།ཅི་སྟེ་མི་འདོད་ན་ཐལ་བ་ལ་ལན་བདུན་བསྔགས་པ་བྱས་ནས་ལྟེ་བའི་ཕྱོགས་སུ་བསྐུས་ན་ཞག་བདུན་ཕྲག་གསུམ་དུ་ས་བོན་བསྡམས་པ་བྱས་པར་འགྱུར་རོ། །ལན་ལྔ་བཟླས་ཏེ་སངས་རྒྱས་བཅོམ་ལྡན་འདས་བསྒོམས་ན་གང་ལ་རེག་པ་དེ་དབང་དུ་འགྱུར་རོ། །ཟླ་བ་གཟས་ཟིན་ཅིང་ཟླ་བའི་དཀྱིལ་འཁོར་ཐམས་ཅད་འཛིན་པ་ན། ཤིང་ཨརྐའི་མེ་རབ་ཏུ་སྦར་ལ་རས་རིས་མེད་ཀྱང་ཤར་དུ་མངོན་པར་བལྟས་ཏེ། མར་གྱི་སྲེག་བླུགས་སྟོང་ཕྲག་བཅུས་སྦྱིན་སྲེག་བྱའོ། །རྒྱལ་པོའི་ཕོ་བྲང་དང་ཉེ་བ་ཆུ་བོས་བར་མ་བཅད་པ། ལྷའི་གནས་སུ་མ་བྱས་པ། ཕྱོགས་གང་དུ་རྒྱལ་པོ་གནས་པ་དེ་དང་ཉེ་བར་སྦྱིན་སྲེག་རབ་ཏུ་སྦྱར་ན་ཐོ་རངས་རྒྱལ་པོ་དབང་དུ་འགྱུར་རོ། །གང་སྨྲས་པ་དེ་ཐམས་ཅད་བྱེད་པར་འགྱུར་རོ། །གལ་ཏེ་དབང་དུ་མ་གྱུར་པ་དེའི་ཚེ། དེའི་སེམས་ཕྱིན་ཅི་ལོག་ཏུ་འགྱུར་བའམ་སེམས་གཡེང་བ་ཐོབ་པར་འགྱུར་ན་ཕྱིར་ཡང་བཟློག་པར་བྱ་སྟེ། འོ་མའི་སྲེག་བླུགས་སྟོང་རྩ་བརྒྱད་ཀྱིས་སྦྱིན་སྲེག་བྱས་ན་གང་དེའི་དུས་དེ་ནས་བརྩམས་ནས་རང་བཞིན་དུ་གནས་པར་འགྱུར་རོ། །ལས་དེ་དག་ནི་དད་པ་དང་ལྡན་པ་དང་དཀོན་མཆོག་གསུམ་ལ་དད་པ་དང་བྱང་ཆུབ་ཏུ་སེམས་བསྐྱེད་པ་རྣམས་ལ་ནི་མི་བྱ་སྟེ། གལ་ཏེ་བྱེད་ན་ཤིན་ཏུ་བསོད་ནམས་མ་ཡིན་པའི་ཕུང་པོ་ཆེན་པོ་འབྱུང་བར་འགྱུར་རོ། །གཞན་དག་ལ་གནོད་པ་བྱེད་པ། མ་རུངས་པའི་སེམས་དང་དྲག་པོའི་སེམས་དང་ལྡན་པ་རྣམས་ལ་ནི་བྱ་བ་ཡིན་ནོ། །ཉིན་རེ་ཞིང་ཡང་མཐོང་བ་སྦྱིན་པར་བྱས་ན་སེམས་ཞི་བར་འགྱུར་རོ། །གལ་ཏེ་ཞི་བར་མ་གྱུར་ན་ཕུང་ཁྲོལ་ཆེན་པོ་དང་ལྡན་པར་འགྱུར་ཏེ། སྲོག་གི་ལྷག་མ་ཙམ་ལུས་པར་འགྱུར་རོ། །གཞན་ཡང་ལས་སུ་འགྱུར་བ་ནི་ཟླ་བ་གཟས་ཟིན་གྱི་དུས་སུ་ཤིང་པ་ལ་ཤའི་ཡམ་ཤིང་གིས་མེ་རབ་ཏུ་སྦར་ཏེ། མར་གྱི་སྲེག་བླུགས་སྟོང་རྩ་བརྒྱད་བྱས་ན་ཐོ་རངས་ཡུལ་གྱི་བདག་པོའི་རྒྱལ་པོ་སྤྱན་དྲངས་པར་འགྱུར་རོ། །དེ་དང་ལྷན་ཅིག་ཏུ་གྲོས་བྱས་ན་བསམ་པ་བདེན་པ་ཉེ་བར་སྟོན་པར་འགྱུར་ཏེ། དེ་ལ་བསྟན་ངག་བྱས་ན་ཟླ་བ་དྲུག་གི་ནང་དུ་བསོད་སྙོམས་སྟོང་ཡོད་པའི་གྲོང་སྟེར་བར་འགྱུར་རོ། །གལ་ཏེ་མཚན་ཕྱེད་དུ་སྦྱིན་སྲེག་བྱས་ན་ཟླ་བ་གསུམ་གྱིས་སྟེར་བར་འགྱུར་རོ། །གལ་ཏེ་ཐུན་ཐམས་ཅད་ཀྱི་མཚན་མོ་སྦྱིན་སྲེག་བྱས་ན་ཟླ་བ་གཅིག་གིས་ཐོབ་པར་འགྱུར་རོ།