བཅོམ་ལྡན་དེ་ཡི་སེན་མོ་བཅད་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རྩི་སྨན་ཆེན་པོ་ཐགས་མཁན་ཚེ། །དེ་བཞིན་གཤེགས་པ་ཡིད་གཉིས་རྣམ་གནོན་ལ། །རས་ཀྱི་ཁ་ཚར་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རྒྱུ་སྐར་རྒྱལ་པོ་ཚོང་འདུས་པ་ཡི་ཚེ། །དེ་བཞིན་གཤེགས་པ་དོན་ནི་ལེགས་པར་དགོངས་དེ་ལ། །བུམ་པ་མར་གྱིས་བཀང་བ་དག་ནི་ཕུལ་ནས་ཀྱང་། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྨན་པའི་རྒྱལ་པོ་ཚོང་དཔོན་བུར་གྱུར་ཚེ། །དེ་བཞིན་གཤེགས་པ་ལྷུན་པོ་ཆེན་པོ་དེ་ལ་ནི། །ལྷ་ཡི་ཁང་བཟངས་དག་ནི་དབུལ་བ་བྱས་ནས་ཀྱང་། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་བསོད་ནམས་གླང་པོ་འབྲུ་མར་གྱི། །མཁན་ཚེ་དེ་བཞིན་གཤེགས་པ་འཕགས་དུལ་ལ། །ཞབས་བསྐུ་བ་དག་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་གཅོད་མཛད་སྨད་འཚོང་བུ་མོའི་ཚེ། །དེ་བཞིན་གཤེགས་པ་མཁས་པ་གསལ་དེ་ལ། །མེ་ལོང་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རྣམ་གྲགས་རྒྱལ་པོའི་ཁྲུས་པ་ཡི། །ཁྱེའུ་ཚེ་བདེ་གཤེགས་བསྡུ་བའི་བློ་མངའ་ལ། །འདག་པའི་ཆལ་དག་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཉི་མའི་འོད་ཟེར་དགེ་སློང་དབྱར་གནས་པའི། །རིམ་གྲོ་པ་ཚེ་དེ་བཞིན་གཤེགས་པ་དབྱངས་སྙན་པ། །དེ་ལ་ཁྲུས་ཆུ་དག་ནི་དབུལ་བ་བྱས་ནས་ཀྱང་། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཆོས་མཛོད་དཀའ་ཐུབ་ཅན་གྱི་ཚེ། །དེ་བཞིན་གཤེགས་པ་མཐུ་ཆེན་གནས་སུ་ཕྱིན་པ་ལ། །མཚན་མོ་མར་མེ་དག་ནི་དབུལ་བ་བྱས་ནས་ཀྱང་། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་བློ་གྲོས་བཟང་པོ་སྨན་པའི་ཚེ། །དེ་བཞིན་གཤེགས་པ་སེང་གེའི་ང་རོ་ལ། །ཨ་རུ་ར་དག་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡོན་ཏན་དབང་མཚུངས་རྩྭ་ཐུན་ཚེ། །དེ་བཞིན་གཤེགས་པ་ཀུན་ཏུ་རིན་ཆེན་ལ། །བྷད་ཏྲ་ཀ་རི་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ།