།དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཆུ་རབ་ཏུ་དང་བ་ཞེས་བྱ་བའི་རྒྱ་མཚོ་དཔག་ཚད་ལྔ་བརྒྱ་པ་ཡོད་དོ། །རྒྱ་མཚོ་དེའི་ནང་ན་འོད་ཟེར་གྱི་ཕྲེང་བ་ཅན་ཞེས་བྱ་བའི་རི་འཕང་དུ་དཔག་ཚད་བརྒྱ་པ། རྒྱར་ནི་དཔག་ཚད་སུམ་བརྒྱར་གྱུར་པ་ཡིན་ནོ། །རི་འདི་ནི་དངུལ་གྱི་རང་བཞིན་དུ་གྱུར་པ་ལ་རིན་པོ་ཆེ་རྣམས་ཐམས་ཅད་ཀྱིས་ཀྱང་མཛེས་པར་བྱས་པ་དང་། གསེར་གྱི་པད་མ་རྣམས་ཀྱིས་ཉེ་བར་མཛེས་པར་བྱས་པ་རྣམས་ནི་འདི་ལྟ་སྟེ། སྟོང་དུ་མཐོང་བ་ཞེས་བྱ་བའི་པད་མའི་རྫིང་བུ་ཟབས་སུ་ནི་དཔག་ཚད་བརྒྱ་ཡོད་པ་རིང་དུ་དཔག་ཚད་སུམ་ཅུར་གྱུར་པའོ། །དེ་ལ་སོང་ནས་ཕྲེང་བ་ཐོགས་པའི་ལྷ་དང་། ཡོལ་གོ་ཐོགས་པ་རྣམས་ཀྱང་དགའ་བར་བྱེད་དོ། །ལྷའི་ངང་པ་དང་། ཀཱ་རཎྜ་བདག་གིས་ཀྱང་མཛེས་པར་བྱས་པར་གྱུར་པ་ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། རབ་ཏུ་དང་བར་གྱུར་པའི་རྒྱ་མཚོ་ལས་ཀྱང་གཞན་དུ་གྱུར་པའི་རི་དང་རྒྱ་མཚོའི་རྒྱལ་པོའི་རིགས་སུ་གཏོགས་པ་རྣམས་སམ་གླིང་དུ་གྱུར་པ་དག་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རླབས་ཆེན་པོ་ཞེས་བྱ་བའི་རྒྱ་མཚོ་ཡོད་དེ་དཔག་ཚད་ནི་ལྔ་བརྒྱར་གྱུར་པ་ཡིན་ནོ། །དེ་ལ་སའི་འོག་གི་ཆུའི་ནང་དུ་སོང་བར་གྱུར་པའི་རླུང་རྣམས་སྟེང་དུ་གྱུར་པ་གང་ཡིན་པས་རྒྱ་མཚོ་དང་གླིང་དེ་དག་རྣམས་ཐམས་ཅད་ཀྱང་འཁྲུག་པར་བྱེད་དེ། སེམས་ཅན་རྣམས་ཀྱི་ལས་ཀྱི་དབང་གི་ཕྱོགས་ཀྱིས་ཡིན་ནོ། །རླབས་རྣམས་ནི་དཔག་ཚད་ཉིས་བརྒྱར་འབྱུང་ངོ་། །ལྷག་མ་རྣམས་ནི་འཛམ་བུའི་གླིང་གི་རྒྱ་མཚོའི་རླབས་ཞེས་གང་དག་རྗོད་པར་བྱེད་དོ། །དེ་ལ་ནི་ཉ་ཐམས་ཅད་རྟའི་གདོང་ཅན་དུ་གྱུར་པ་རྣམས་རབ་ཏུ་གནས་སོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། རླབས་ཆེན་པོའི་རྒྱ་མཚོའི་རི་ལས་རིའི་རིགས་སམ་རྒྱ་མཚོའི་རིགས་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རླབས་ཆེན་པོའི་རིའི་ཕ་རོལ་བྱང་ཕྱོགས་ངོས་ན་རི་ངོས་གཅིག་པ་ཞེས་བྱ་བ་དཔག་ཚད་བརྒྱ་ཕྲག་བཅུ་བཞིར་གྱུར་པའི་རི་གསེར་འབར་བ་དག་གིས་རྣམ་པར་བརྒྱན་པ་ཉི་མ་གཉིས་པ་དང་འདྲ་བར་གྱུར་པ་ཡིན་ནོ།