།མཆོད་སྦྱིན་དམ་པ་ཅི་སླད་ད་མི་སྩལ། །བདུད་རྩི་མེད་པའི་སེམས་ཅན་སྟོང་པོ་རྣམས། །དད་པ་ཕལ་ཆེན་ས་བོན་འཛིན་མཆིས་ན། །རྣམ་གྲོལ་གློག་དང་ཐུགས་རྗེའི་ཆར་སྤྲིན་ལས། །ཅི་སླད་བྱང་ཆུབ་ཡན་ལག་ཆར་མི་དབབ། །ཟུག་རྔུས་ཟུག་པའི་ནད་པ་ཁམས་གསུམ་ན། །ཉོན་མོངས་ཉམ་ཐག་ནད་སྙིང་ཟས་ཕོངས་ལ། །བྱང་ཆུབ་ཡན་ལག་སྨན་མཆོག་བརྙེས་པ་ཡིས། །ནད་པ་ཡུན་རིང་དིང་ཅི་གྲོལ་མི་མཛད། །མུན་པ་མུན་ནག་ཞུགས་པའི་འགྲོ་བ་རྣམས། །གཏི་མུག་བསྒྲིབས་པ་མྱ་ངན་ཆེན་པོའི་ནང་། །སྟོང་ཆེན་ཤེས་རབ་མར་མེས་མུན་ཆེན་པོ། །བཟོད་བརླག་ཅི་ཡི་སླད་དུ་སེལ་མི་མཛད། །འདམ་རྫབ་ཆུ་བོ་བཞི་ན་ཡོངས་སྐྱོ་བའི། །སྐྱེ་བོ་གཡང་ས་ཆེན་པོར་ལྷུང་འདི་དག །ལྷར་བཅས་འཇིག་རྟེན་སྨན་སླད་ཐུགས་བརྩེ་བའི། །མགོན་པོས་ད་ནི་ཅི་སླད་གདོན་མི་བགྱི། །ལྟ་ལ་ཆགས་པའི་མུ་སྟེགས་ཕལ་ཆེན་གྱིས། །ལྷ་མི་ཀུན་དུ་གློངས་པར་མཆིས་རྣམས་ལ། །དྲང་པོ་མ་ཡོ་གཡོ་མེད་བདེ་བ་ཡིས། །ཅི་སླད་རིན་ཆེན་ལམ་དག་ད་མི་བསྟན། །མི་དབང་སེང་གེ་ལ་ནི་ཚངས་གསོལ་བས། །རྫོགས་སངས་རྒྱས་སྤྱན་འཇིག་རྟེན་གསུམ་ལ་གཟིགས། །གཟིགས་ནས་སེམས་ཅན་རྣམས་ལ་བརྩེ་བསྐྱེད་དེ། །ནད་མེད་ཆོས་ཀྱི་འཁོར་ལོ་བསྐོར་བར་གསོལ། །ལྷ་དེ་དག་གིས་དེ་ལྟར་བརྟགས་ནས་ཀྱང་། །བྱང་ཆུབ་སྙིང་པོར་སེང་གདན་ང་འདུག་ལ། །བསྟོད་དེ་བསྟོད་ནས་དེ་ལྟར་དགའ་བས་དོང་། །ངས་ཀྱང་ཆོས་ཀྱི་འཁོར་ལོ་རབ་ཏུ་བསྐོར། །དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་མཆོག་ཏུ་དགའ་བའི་རྒྱལ་པོས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་འདུས་པ་འདིའི་ནང་ན་ནི་གང་དག་ཏིང་ངེ་འཛིན་འདི་དང་། ཕ་རོལ་ཏུ་ཕྱིན་པ་ལ་འཇུག་པ་འདི་དང་། ཏིང་ངེ་འཛིན་གྱི་སྒོ་ལ་འཇུག་པ་བརྒྱད་ཁྲི་བཞི་སྟོང་པོ་འདི་རྣམས་ཐོབ་པ་དག་མཆིས་ལགས་སམ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་མཆོག་ཏུ་དགའ་བའི་རྒྱལ་པོ་ལ་འདི་སྐད་ཅེས་བཀའ་སྩལ་ཏོ།