Degé Kangyur volume 95, F.245.a

པོ་འདུལ་བའི་རྒྱུད་ཆེན་གྱི། །​བྲན་ཕོ་དང་ནི་བྲན་མོ་ད་ག །​སྒྲུབ་པར་བྱེད་པའི་ཆོ་གའོ། །​ཨོྃ་རཱ་ཧུ་རཱ་ཧུ། མ་ཧཱ་ཙེ་དུ་ཀ་ནན་ད་རི་དྷ་ནན་ཧི་ཏ་ཧ་ར་ཐཱ་ཡཱ། ཨོྃ་ཧྲ་ཧྲ་ཧྲ་ཧྲ་ཧྲ། གྲྀཧྞ་གྲྀཧྞ། མཱྃ་ས་སིདྡྷིཾ་མེ་པྲ་ཡཙྪ་སྭཱ་ཧཱ། ར་སྐྱེས་ནག་པོའི་ཤ་བཙོང་བའི་སྔགས་ཏེ་མཚན་མོ་དུར་ཁྲོད་དུ་སོང་ནས་བརྒྱ་རྩ་བརྒྱད་བཟླས་ན་ཤ་ཐམས་ཅད་བཙོང་བའི་ལས་འགྲུབ་པར་འགྱུར་རོ། །​མཚན་མོ་དུར་ཁྲོད་དུ་སོང་ནས་ཤ་སྲང་བརྒྱད་ཁྱེར་ནས་ཕྱོགས་བཞིར་རྣམ་པར་བལྟས་ཏེ། ཀྱེ་ཀྱེ་དུར་ཁྲོད་ན་གནས་པའི་འབྱུང་མོ་རྣམས་ཤ་ཉོའམ་ཞེས་བོས་ནས། བྲམ་ཟེའི་གཟུགས་ཀྱིས་མདུན་དུ་འདུག་སྟེ། ཀྱེ་སྐྱེས་བུ་ཆེན་པོ་ཅི་བཞེད་ཅེས་སྨྲ་ན། སྒྲུབ་པ་པོ་ཡིས་གསེར་འདོད་དོ་ཞེས་སྨྲ་སྟེ། གསེར་སྲང་བརྒྱ་སྟེར་བར་བྱེད་དོ། །​དེ་ནས་ཤ་སྦྱིན་ཏེ་གལ་ཏེ་མི་འདོད་ན་མིག་དང་སྤྱི་བོ་འགས་པའམ་འཆི་བར་འགྱུར་རོ། །​དེ་ནས་དབང་ཕྱུག་ཆེན་པོ་ལྷ་ཆེན་པོ་རིག་འཛིན་བྱེ་བ་དུ་མས་ཡོངས་སུ་བསྐོར་ཏེ། ལྷའི་བུ་མོ་དུ་མ་དང་། གནོད་སྦྱིན་དང་། ཀླུ་དང་། མིའམ་ཅི་དང་། ལྟོ་འཕྱེ་ཆེན་པོ་ཁྲི་ཕྲག་བརྒྱ་སྟོང་དུ་མ་དང་ལྷན་ཅིག་ཏུ་འཁོར་གྱི་དཀྱིལ་འཁོར་ཆེན་པོ་དེར་དཔལ་རྡོ་རྗེ་འཆང་ཁྲོ་བོའི་བདག་པོ་ཆེན་པོ་ལ་ལན་གསུམ་བསྐོར་བ་བྱས་ཏེ། ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །​བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་མི་ཕྱེད་པར་བསྟན་པ། ཁམས་གསུམ་པའི་རྒྱལ་པོ་ཆེན་པོ་འབྱུང་པོ་དང་། ཀླུ་དང་། གནོད་སྦྱིན་དང་རིག་འཛིན་རྣམས་འཇིག་པར་བྱེད་པ། བགེགས་ཐམས་ཅད་འཇོམས་པ། སྡུག་བསྔལ་བ་དང་། ཉོན་མོངས་པ་ཐམས་ཅད་སེལ་བ། གདོན་ཐམས་ཅད་དང་། རོ་ལངས་དང་། ལུས་སྲུལ་པོ་རྣམས་གསོད་པ། དཀྱིལ་འཁོར་གསང་ཆེན་ཐམས་ཅད་གྲུབ་པར་བྱེད་པ་བཤད་དུ་གསོལ། དེ་ནས་འཁོར་གྱི་དཀྱིལ་འཁོར་དེར་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པས་འབྱུང་པོའི་དབང་ཕྱུག་ལྷ་ཆེན་པོ་ལ་ལེགས་སོ་ཞེས་བྱ་བ་བྱིན་ཏེ་ལེགས་སོ་ལེགས་སོ། །​ལྷ་ཆེན་པོ་མ་འོངས་པའི་



The English translation of this folio by 84000 Translating the words of the Buddha can be found at:
https://read.84000.co/translation/toh747.html?part=UT22084-095-002-2067#UT22084-095-002-2067