Degé Kangyur volume 88, F.186.b

གསང་བའི་རིག་སྔགས་ཀྱི་གཞི་ནི་འདི་ལྟ་སྟེ། ཨོྃ་ཨུཏྟིཥྛ་ཧ་རི་པིང་ག་ལ་ལོ་ཧི་ཏཱ་ཀྵ། དེ་ཧི་ད་དཱ་པ་ཡ་ཧཱུཾ་སྥ་ཊ་སྥ་ཊ་སརྦ་བིགྷྞཱཾ་བི་ནཱ་ཤ་ཡ་སྭཱ་ཧཱ། འཇམ་དཔལ་འདི་ནི་མེའི་སྙིང་པོའི་མཆོག་ལས་ཐམས་ཅད་བྱེད་པ་འདོད་པ་ཐམས་ཅད་སྟེར་བར་བྱེད་པ་ཡིན་ཏེ། དང་པོ་རེ་ཞིག་སྒྲུབ་པ་པོས་མེའི་སྙིང་པོ་འདི་ལན་ཅིག་བཟླས་པས། སྲེག་བླུགས་གསུམ་གྱིས་མེ་ལ་སྦྱིན་སྲེག་བྱས་ནས་མེ་སྤྱན་དྲང་བར་འགྱུར་རོ། །​དེ་ལྟར་རབ་ཏུ་སྦྱར་ན་ཞི་བ་དང་རྒྱས་པ་དང་། དྲག་པོའི་ལས་དག་ལ་ཡམ་ཤིང་རྣམ་པ་གསུམ་དུ་འགྱུར་ཏེ། མྱ་ངན་མེད་ཤིང་ཞི་དོན་དུ། །​རློན་པ་ཉིད་ནི་རབ་ཏུ་བསྔགས། །​མཐོ་གང་འམ་ནི་ཁྲུ་གང་ཙམ། །​སོར་གསུམ་སྲིད་དུ་བྱ་བ་ཡིན། །​སྣུམ་པའི་རྣམ་པ་རབ་ཏུ་བསྔགས། །​ཆོ་ག་འདི་ནི་བྱ་བ་ཡིན། །​བུ་ག་མེད་ཅིང་ནང་སྟོང་མིན། །​དེ་བཞིན་ནེ་ཙོའི་འདབ་མ་དང་། །​ལྗང་དང་དཀར་བའི་ཁ་དོག་གམ། །​ཁ་དོག་ནག་པ་སྤང་བར་བྱ། །སྲིན་བུ་རྣམས་ཀྱིས་ཟོས་པའང་སྤང་། །​བུ་ག་ཡོད་པའང་རྣམ་པར་བཟློག །​གཞན་ཡང་ཁ་དོག་རབ་བསྔགས་མིན། །​ཐ་མ་ཉིད་ཀྱང་རྣམ་པར་སྤངས། །​ཧ་ཅང་སྐམ་མིན་རློན་པའང་མིན། །​ཚིག་མིན་ལས་ནི་བརྩམ་པར་བྱ། །​རུལ་བ་དང་ནི་ཡོ་བའང་མིན། །​ཤིན་ཏུ་རིང་བའང་སྤང་བར་བྱ། །​དེ་ནས་མེ་ཐབ་བྱ་བ་ནི། །​ཀུན་ནས་གྲུ་བཞིར་བྱ་བ་སྟེ། །​འོག་ཉིད་དུ་ཡང་བརྐོ་བ་ནི། །​འབད་པས་ཁྲུ་ནི་བཞི་ཡི་ཚད། །​ཁྲུ་གསུམ་དང་ནི་ཁྲུ་གཉིས་དང་། །​དེ་བཞིན་ཁྲུ་གཅིག་ཚད་དུ་བྱ། །​རྟག་ཏུ་སྲོག་ཆགས་སྤངས་པ་དང་། །​བྱེ་མས་ལེགས་པར་སྦྱར་བ་གང་། །​དེ་ནས་པད་འདྲའི་ལན་ཀན་ནི། །​ཀུན་ནས་དཀྱིལ་འཁོར་འདྲ་བའོ། །​ཡང་ན་འབད་པས་ཟུར་བཞི་ཡང་། །​དེ་བཞིན་ལན་ཀན་དབྱིབས་སུ་བྱ། །​རྡོ་རྗེའི་རྣམ་པ་འདྲ་བ་ཡི། །​རྩེ་མོ་གཉིས་སུའང་རྩེ་གསུམ་བྱ། །​མེ་ཐབ་ཀྱི་ནི་ཐད་ཀ་ལ། །​ཁྲུ་གཉིས་ཐད་ཀར་བྱ་བ་ཡིན། །​གཙང་དང་དེ་བཞིན་གསལ་བའི་གནས། །​ཆུ་ཀླུང་དེ་བཞིན་ཆུ་དབུས་དང་། །​ཤིང་གཅིག་གི་ནི་ཕྱོགས་དག་དང་། །​དུར་ཁྲོད་དང་ནི་ཁང་སྟོང་དུ། །​སྦྱིན་སྲེག་ལེགས་པར་ཡང་དག་བརྩམ། །​དེ་བཞིན་རི་བོའི་རྩེ་དག་ཏུའོ། །​རྟག་ཏུ་ལྷ་ཁང་སྟོང་པ་དང་། །​དགོན་པ་ཆེན་པོའང་དེ་བཞིན་ནོ།



The English translation of this folio by 84000 - Translating the words of the Buddha can be found at:
https://read.84000.co/translation/toh543.html?part=UT22084-088-038-19079#UT22084-088-038-19079