།བྱང་ཆུབ་སེམས་དཔའི་སྤྱོད་པའི་རྗེས་སུ་འཇུག་པ་རྒྱུད་ཐམས་ཅད་ཀྱི་མཛོད་ཅེས་བྱ་བར་ཡང་ཟུང་ཤིག །ཐེག་པ་ཆེན་པོ་ཤིན་ཏུ་རྒྱས་པ་ངེས་པར་བསྟན་པ་ཉམས་པ་མེད་པ་ཞེས་བྱ་བར་ཡང་ཟུང་ཤིག །བྱང་ཆུབ་སེམས་དཔའི་སྡེ་སྣོད་ཅེས་བྱ་བར་ཡང་ཟུང་ཤིག །འཕགས་པ་འཇམ་དཔལ་གྱི་རྩ་བའི་ཆོ་ག་ཞེས་བྱ་བར་ཡང་ཟུང་ཤིག །ཆོས་ཐམས་ཅད་ཀྱི་དོན་རྫོགས་པ་ངེས་པར་བསྟན་པ་ཞེས་བྱ་བར་ཡང་ཟུང་ཤིག །འཇིག་རྟེན་མ་ལུས་ཐམས་ཅད་ལ། །ཆོས་དང་ཆོས་མིན་རྣམ་སྤྱོད་ཅིང་། །བྱང་ཆུབ་སེམས་དཔའ་རྫུ་འཕྲུལ་ཆེ། །གང་ཁྱོད་ཀུན་ཏུ་རྣམ་པར་རྒྱུ། །དེ་བཞིན་ཆོས་ཀྱི་དམ་པ་མཆོག །གསང་བ་གཞན་ནི་མ་མཐོང་ངོ་། །སྔགས་རྒྱུད་དོན་དང་མདོ་རྣམས་དང་། །འགྲོ་བ་ཡུལ་ནི་སྐྱོན་མེད་དང་། །བྱང་ཆུབ་ཆོས་ལ་རབ་གཞོལ་བ། །དཔའ་བོ་གཞན་ནི་མ་མཐོང་ངོ་། །གང་འདི་བླ་མ་གསང་བ་དང་། །དྲང་དོན་མདོ་ཡིས་ཡོངས་སུ་བརྒྱན། །རྣམ་པ་སྣ་ཚོགས་མདོ་དོན་དང་། །སྔགས་དང་རྒྱུད་ཀྱི་རྗེས་འཇུག་པ། །ཆོ་ག་རབ་འབྱམ་འདི་ལས་གཞན། །མ་བྱུང་གང་ཡང་ཡོད་མ་ཡིན། །རྒྱལ་སྲིད་ཆེན་པོ་ལོངས་སྤྱོད་ཆེ། །ལྷ་གནས་དག་ཏུའང་ཕུན་སུམ་ཚོགས། །དེ་བཞིན་ལྷ་དང་མི་རྣམས་ཀྱི། །གྲགས་པ་རྒྱས་པའང་ཐོབ་པར་འགྱུར། །མི་ཁོམ་བརྒྱད་ནི་སྤོང་བྱེད་ཅིང་། །དལ་བ་དག་ནི་ཐོབ་པར་བྱེད། །ཐེག་པ་རྣམ་གསུམ་བདག་པོ་དང་། །དེ་ངེས་སངས་རྒྱས་ཉིད་ཐོབ་འགྱུར། །མདོ་འདི་འཛིན་པའི་བསོད་ནམས་དང་། །དེ་བཞིན་དུ་ནི་ཕན་ཡོན་འདི། །འདི་ཡི་ལུས་ལ་མཚོན་མི་འབྱུང་། །དུག་དང་མེས་ཀྱང་མ་ཡིན་ནོ། །རོ་ལངས་དང་ནི་གདོན་དང་ནི། །དེ་བཞིན་སྲུལ་པོ་མ་མོ་དང་། །སྲིན་པོ་ཤ་ཟས་འཚེ་བྱེད་པའང་། །གང་ཞིག་མདོ་འདི་འདོན་ལ་མིན། །འཆང་བ་དང་ནི་ཀློག་པ་དང་། །ཡང་དང་ཡང་དུ་མཆོད་བྱེད་དང་། །འཇིགས་པ་མེད་པས་མཆོད་བྱེད་དང་། །རྣམ་པ་སྣ་ཚོགས་མཆོད་བྱེད་དེ། །ཕན་ཡོན་འདི་ནི་རབ་བསྟན་པ། །འཇིག་རྟེན་འདིར་ནི་ཐོབ་འགྱུར་བ། །ནད་པ་རྣམས་ནི་ནད་ལས་གྲོལ། །སྡུག་བསྔལ་ཅན་ནི་བདེ་བར་འགྱུར། །དབུལ་པོས་ནོར་ནི་རྙེད་འགྱུར་ཏེ། །བཅིངས་པ་རྣམས་ནི་འཆིང་ལས་གྲོལ།