།བཅིངས་པ་རྣམས་ནི་འཆིང་ལས་གྲོལ། །འགྲོ་བ་ལྔ་དང་ལྡན་པ་ཡི། །འཁོར་བའི་སྡུག་བསྔལ་ལྟུང་བ་རྣམས། །བདེ་བ་ཞི་བ་མྱ་ངན་འདས། །མི་གཡོ་གོ་འཕང་འཐོབ་པར་འགྱུར། །རང་རྒྱལ་སངས་རྒྱས་ཉིད་དང་ནི། །ཉན་ཐོས་མཐར་ནི་ཕྱིན་པར་འགྱུར། །མདོ་སྡེ་འདི་ནི་བཀླག་པ་ཡིས། །སངས་རྒྱས་སྐུ་མདོག་ཐོབ་པར་འགྱུར། །གང་གཱའི་བྱེ་མ་མཉམ་པ་ཡིས། །རྒྱལ་བ་མཆོག་ནི་མཐའ་ཡས་པ། །མཆོད་པས་ཐོབ་པའི་བསོད་ནམས་དང་། །མདོ་འདི་བཏོན་པའི་བསོད་ནམས་མཉམ། །འཇིག་རྟེན་ཇི་སྙེད་གང་སུ་དག །ཞིང་ནི་བྱེ་བ་མཐའ་ཡས་པ། །དེ་སྲིད་ཕྲ་རབ་རྡུལ་སྙེད་ཀྱི། །སངས་རྒྱས་རྣམས་ལ་རྟག་མཆོད་པ། །རྣམ་པ་སྣ་ཚོགས་བཟའ་བཏུང་དང་། །ན་བ་རྣམས་ཀྱི་གསོ་སྨན་དང་། །རྣམ་པ་སྣ་ཚོགས་གནས་མལ་རྣམས། །རྟག་ཏུ་ཐམས་ཅད་རབ་སྦྱིན་དང་། །རྣམ་པ་སྣ་ཚོགས་གོས་དང་ནི། །ཕྱེ་མ་དག་ནི་ཀུན་གྱིས་ཀྱང་། །བསོད་ནམས་སྐྱེ་བོས་ཐོབ་གང་ཡིན། །འདི་དག་འཆང་དང་ཀློག་པས་སོ། །གང་ཞིག་རང་སངས་རྒྱས་རྣམས་དང་། །འཇིག་རྟེན་ཉན་ཐོས་རྫུ་འཕྲུལ་ཆེ། །བྱང་ཆུབ་སེམས་དཔའ་བདག་ཉིད་ཆེ། །ས་བཅུ་ལ་གནས་དེ་ལས་གཞན། །དེ་རྣམས་ཚད་ནི་དེ་མཉམ་ལ། །དེ་དག་མཆོད་པའང་དེ་བཞིན་ཏེ། །གང་གི་ལག་པར་གླེགས་བམ་ཆུད། །མི་ཡིས་དེ་མཉམ་བསོད་ནམས་ཐོབ། །འཇིག་རྟེན་ཇི་སྙེད་བསྟན་པ་ཡང་། །འཇིག་རྟེན་ཁམས་ན་གནས་པ་ཡི། །གྲངས་མེད་སེམས་ཅན་མ་ལུས་པ། །ཐམས་ཅད་ནད་ནི་མེད་བྱས་ཏེ། །སྐྱེ་བོ་གང་ཞིག་ཡང་དང་ཡང་། །བཀུར་སྟིར་བྱས་ནས་དེ་མཆོད་པ། །ཆོས་མཆོག་འདི་ལ་མཆོད་ན་ནི། །བློ་ལྡན་དེ་ཡིས་བསོད་ནམས་འཐོབ། །བསྐལ་པ་བྱེ་བ་མཐའ་ཡས་པར། །རྒྱལ་བ་མཆོག་གིས་རྟག་པར་ཡང་། །འཇིག་རྟེན་མགོན་ཆོས་མཛད་མཆོག་འདི། །མཆོད་པར་ཡང་ནི་མི་ནུས་སོ། །ཆོས་མཆོག་འདི་ནི་ས་སྟེང་དུ། །ཡིད་བཞིན་ནོར་བུ་རིན་ཆེན་འདྲ། །འཇམ་པའི་ཆོ་ག་འདིར་གསུངས་པ། །བཀླགས་པ་དང་ནི་འཆང་བ་ཡིས། །དེས་ནི་འདོད་འཇོའི་བ་འདྲར་འགྱུར། །ལོངས་སྤྱོད་ཆེ་ནོར་ཕུན་སུམ་ཚོགས།