འདི་ནི་མུན་ནག་མཛེས་མ་ཞེས་བྱ་བ་གནོད་སྦྱིན་མ་སྟོང་ཕྲག་དུ་མས་ཡོངས་སུ་བསྐོར་བས་སྒྲུབ་པ་པོས་འགྲུབ་པར་འགྱུར་ན་ཉིན་རེ་ཞིང་གནོད་སྦྱིན་མོའི་བྲན་མོ་རེ་རེ་གཏོང་བར་བྱེད་དོ། །བློན་པོའི་འཁོར་དུ་མ་དང་ལྡན་པ་དང་གནོད་སྦྱིན་མོ་ཐམས་ཅད་ན་ཡང་རྫུ་འཕྲུལ་ཆེ་བ་དང་མུན་པས་བསྐོར་བ་འདི་དག་ཐམས་ཅད་ཀྱང་ཆོ་ག་ཐ་དད་པ་མ་ཡིན་མོད་ཀྱི་འོན་ཀྱང་གཞན་དེ་དག་ནི་མཐོང་བར་འགྱུར་རོ། །མུན་ནག་ཆེན་པོ་ན་གནས་པ་ཞེས་བྱ་བའི་གནོད་སྦྱིན་མོ་རྫུ་འཕྲུལ་ཆེ་བ་དང་ཕུག་གནས་མ་དང་མིའི་དཔའ་མོ་དང་གཞོན་ནུ་མ་འཇིག་རྟེན་རྣམ་པར་གྲགས་པ་དང་། མནའ་མ་གནོད་སྦྱིན་མོ་དང་ཡིད་དུ་འོང་མ་དང་བདུན་པ་ལྷ་མཛེས་མ་དང་འདི་དག་ནི་གནོད་སྦྱིན་མོ་བདུན་དག་སྟེ། སེམས་ཅན་རྣམས་རྗེས་སུ་འཛིན་པར་བྱེད་པའོ། །ས་རྣམས་མ་ལུས་དག་ཏུ་ནི། །འཇིག་རྟེན་འདིར་ནི་ཡོངས་སུ་རྒྱུ། །ཅུང་ཟད་ཀྱི་ནི་དུས་དག་ཏུའང་། །ལྷའི་གནས་སུ་ཡང་འགྲོ་བར་བྱེད། །ལྷ་དང་ལྷ་མིན་གཡུལ་དག་ཏུའང་། །རྫུ་འཕྲུལ་ཆེན་པོས་འཐབ་པར་བྱེད། །ཆོས་ལྡན་སྙིང་ནི་བརྩེ་བ་དང་། །སེམས་ཅན་འདོད་ཅིང་མཉེས་གཤིན་བཟང་། །སེམས་ཅན་ཕན་པའི་འདོད་དོན་དུ། །ས་སྟེང་དག་ཏུ་ཡོངས་སུ་རྒྱུ། །དེ་ལ་བསྒྲུབ་དཀའ་ཅུང་ཟད་མེད། །དགེ་བའི་ལས་རྣམས་མ་ལུས་བྱེད། །སེམས་ཅན་ལོངས་སྤྱོད་དོན་དུ་ནི། །བྱང་ཆུབ་སེམས་དཔས་བཤད་པ་ཡིན། །ཕུག་གནས་མའི་སྔགས་ནི། ཨོཾ་གུ་ཧི་ལི་གུ་ཧ་པ་ཏི་གུ་ཧ་བཱ་སི་ནི་ཨཱ་ན་ཡ་བྷ་ག་བ་ཏི་མ་མཱ་ཏི་ཀྃ་ས་མ་ཡ་མ་ནུ་སྨ་ར་སྭཱ་ཧཱ། སེང་ལྡེང་གིས་མེ་རབ་ཏུ་སྦར་ལ། པྲི་ཡང་ཀུའི་མེ་ཏོག་ལ་མར་གྱིས་བཏགས་ཏེ། ཟླ་བ་གཅིག་གི་བར་དུ་དུས་གསུམ་དུ་སྦྱིན་སྲེག་སྟོང་རྩ་བརྒྱད་བྱས་ན་སྔོན་དུ་བསྙེན་པ་བྱས་པར་འགྱུར་རོ། །དེ་ནས་དེའི་འོག་ཏུ་སྒྲུབ་པ་བརྩམ་པར་བྱ་སྟེ། དང་པོར་རེ་ཞིག་བྱང་བུའམ་རས་སམ་རྩིག་པ་ལ་ཚོན་མ་འདྲེས་པ་སྣོད་སར་པ་དག་གི་ནང་དུ་བཅུག་པའི་པིར་དག་གིས་རིའི་རྒྱལ་པོ་རི་རབ་ཟུར་བཞི་དང་རྩེ་མོ་བཞི་དང་ལྡན་པ། རི་བདུན་གྱི་ཕྲེང་བས་ཡོངས་སུ་བསྐོར་བ། རི་དེ་དག་གི་མཐའ་མར་རི་བོ་དག་ལ་བརྟེན་པའི་ཕུག་ཀུན་ཏུ་བྲི་བར་བྱའོ།