སེམས་ཅན་གཞན་ལྷ་དང་ལྷ་མ་ཡིན་དང་མི་དང་མི་མ་ཡིན་པ་དང་འགྲོ་བ་རྣམ་པ་སྣ་ཚོགས་ལ་བརྟེན་པའི་ཁྲོས་པ་རྣམས་ཀྱི་ཁྲོ་བ་འཇིག་པར་འགྱུར་ཏེ། དེ་བཞིན་དུ་མཐར་གྱིས་ཐམས་ཅད་དུ་ལས་ཐམས་ཅད་བྱེད་པར་འགྱུར་རོ། །དེ་ལྟར་རིམ་པ་འདིས་ཕྱག་རྒྱ་གྲངས་མེད་པར་འགྱུར་ཏེ། །ལས་གྲངས་མེད་པ་དག་ཀྱང་བྱེད་པར་འགྱུར་རོ། །འཇམ་དཔལ་ཁྱོད་ཀྱིས་རྣམ་པ་ཐམས་ཅད་དུ་ཕྱག་རྒྱ་ཐམས་ཅད་ཁོ་ན་ལས་ཐམས་ཅད་བྱེད་པར་འགྱུར་རོ། །དཔའ་བོ་ཆེན་པོ་དེ་བཞིན་གཤེགས་པ་གྲངས་ལས་འདས་པ་དག་གིས་ཕྱག་རྒྱ་འདི་དག་བཅིངས་སོ། །ཕྱག་རྒྱ་ཆེན་པོ་དཔའ་བོ་ཆེན་པོ་ས་ཆེན་པོ་ལ་གནས་པས་ཀྱང་བཅིངས་སོ། །གང་དུ་གཏམས་པ་ཕྲག་བྱེ་བ་སུམ་ཅུ་རྩ་གསུམ་མམ་བརྒྱད་ཅུའམ་དགུ་བཅུ་རྩ་ལྔའམ་ཁྲི་ཕྲག་དྲུག་ཅུའི་གྲངས་ལ་སོགས་པ་འཇིག་རྟེན་ལས་འདས་པའི་ཡང་འདས་པས་ཕྱག་རྒྱ་བཅིངས་སོ། །འཇིག་རྟེན་བྱ་བ་གང་གཞན་ནི། །ཀུན་ཀྱང་ཕྱག་རྒྱ་རྣམས་སུ་འདུས། །འདི་དག་གང་ཡང་རུང་བ་ཡི། །ཕྱག་རྒྱས་དོན་ཀུན་སྒྲུབ་བྱེད་པའོ། །དཀྱིལ་འཁོར་བསྒྲུབ་པའི་དུས་དག་ཏུ། །ལག་པ་གཉིས་ཀྱིས་བཅིང་བར་བྱ། །སྔོན་དུ་བསྙེན་པ་ལ་བརྩོན་པས། །སྦྱིན་སྲེག་བཟླས་པ་དག་ལའང་བྱ། །འདུག་པའམ་འགྲེང་བ་དག་གིས་ཀྱང་། །ཟློས་པས་ཅི་འདོད་བར་དུ་བཟླ། །སྲུང་བ་ཆེན་པོའི་ཆོ་གས་ཀྱང་། །མྱུར་དུ་གྲུབ་པ་ཐོབ་པར་འགྱུར། །དུས་ཀུན་ཕྱག་རྒྱ་ཀུན་གྱིས་ནི། །ལས་རྣམས་ཀུན་ནི་བྱ་བ་ཡིན། །འཕགས་པ་འཇམ་དཔལ་གྱི་རྩ་བའི་ཆོ་ག་བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་ལས། ཕྱག་རྒྱའི་ཆོ་གའི་ལེའུ་རབ་འབྱམ་གཉིས་པ་ལས། སུམ་ཅུ་པ་རྫོགས་སོ།། །།དེ་ནས་བཅོམ་ལྡན་འདས་ཤཱཀྱ་ཐུབ་པས་གཞན་ཡང་གནས་གཙང་མའི་གཞལ་མེད་ཁང་ལ་གཟིགས་ནས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ཁྱོད་ཀྱི་རྩ་བའི་ཆོ་ག་ལ་ཕྱག་རྒྱ་མཆོག་ཏུ་ཤིན་ཏུ་གསང་བ་གཞན་ཡང་ཡོད་དེ། ཕྱག་རྒྱ་དང་རྒྱུད་ཐམས་ཅད་ཀྱི་ཆོ་ག་སྔགས་ཐམས་ཅད་ཀྱི་མངོན་པར་འདོད་པ།