་། །དེ་ནི་དཔལ་གྱིས་རྒྱས་པར་གྱུར་པ་སྟེ། །རི་དགས་ཁྱུ་མཆོག་སེང་གེའི་སྟབས་གཤེགས་པ། །དེ་ཡི་སྐུ་གདུང་རྣམས་ལའང་མཆོད་པར་འགྱུར། །སྟོན་པ་ལྷ་ཡི་མེ་ཏོག་སྐྱེ་བའི་ཡུལ། །གྲོང་ཁྱེར་མེ་ཏོག་གདུགས་ཞེས་བྱ་བ་ཡིན། །རིགས་ནི་བྲམ་ཟེ་ཡིན་ཏེ་འོད་ཀྱི་ཚད། །དཔག་ཚད་ཉི་ཤུ་རྩ་གཉིས་བློ་བཟངས་ཡབ། །ཡུམ་ནི་པད་ལྡན་སྲས་པོ་སྐྱེ་དབང་ཡིན། །སྙིང་པོ་མཛོད་འཆང་རིམ་གྲོ་པ་ཡང་ཡིན། །ཟླ་མཆོག་སྐྱེ་བོས་མཆོད་འགྱུར་ཤེས་རབ་ཅན། །ཟླ་འོད་ཅེས་བྱ་རྫུ་འཕྲུལ་ཅན་ཡང་ཡིན། །འདུས་པ་དང་པོར་བྱེ་བ་བརྒྱ་ཕྲག་གསུམ། །གཉིས་པར་བྱེ་བ་བརྒྱ་ཕྲག་གཉིས་གསུམ་པར། །བྱེ་བ་ཕྲག་བརྒྱ་སྐུ་ཚེའི་ལོ་གྲངས་ནི། །ཁྲི་ཕྲག་སྟོང་ཡིན་སུམ་འགྱུར་དམ་ཆོས་གནས། །འདྲེན་པ་ཡི་ནི་མཆོད་རྟེན་གཅིག་འབྱུང་ལ། །དེ་ལ་གང་དག་སྐྱེས་པ་བུད་མེད་རྣམས། །བསྟོད་མཆོག་མཆོད་པ་རྒྱ་ཆེན་བྱེད་དེ་དག །བྱང་ཆུབ་མཆོག་རབ་ལ་ནི་རེག་པར་འགྱུར། །དེ་བཞིན་གཤེགས་པ་དོན་ལེགས་སེམས་པ་ཡི། །སྐྱེ་བའི་ཡུལ་ནི་བསོད་ནམས་རབ་གསལ་ཡིན། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །ཉི་ཤུ་རྩ་གཉིས་བསོད་ནམས་བཟང་པོ་ཡབ། །དད་པ་ཅན་ཞེས་བྱ་བ་ཡུམ་ཡིན་ནོ། །རྣམ་འཕྲུལ་སྲས་ཡིན་དགེ་བ་རིམ་གྲོ་པ། །རྒྱ་མཚོའི་མཛོད་ཅེས་བྱ་བ་མཁས་པ་སྟེ།