།ཕན་ཚུན་དུ་སོར་མོ་བསྣོལ་བ་ཁུ་ཚུར་དུ་བྱས་ལ་གུང་མོའི་སོར་མོ་གཉིས་རྣམ་པར་བཀྲོལ་ལ་རྩེ་མོ་སྦྱར་ཏེ། དེའི་འགྲམ་གཉིས་སུ་མཛུབ་མོ་གཉིས་དཀྲི་ཞིང་མཐར་གཞག་པར་བྱའོ། །དེ་ལ་འདི་ནི་འཇམ་དཔལ་ཁྱོད་ཀྱི་མཆེ་བའི་ཕྱག་རྒྱ་ཞེས་བྱ་བ་གཞན་ཡིན་ནོ། །མཆེ་བའི་ཕྱག་རྒྱའི་འགྲམ་དུ་མཐེ་བོ་གཉིས་བཞག་པའི་ཕྱག་རྒྱ་འདི་ནི་མངོན་སུམ་དུ་འཇམ་དཔལ་གཞོན་ནུ་ཁྱོད་ཉིད་ཡིན་ནོ། །གནས་དེ་དང་ལག་པའི་ཁ་སྦྱར་དེར་ཉེ་བར་བཞུགས་ཤིང་དམ་ཚིག་གིས་བྱིན་གྱིས་རློབ་པར་བྱེད་དོ། །ལག་པའི་སོར་མོ་ཕན་ཚུན་ཁུ་ཚུར་དུ་བྱས་ལ་མཛུབ་མོ་གཉིས་བཀྲོལ་ཏེ། མཐེ་བོ་གཉིས་གུང་མོའི་ནང་དུ་ཆུང་བར་བྱས་པ་འདི་ནི་འཇམ་དཔལ་ཁྱོད་ཀྱི་གཙུག་པུད་ཀྱི་ཕྱག་རྒྱ་ཞེས་བྱ་བ་སྟེ། གཞན་ཡིན་ནོ། །ཐལ་མོའི་ཚིགས་རྣམས་བརྐྱང་བ་བྱས་ལ་སྲིན་ལག་དང་། མཛུབ་མོ་གཉིས་ཀྱི་རྩེ་མོ་གུང་མོའི་ནང་དུ་རྩེ་སྤྲད་དེ་བཞག་པ་འདི་ནི་འཇམ་དཔལ་མངོན་སུམ་ཁྱོད་ཉིད་ཀྱི་རྩ་བའི་སྔགས་སུ་བསྟན་པ་ཡིན་ནོ། །འདི་ཉིད་ཀྱི་ཕྱག་རྒྱ་ལ་མཛུབ་མོ་གཉིས་བརྐྱང་བར་བྱས་པ་སྟེ། དེ་ལ་འདི་ནི་འཇམ་དཔལ་ཁྱོད་ཀྱི་ཕྱག་རྒྱར་འགྱུར་རོ། །མཐེའུ་ཆུང་དང་སྲིན་ལག་གཉིས་བསྣོལ་བ་བྱས་ནས་ལག་པ་ཁ་སྦྱར་གྱི་ནང་དུ་བཞག་ལ་གུང་མོའི་ཕྱི་རོལ་ཏུ་མཛུབ་མོའི་རྩེ་མོ་ཡོངས་སུ་བཀུག་ལ། མཐེ་བོ་གཉིས་ཀྱི་རྩེ་མོ་ཡང་དག་པར་བཅར་བའོ། །གཞན་འདི་ཡང་འཇམ་དཔལ་ཁྱོད་ཀྱི་ཞལ་གྱི་ཕྱག་རྒྱ་ཡིན་ནོ། །ལས་ཐམས་ཅད་པ་ཡང་ཡིན་ཏེ་འདི་ཉིད་ཀྱི་རིམ་གྱིས་སོར་མོ་རེ་རེ་བཀྲོལ་བ་མཐེ་བོ་དང་བཅས་པ་བྱས་ན་མ་རུངས་པའི་གདོན་ཐམས་ཅད་རབ་ཏུ་འབྱེར་བར་འགྱུར་རོ། །དེ་བཞིན་དུ་རྣ་བ་དང་མགྲིན་པ་དང་ལག་ངར་དང་སྙིང་དང་ལག་པ་དང་ལྐོག་མ་དང་རྐེད་པ་དང་ལྟེ་བ་དང་བརླ་དང་བྱིན་པ་དང་རྐང་པ་དང་མིག་དང་ཁ་དང་ལྕེ་རྣམས་ཏེ། དེ་ལྟར་སོར་མོ་བཅུ་རྣམས་མཐར་གྱིས་བརྐྱང་ན། རིམ་བཞིན་དུ་ཕྱག་རྒྱའི་མཚན་ཉིད་དུ་འགྱུར་ཏེ། མཐར་གྱིས་ཀྱང་ལས་བྱེད་དོ། །ཞལ་གྱི་ཕྱག་རྒྱས་ནི་ཁ་འཆིང་བར་བྱེད་དོ། །མཆེ་བའི་ཕྱག་རྒྱས་ནི་གདོན་མ་རུངས་པ་ལས་གྲོལ་ལོ། །ལྕེའི་ཕྱག་རྒྱས་ནི་ཚིག་ངན་པ་ཟློག་པར་བྱེད་དོ། །སྙིང་གི་ཕྱག་རྒྱས་ནི་མིའི་བདག་པོའི་ཁྲོ་བ་སེལ་བར་བྱེད་པའམ། སེམས་ཅན་གཞན་ལྷ་དང་ལྷ་མ་ཡིན་དང་མི་དང་མི་མ་ཡིན་པ་དང་འགྲོ་བ་རྣམ་པ་སྣ་ཚོགས་ལ་བརྟེན་པའི་ཁྲོས་པ་རྣམས་ཀྱི་ཁྲོ་བ་འཇིག་པར་འགྱུར་ཏེ།