དང་པོར་རེ་ཞིག་སྔ་མ་བཞིན་དུ་རས་མ་ཉམས་པ་སྐྲ་ཤད་དང་བྲལ་བ། ཞག་བདུན་ནམ་ཞག་བདུན་གསུམ་གྱི་བར་དུ་ཐག་པས་བཏགས་པ་ཁ་ཚར་དང་བཅས་པ། གུར་གུམ་དང་ཙནྡན་གྱི་ཆུས་བསང་གཏོར་བྱས་ཏེ། སངས་རྒྱས་བཅོམ་ལྡན་འདས་ཤཱཀྱ་ཐུབ་པ་པདྨའི་གདན་ལ་བཞུགས་ཤིང་ཆོས་འཆད་པ། འཇམ་དཔལ་གཞོན་ནུར་གྱུར་པ་ལ་གཟིགས་པ་བྲི་བར་བྱའོ། །གཡས་ཕྱོགས་སུ་ནོར་བཟང་དང་འཕགས་པ་བློ་གྲོས་མི་ཟད་པ་དང་འཇམ་དཔལ་ཡང་བཅོམ་ལྡན་འདས་ལ་ཕྱག་འཚལ་བར་བྱེད་པ། གཞོན་ནུའི་གཟུགས་ཅན་ལུས་རྒྱན་ཐམས་ཅད་ཀྱིས་བརྒྱན་པ་བྲི་བར་བྱའོ། །གཡོན་ཕྱོགས་སུ་ཀུན་ཏུ་བཟང་པོ་དང་འཕགས་པ་སྤྱན་རས་གཟིགས་དབང་ཕྱུག་དང་བཟང་སྐྱོང་དང་ལེགས་སྐྱེས་ཀྱང་བྲི་བར་བྱའོ། །བཅོམ་ལྡན་འདས་ཀྱི་སྐུ་ལས་ཤིན་ཏུ་ཆུང་བར་འདྲིར་གཞུག་པར་བྱའོ། །འཕགས་པ་སྤྱན་རས་གཟིགས་དབང་ཕྱུག་དང་ནོར་བཟང་ནི་ལག་ན་རྔ་ཡབ་ཐོགས་པར་བྱའོ། །འོག་ཏུ་ནི་སའི་ལྷ་མོ་རིན་པོ་ཆེའི་ཟ་མ་ཏོག་ལག་ན་ཐོགས་པ། རོ་སྟོད་ས་ལས་བྱུང་བ་འདྲིར་གཞུག་པར་བྱའོ། །སྟེང་དུ་ནི་རིག་པ་འཛིན་པ་གཞོན་ནུ་གཉིས་ཕྲེང་བ་འཛིན་པ་སྤྲིན་གྱི་ནང་ནས་ཆར་གཏོང་བ་རིག་པ་དང་བཅས་པ་བྲི་བར་བྱའོ། །བྱང་ཆུབ་སེམས་དཔའ་ཐམས་ཅད་ཀྱང་ལག་ན་མེ་ཏོག་ཐོགས་པ། བཅོམ་ལྡན་འདས་ཀྱི་ཞལ་ལ་རྣམ་པར་ལྟ་བ་དང་རྒྱན་དང་ལྡན་པ། དང་བའི་ལྟ་བ་དང་རོ་སྟོད་བཅོམ་ལྡན་འདས་ཀྱི་ཞབས་ལ་འདུད་པ་དང་བཅས་པ་འདྲིར་གཞུག་པར་བྱའོ། །དེ་འདི་ལྟ་བུའི་རས་རིས་སྐུ་གདུང་དང་ལྡན་པའི་མཆོད་རྟེན་གྱི་དྲུང་དུ་ནུབ་ཏུ་བསྟན་ཏེ་བཞག་ལ་འཇམ་དཔལ་འདིའི་ཡི་གེ་གཅིག་པ་བཟླས་པ་འབུམ་བྱའོ། །ཤིང་བཞིན་དུ་མི་སྨྲ་བའི་དཀའ་ཐུབ་དང་དུས་གསུམ་དུ་ཁྲུས་བྱེད་པ་དང་གོས་ལན་གསུམ་བརྗེ་བ་དང་རྟག་ཏུ་གསོ་སྦྱོང་བྱེད་པ་དང་། ཚོད་རྔད་དང་ནས་ཆན་ཁྱོར་གང་ཙམ་དང་འོ་མ་དང་སློང་མོའི་ཟས་ཀྱིས་འཚོ་བའོ། །ཟས་ཀྱང་ཆ་རྣམ་པ་བཞིར་བྱ་སྟེ། ཆ་གཅིག་ནི་དཀོན་མཆོག་གསུམ་ལའོ། །གཉིས་པ་ནི་འཇམ་དཔལ་ལའོ། །གསུམ་པ་ནི་སེམས་ཅན་ཐམས་ཅད་ལའོ།