གྲུབ་པ་མཆོག་ནི་མི་འཐོབ་བོ། །འབད་པས་བཟླས་དང་སྦྱིན་སྲེག་བྱ། །གྲུབ་པ་འབྲིང་ནི་འགྲུབ་པར་འགྱུར། །ཆོ་ག་མཐོང་བའི་ལས་ཀྱི་ནི། །ཐ་མ་མྱུར་དུ་འགྲུབ་པར་འགྱུར། །མཆོག་དང་ཐ་མ་བར་མ་ཡི། །ལས་ནི་རྣམ་པ་གསུམ་དུ་བསྟན། །དཀའ་ཐུབ་ཅན་ནི་ཟློས་མཆོག་གིས། །དེ་བཞིན་གྲུབ་པ་མཆོག་ཐོབ་འགྱུར། །དེ་བཞིན་བཟླས་པ་བར་མ་ཡིས། །བར་མ་ལས་གྲུབ་ཐོབ་པ་ཡིན། །དེ་བཞིན་ཟློས་པ་ཐ་མས་ནི། །ཐ་མའི་ལས་ལ་ཡང་དག་བརྟེན། །གྲུབ་པ་ཕྲ་མོ་ཐོབ་པར་ཡང་། །གཞན་གྱི་གྲུབ་པ་ཐོབ་མ་ཡིན། །དུས་དང་ཚོད་དང་བཟླས་པ་དང་། །སྦྱིན་སྲེག་མཐོང་བས་དེ་བཞིན་འགྲུབ། །མཆོག་གིས་མཆོག་ནི་འགྲུབ་པ་དང་། །བར་མས་བར་མའི་གྲུབ་པ་སྣང་། །ཐ་མས་ཐ་མའི་ལས་དག་ལ། །ཕྲན་ཚེགས་གྲུབ་པ་ཐོབ་པ་ཡིན། །འཕགས་པ་འཇམ་དཔལ་གྱི་རྩ་བའི་ཆོ་ག་བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་ལས། ཡི་གེ་གཅིག་པ་རྩ་བའི་རྒྱུད་འཕགས་པ་འཇམ་དཔལ་གྱི་སྙིང་པོའི་ཆོ་ག་རབ་འབྱམ་ལས། ལེའུ་ཉི་ཤུ་རྩ་གཅིག་པ་རྫོགས་སོ།། །།དེ་ནས་བཅོམ་ལྡན་འདས་ཤཱཀྱ་ཐུབ་པས་གཞན་ཡང་གནས་གཙང་མའི་གཞལ་མེད་ཁང་ལ་གཟིགས་ནས། འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་གཞན་ཡང་ཁྱོད་ཀྱི་རས་རིས་ཀྱི་ཆོ་ག་སྒྲུབ་པའི་ཐབས་ལ་ལས་ཐམས་ཅད་ཀྱི་དོན་སྒྲུབ་པ་ཉོན་ཅིག །འདི་ཉིད་ཀྱི་ཡི་གེ་གཅིག་པའི་སྙིང་པོའི་སྔགས་སམ་ཡི་གེ་དྲུག་པོ་མའི་མཐའ་ཅན་ཁྱོད་ཀྱི་སྔར་བསྟན་པའི་ཡི་གེ་དྲུག་པའི་སྙིང་པོའམ་དང་པོ་ན་ཨོྃ་ཡོད་པའི་ཡི་གེ་གཅིག་པའི་རས་རིས་དང་པོ་འདི་ཉིད་ཀྱི་ཆོ་གར་འགྱུར་བ་ནི་ཕྱི་མའི་དུས་ཕྱི་མའི་ཚེ་ན། དེ་བཞིན་གཤེགས་པ་ང་ཡོངས་སུ་མྱ་ངན་ལས་འདས་ཏེ། སངས་རྒྱས་ཀྱི་ཞིང་སྟོངས་ཤིང་རྩོད་པའི་དུས་ཐ་མར་ཕྱིན་པ་ན་འཇིག་རྟེན་སྐྱོབ་པ་མེད་པ་དང་སྐྱབས་མེད་པ་དང་གནས་མེད་པ་དང་། དཔུང་གཉེན་མེད་པ་ན། ཆོ་གའི་རྒྱལ་པོ་འདི་ཉིད་སྐྱོབ་པར་གྱུར་པ་དང་། སྐྱབས་སུ་གྱུར་པ་དང་། གནས་སུ་གྱུར་པ་དང་། དཔུང་གཉེན་དུ་གྱུར་པར་འགྱུར་རོ། །