།དེ་ཉིད་བཅོམ་ལྡན་འདས་ཚེ་དང་ཡེ་ཤེས་དཔག་ཏུ་མེད་པ་རྣམ་པར་གདོན་མི་ཟ་བའི་རྒྱལ་པོའི་དབང་པོས་བྱིན་གྱིས་བརླབས་པ་ནི་དེ་བཞིན་གཤེགས་པ་ཐམས་ཅད་ཀྱི་སྙིང་པོ་ཞེས་བརྗོད་དོ། །དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་གྱི་རྒྱལ་པོ་ཞེས་བརྗོད་དོ། །འཁོར་ལོས་སྒྱུར་བ་ཞེས་བརྗོད་དོ། །འཁོར་ལོས་སྒྱུར་བའི་རྒྱལ་པོ་ཆེན་པོ་ཞེས་བརྗོད་དོ། །འཇམ་དཔལ་གཞོན་ནུར་གྱུར་པའི་སྙིང་པོ་ཞེས་བརྗོད་དོ། །ཡི་གེ་གཅིག་པ་ཞེས་བརྗོད་དོ། །མདོར་ན་འདིའི་མཐུ་ནི་བསམ་གྱིས་མི་ཁྱབ་སྟེ། གང་གི་ཕྱིར་སངས་རྒྱས་རྣམས་ཀྱིས་བྱིན་གྱིས་བརླབས་པ་ནི་བསམ་གྱིས་མི་ཁྱབ་བོ། །སངས་རྒྱས་ཀྱི་རྣམ་པར་འཕྲུལ་བ་ནི་བསམ་གྱིས་མི་ཁྱབ་བོ། །སྒྲུབ་པ་མེད་པ་དང་སྔོན་དུ་སྤྱོད་པ་མ་བྱས་པ་དང་ཁྱིམ་གྱི་རྩོམ་པ་ཐམས་ཅད་ལ་རབ་ཏུ་གནས་པ་དང་བཟའ་བ་ཐམས་ཅད་ཤ་དང་ཆང་དང་གྲོང་གི་ཆོས་ལ་རབ་ཏུ་ཞུགས་པ་དག་ལ་ཡང་འགྲུབ་སྟེ། དད་པ་མེད་པ་དང་བྱང་ཆུབ་ཏུ་སེམས་བསྐྱེད་པ་མེད་པ་ནི་མ་གཏོགས་ཏེ་འདི་དག་ལ་ནི་གྲུབ་པ་མེད་དོ། །དཀོན་མཆོག་གསུམ་ལ་གནོད་པ་བྱེད་པ་དང་དེ་ལ་ཞུགས་པ་ལ་གནོད་པ་བྱེད་པ་དང་འདི་དག་ལ་ཡང་ལས་ཕྲ་མོ་ཡང་གྲུབ་པ་མེད་ན། གྲུབ་པ་འབྲིང་དང་རབ་ལ་ནི་ལྟ་སྨོས་ཀྱང་ཅི་དགོས། འདོད་པ་ཐམས་ཅད་དང་བཟའ་བ་དང་སྤྱོད་པ་གཙོར་བྱེད་པའི་སྒྲུབ་པ་པོ་ལ་ནི་ལས་སྟོང་རྩ་བརྒྱད་ཀྱི་ལས་ཕྲན་ཚེགས་ལ་རབ་ཏུ་སྦྱར་བས་འགྲུབ་པར་འགྱུར་རོ། །དེ་དག་ཀྱང་གང་ཞེ་ན། དང་པོར་རེ་ཞིག་ལན་གཅིག་བཟླས་པས་བདག་བསྲུང་ངོ་། །ལན་གཉིས་བཟླས་པས་གཞན་བསྲུང་བར་འགྱུར་རོ། །ལན་གསུམ་བཟླས་པས་སྲུང་བ་དམ་པར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་ས་བཅུ་ལ་རབ་ཏུ་གནས་པས་ཀྱང་ཡང་དག་པར་བསྐྱོད་པར་མི་ནུས་ན། དེ་ལས་གཞན་པའི་སེམས་ཅན་གྱིས་ལྟ་སྨོས་ཀྱང་ཅི་དགོས། ཚོན་སྣ་ལྔའི་སྐུད་པ་ལ་ལན་བཞི་བཟླས་ནས་རྐེད་པར་བཅིངས་ན་ས་བོན་བསྡམས་པར་འགྱུར་བ་ཡིན་ཏེ། རྨི་ལམ་ན་ཡང་འདི་ལ་ས་བོན་འབྱུང་བར་མི་འགྱུར་རོ། །རང་འདོད་པ་ནི་མ་གཏོགས་ཏེ་དེ་ཉིན་པར་རམ་མཚན་མོ་གཅིག་ལ་གལ་ཏེ་འདོད་པ་ན་ཉི་མ་རེ་རེ་ཞིང་བྱའོ། །ཅི་སྟེ་མི་འདོད་ན་ཐལ་བ་ལ་ལན་བདུན་བསྔགས་པ་བྱས་ནས་ལྟེ་བའི་ཕྱོགས་སུ་བསྐུས་ན་ཞག་བདུན་ཕྲག་གསུམ་དུ་ས་བོན་བསྡམས་པ་བྱས་པར་འགྱུར་རོ།