རླབས་ཆེན་པོའི་རིའི་ཕ་རོལ་བྱང་ཕྱོགས་ངོས་ན་རི་ངོས་གཅིག་པ་ཞེས་བྱ་བ་དཔག་ཚད་བརྒྱ་ཕྲག་བཅུ་བཞིར་གྱུར་པའི་རི་གསེར་འབར་བ་དག་གིས་རྣམ་པར་བརྒྱན་པ་ཉི་མ་གཉིས་པ་དང་འདྲ་བར་གྱུར་པ་ཡིན་ནོ། །དེ་ལ་ལྷའི་མེ་ཏོག་ཏུ་གྱུར་པ་མན་དཱ་ར་བ་དང་། པད་མ་ཀུ་ཤེ་ཤ་ཡཱ་དང་། བཻ་ཌཱུརྱའི་རང་བཞིན་གྱི་པད་མ་རྣམས་སྐྱེ་བ་ཡིན་ནོ། །ལྷའི་ནགས་དང་ཉེ་བའི་ནགས་རྣམས་ཀྱང་རི་འདི་ལ་ཡོད་པ་ཡིན་ནོ། །ངོས་གཅིག་པའི་རི་དེ་ལས་འདས་པར་གྱུར་ནས་གཞན་རིའི་རིགས་སུ་གྱུར་པ་དག་ཡོད་དམ་ཞེས་རྣལ་འབྱོར་སྤྱོད་པ་ཀུན་ཏུ་ལྟ་བར་བྱེད་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཤར་གྱི་ཕྱོགས་སུ་རྒྱ་མཚོ་དཔག་ཚད་སུམ་སྟོང་དུ་ངེས་པར་བྱུང་ནས་སོང་བར་གྱུར་པ་ན་གསེར་འབར་བ་ཞེས་བྱ་བ་རི་རབ་ལས་ཧ་ཅང་མི་རིང་བ་ན་ཡོད་དོ། །དེ་ནས་ལྷུན་པོའི་ལོགས་ལ་ཤར་བ་ཞེས་བྱ་བའི་རི་ཡོད་དེ། གང་གིས་འཛམ་བུའི་གླིང་འདི་ནི་དེས་བཻ་ཌཱུརྱའི་རང་བཞིན་གྱི་མདོག་ཏུ་བྱེད་པ་དང་། གང་གིས་ཤར་གྱི་ལུས་འཕགས་པོ་ནི་དེས་གསེར་གྱི་མདོག་ཏུ་བྱེད་པ་ཡིན་ནོ། །རི་དེའི་ངོས་སྔོན་པོར་སྣང་བ་ཡིན་པས་རི་ཡིས་འཛམ་བུའི་གླིང་གི་ནམ་མཁའ་ཡང་སྔོན་པོར་མཐོང་ངོ་། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། རི་ཤར་བ་དེ་དང་ཐག་ཉེ་བར་གྱུར་པ་ན་གཞན་དག་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རི་ཤར་བ་དེ་ལས་རིང་དུ་འདས་པར་གྱུར་ནས་ཤར་གྱི་ལུས་འཕགས་སུ་རི་རབ་ལྷུན་པོ་དེའི་རྭ་གཉིས་པར་གྱུར་པ་ཡིད་བདེ་བ་ཞེས་བྱ་བ་ལྷའི་འཛམ་བུའི་ཆུ་བོའི་གསེར་གྱི་རང་བཞིན་དུ་གྱུར་པ་ཡངས་པ་གསེར་གྱི་པད་མས་ལེགས་པར་ཀུན་ཏུ་བརྒྱན་པ་སྟེ། རྒྱར་ནི་དཔག་ཚད་བཅུ་པའོ། །འཕང་དུ་ནི་དཔག་ཚད་ལྔ་བརྒྱ་ཡིན་ནོ། །དེ་ལ་ནི་གསེར་གྱི་རང་བཞིན་གྱི་ལྗོན་ཤིང་དང་། རི་དགས་དང་། བྱ་རྣམས་དང་། གསེར་ས་ལེ་སྦྲམ་གྱི་རང་བཞིན་གྱི་ལྗོན་ཤིང་ལོ་མ་རྣམས་དང་། ལྷའི་གླུ་མཁན་རྣམས་ཀྱིས་ཀྱང་བསྟེན་པ་ཡིན་ནོ། །དེ་ལ་ཡང་ཕྲེང་བ་ཐོགས་པར་གྱུར་པའི་ལྷ་རྣམས་དང་། པི་བང་གསུམ་པ་ཅན་རྣམས་ཀྱང་རྩེ་དགའ་བར་བྱེད་དོ།