པི་བང་གསུམ་པ་ཅན་རྣམས་ཀྱང་རྩེ་དགའ་བར་བྱེད་དོ། །ཇི་ལྟར་ལས་རྣམས་ཀྱིས་བསྐྱེད་པར་གྱུར་པ་རྣམས་དམན་པ་དང་། བར་མ་དང་། ཁྱད་པར་དུ་འཕགས་པའི་ལས་རྣམས་ཀྱིས་མངོན་པར་སྤྲུལ་པ་སྟེ། རང་གི་ལས་ཀྱི་བགོ་སྐལ་ལ་སྤྱོད་པར་བྱེད་པའི་ལྷ་དེ་དག་རྣམས་ཡིད་བདེ་བའི་རི་དེ་དང་ཇི་སྲིད་དུ་རི་ཉི་མ་དང་མཚུངས་པར་གྱུར་པའི་ཤར་བ་ལ་ཡང་སྟེན་པར་བྱེད་དོ། །འཛམ་བུའི་གླིང་གི་རྩེ་མོར་གྱུར་པ་ཤིན་ཏུ་མཐོ་བ་ཡིན་ཏེ། དེ་ཙམ་ཞིག་འཛམ་བུའི་གླིང་གི་ཤར་ཕྱོགས་ན་ཡོད་པ་ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། ཇི་ལྟར་འཛམ་བུའི་གླིང་གི་ལྷོ་ཕྱོགས་ན་ཆུ་བོའི་རིགས་སུ་གྱུར་པའམ། རིའི་རིགས་སུ་གྱུར་པའམ། རྒྱ་མཚོ་ཡོངས་སུ་འཁྲུགས་པར་གྱུར་པའམ། ཅི་ཙམ་གཅིག་གིས་མཐར་ཐུག་པར་འགྱུར་བ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། དེ་ལ་འབིགས་བྱེད་ཅེས་བྱ་བའི་རིའི་ཉེ་འཁོར་དུ་དཔག་ཚད་བརྒྱད་ཡོད་པ་ལས། ཆུ་ཀླུང་ནར་མ་དཱ་ཞེས་བྱ་བ་ཞེང་དུ་དཔག་ཚད་ཕྱེད་དུ་གྱུར་པ་རིང་དུ་དཔག་ཚད་བརྒྱ་ཕྲག་གཉིས་ཡོད་པ་སྟེ། དེ་ལ་ཡང་དུག་ཆེན་པོ་དང་ལྡན་པའི་ཀླུ་རྣམས་རབ་ཏུ་གནས་ཤིང་ཆུ་སྲིན་བྱིས་པ་གསོད་དང་ཆུ་སྲིན་འཛིན་ཁྲིས་ཀྱང་གང་བར་གྱུར་པ་ཡིན་ནོ། །ཆུ་ཀླུང་དེ་ལས་གཉིས་པར་གྱུར་པ་ཆུ་ཀླུང་རླབས་ལྡན་ཞེས་བྱ་བ་ཡང་འབིགས་བྱེད་ལས་ཀུན་དུ་འབབ་པའོ། །ཆུ་ཀླུང་གསུམ་པ་ཤུགས་དང་ལྡན་པ་ཞེས་བྱ་བ་སྟེ། དགའ་བར་གྱུར་པ་ཤིང་རྣམས་ཀྱིས་ཡོངས་སུ་བསྐོར་བར་གྱུར་པ་ཡིན་ནོ། །ཆུ་ཀླུང་གཞན་ཡང་ནག་པོ་འཁྱིལ་པ་ཞེས་བྱ་བ་ཟབས་སུ་ནི་དཔག་ཚད་གསུམ་དུ་གྱུར་པ། རིང་དུ་གྱུར་པའི་དངོས་པོར་ནི་དཔག་ཚད་སུམ་བརྒྱ་པ་ཡིན་ཏེ། ཇི་སྲིད་དུ་རྒྱ་མཚོར་འབབ་པ་ཡིན་ནོ། །ཆུ་ཀླུང་ཡང་རོ་དྷཱ་ཆེན་པོ་ཞེས་བྱ་བ་ལ་དུག་ཆེན་པོ་དང་ལྡན་པའི་ཀླུས་གང་བར་གྱུར་པ་ཡིན་ནོ། །རི་མ་ལ་ཡ་ཞེས་བྱ་བ་ནི་ཙན་དན་གྱི་རང་བཞིན་དུ་གྱུར་པ་མཆོག་ཏུ་དགའ་བ་རིང་བར་གྱུར་པའི་ངོ་བོར་ནི་དཔག་ཚད་ལྔ་བརྒྱ་ཡིན་ལ་འཕང་དུ་གྱུར་པ་ནི་དཔག་ཚད་སུམ་བརྒྱ་ཡིན་ནོ།