Degé Kangyur volume 45, F.313.b

།མེ་ལོང་དང་ནི་བླ་རེ་ཕུལ་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་རྙོག་པ་མེད་དོན་ཤིང་སྲུངས་ཚེ། །​དེ་བཞིན་གཤེགས་པ་ཚོགས་ཀྱི་གཙོ་དེ་ལ། །​ཚེམས་ཤིང་དག་ནི་དབུལ་བ་བྱས་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་དྲག་ཤུལ་སྡེ་ནི་ཁྱེའུ་ཡི་ཚེ། །​དེ་བཞིན་གཤེགས་པ་སྤོས་ངད་ཞིམ་པོ་ལ། །​ཕྱག་དར་སྙིམ་པ་གང་ཞིག་ཕུལ་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་བསོད་ནམས་གཟི་བརྗིད་ལྕི་འཚོང་ཚེ། །​དེ་བཞིན་གཤེགས་པ་མཁས་པས་བསྔགས་དེ་ལ། །​ལྷུང་བཟེད་བཀྲུ་ཕྱིར་ལྕི་བའི་གོང་བུ་ཕུལ། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་མཐུ་རྩལ་ཅན་ནི་རྩྭ་འཚོང་ཚེ། །​དེ་བཞིན་གཤེགས་པ་བསོད་ནམས་མུ་སྟེགས་ལ། །​རྩྭ་ཁུར་དག་ནི་དབུལ་བ་བྱས་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་ཐོགས་མེད་བློ་ནི་མགར་བའི་ཚེ། །​དེ་བཞིན་གཤེགས་པ་ཤེས་རབ་འོད་དེ་ལ། །​མཚོན་ཆ་དག་ནི་དབུལ་བ་བྱས་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་སྒྲ་གཅན་ལྷ་ནི་ལྕགས་མགར་གྱི། །​ཁྱེའུ་ཡི་ཚེ་ན་དེ་བཞིན་གཤེགས་པ་པོ། །​ཡེ་ཤེས་གོ་ཆ་ལ་ནི་ཁབ་ཕུལ་ནས། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་ཡེ་ཤེས་ཕུང་པོ་འདྲེག་མཁན་ཚེ། །​དེ་བཞིན་གཤེགས་པ་མདངས་སྟོབས་སྐྱེ་བ་ཡི། །​སྲེག་ཤང་དག་ཅིག་དབུལ་བ་བྱས་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་ཁ་ལོ་སྒྱུར་བ་དབུལ་པོའི་ཚེ། །​དེ་བཞིན་གཤེགས་པ་གཟི་བརྗིད་དྲག་ཤུལ་ལ། །​མཆིལ་ལྷམ་རིམ་གཅིག་པ་དག་ཕུལ་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་སྐྱེ་དབང་མཚུངས་ནི་གྲོང་ཁྱེར་ན། །​རྟེན་ཚེ་བདེ་གཤེགས་སངས་རྒྱས་དགྱེས་དེ་ལ། །​མོན་སྲན་གྲེའུ་དག་གིས་གཏོར་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་མེ་ཏོག་ཏོག་ནི་རྒྱལ་གཙོ་ཡི། །​ཁྱེའུ་ཡི་ཚེ་ན་བདེ་གཤེགས་གསལ་རྒྱལ་ལ། །​མཆིལ་མའི་སྣོད་ནི་དབུལ་བ་བྱས་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་སྒྲ་གཅན་འཛིན་ནི་འདྲེག་མཁན་ཚེ། །​དེ་བཞིན་གཤེགས་པ་ཐམས་ཅད་དགྱེས་པ་པོ། །