།དེ་བཞིན་ཁྲུས་བྱས་སོང་ནས་ནི། །གང་ན་རས་རིས་བར་མ་དེ། །རྒྱལ་བ་གཙོ་བོ་ཐུབ་མཆོག་ནི། །ཤཱཀྱ་སེང་གེ་མི་ཡི་མཆོག །དེ་བཞིན་རྟག་ཏུ་སྟོན་པའི་གཟུགས། །ས་སྟེང་རྒྱལ་བའི་རིང་བསྲེལ་ཅན། །དེ་ཡི་མདུན་དུ་ཕྲེང་བ་ནི། །དེ་དང་ཉེ་བར་གཞག་པར་བྱ། །དེ་དང་ཉེ་བར་བཞག་ནས་ནི། །དེ་ཡི་མདུན་དུ་ཉེར་གནས་ནས། །སྟོང་ཕྲག་གཅིག་དང་བརྒྱད་དང་ནི། །བརྒྱ་དང་རྩ་བརྒྱད་བཟླས་ནས་ཀྱང་། །ཉིན་ཞག་གཅིག་ནི་སྨྱུང་བྱས་ཏེ། །བདུན་པ་ཐུབ་ལ་ཕྲེང་བ་དབུལ། །སྔ་མ་དེ་བཞིན་བཟླས་བྱས་ནས། །ཚད་ཀྱང་དེ་དང་མཉམ་པར་བྱ། །དེ་ནས་ཕྲེང་བ་ལ་བཟླས་ནས། །དེ་ཡི་མཚན་མོ་ཉལ་བར་བྱ། །ཀུ་ཤ་བཏིང་བའི་ས་ལ་ནི། །སྔགས་ཤེས་དེར་ནི་ཉལ་བར་བྱ། །གལ་ཏེ་དེས་ནི་རྨི་ལམ་ན། །དགེ་བའི་རྨི་ལམ་མཐོང་ན་ནི། །འབྲས་བཅས་རྨི་ལམ་སྟོན་པ་སྟེ། །དེ་ལ་གྲུབ་པར་བསྟན་པ་ཡིན། །སངས་རྒྱས་ཉན་ཐོས་བསེ་རུ་ནི། །གལ་ཏེ་འདི་ཡིས་རྨི་ལམ་མཐོང་། །སྔགས་པ་དེ་ཡི་བྱ་བ་ནི། །འབྲས་བཅས་ངེས་པར་འགྲུབ་པར་འགྱུར། །གཞོན་ནུའི་གཟུགས་ཅན་བྱིས་པ་ནི། །རྣམ་པ་སྣ་ཚོགས་མཛེས་མཐོང་བ། །གལ་ཏེ་རྨི་ལམ་ངེས་མཐོང་དང་། །ཕྲེང་བ་སྩོལ་བའང་དེ་བཞིན་ཏེ། །དོན་ཡོད་དེ་ནི་འགྲུབ་འགྱུར་ཏེ། །སྔགས་ཀྱི་དོན་རྣམས་སྒྲུབ་བྱེད་པའོ། །བྱང་ཆུབ་སེམས་དཔའི་སྡེ་སྣོད་ཐེག་པ་ཆེན་པོ་ཤིན་ཏུ་རྒྱས་པའི་མདོ་ལས། འཕགས་པ་འཇམ་དཔལ་གྱི་རྩ་བའི་ཆོ་ག་ལས་རས་རིས་བར་མ་ལ་བརྟེན་པ་ཆོ་ག་རབ་འབྱམ་ལས། ཕྲེང་བའི་ཆོ་ག་རབ་འབྱམ་བཅུ་གཉིས་པ་རྫོགས་སོ།། །།དེ་ནས་བཅོམ་ལྡན་འདས་ཤཱཀྱ་ཐུབ་པས། གཞན་ཡང་ཐམས་ཅད་དང་ལྡན་པའི་གནས་གཙང་མའི་གཞལ་མེད་ཁང་ལ་གཟིགས་ནས། འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ཁྱོད་ཀྱི་སྔགས་མཐའ་དག་རྣམ་པར་དགོད་པའི་ཁྱད་པར་གྱི་ཆོ་ག་དང་སྦྱིན་སྲེག་གི་ལས་ལ་རབ་ཏུ་སྦྱོར་བའི་རིག་པ་སྒྲུབ་པ་ཡོད་དེ། མེ་ལ་ཉེ་བར་སྤྱོད་པའི་ཁྱད་པར་གྱི་ཆོ་གའི་ཕྱིར། གང་གི་རིག་པ་ཐམས་ཅད་ཀྱི་སྤྱོད་པ་ལ་མངོན་པར་བརྩོན་པའི་སེམས་ཅན་རབ་ཏུ་འཇུག་ཅིང་གནས་པར་འགྱུར་རོ། །དེ་གང་ཞེ་ན། གསང་བའི་རིག་སྔགས་ཀྱི་གཞི་ནི་འདི་ལྟ་སྟེ།