།ལུས་ཅན་རྣམས་ཐམས་ཅད་ལ་ཡང་མྱ་ངན་ལས་འདས་པའི་མཐར་ཐུག་པའི་བདེ་བ་རྣམས་དང་ལྡན་པར་འགྱུར་རོ། །དམ་པའི་ཆོས་སྟོན་པར་བྱེད་པ་དང་ཉན་པའི་ཡོན་ཏན་གཞན་ཡང་ཡོད་དེ། གང་འགའ་ཞིག་ཆོས་སྒྲོགས་པ་ལ་དད་པ་དང་རབ་ཏུ་དད་པ་དང་ལྡན་པ་དབང་པོ་ཁ་ཕྱེ་བ་བློ་གཙང་བ་གཅིག་ཏུ་དཀོན་མཆོག་གསུམ་ལ་རབ་ཏུ་དང་བའི་བློས་ཁྱིམ་པའམ་རབ་ཏུ་བྱུང་བ་ཡང་རུང་སྟེ། དམ་པའི་ཆོས་ཉན་པར་འདོད་པས་ཁྱིམ་ནས་བྱུང་ནས་ལྷ་ཁང་ངམ་ཀུན་དགའ་ར་བར་འགྲོ་བར་བྱེད་པ་ན། དེ་གོམ་པ་འབོར་བ་དང་གོམ་པ་འབོར་བ་ལ་ཚངས་པའི་བསོད་ནམས་འབྱུང་བར་འགྱུར་རོ། །ཡང་གང་དག་ཆོས་དང་ཆོས་སྨྲ་བ་ལ་ནོར་དག་གིས་མཆོད་པར་བྱེད་པ་དེས་ནི་དངོས་སུ་སངས་རྒྱས་ལ་མཆོད་པར་འགྱུར་རོ། །དེ་ཇི་ལྟ་ཇི་ལྟར་མཆོད་པ་དེ་དག་ཡོངས་སུ་སྔོ་བར་བྱེད་པ་ན། དེ་ལྟ་དེ་ལྟར་ཡོངས་སུ་སྨིན་པར་འགྱུར་རོ། །དེ་ཇི་སྲིད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དུ་འགྱུར་བ་ཡིན་ནོ། །ཆོས་སྟོན་པ་པོ་མཆོད་པར་བྱེད་པ་གང་ཡིན་པ་སྟེ། དེ་ཅིའི་ཕྱིར་ཞེ་ན། ཆོས་བསྒྲགས་པ་ལས་སེམས་ལས་སུ་རུང་བར་འགྱུར་བའི་ཕྱིར་རོ། །དེ་ལས་སུ་རུང་བར་བྱས་པ་ལས་ཀྱང་ཐོག་མ་མེད་པའི་དུས་ནས་ཞུགས་པར་གྱུར་པའི་མུན་པ་རྣམས་འཇོམས་པར་བྱེད་པའི་ཕྱིར་རོ། །དེ་ལས་གཞན་འགའ་ཞིག་གིས་ཀྱང་སེམས་ལས་སུ་རུང་བར་བྱེད་པ་ནི་མ་ཡིན་ཏེ། ཆོས་སྨྲ་བ་རྣམས་ཇི་ལྟ་བ་བཞི་པོ་རྣམས་ཀྱི་ཡང་ཕན་པ་ལ་ལན་གྱིས་གླན་པར་སླ་བ་མ་ཡིན་ནོ། །བཞི་པོ་གང་དག་ཞེ་ན་འདི་ལྟ་སྟེ། མ་དང་ཕ་དང་སངས་རྒྱས་དང་ཆོས་སྟོན་པ་པོའོ། །དེ་དག་རྣམས་ལ་བྱིན་པ་ནི་གཞལ་དུ་མེད་པར་འགྱུར་རོ། །རྒྱུ་དང་འབྲས་བུ་ལ་ཀུན་ཏུ་རྨོངས་པ་རྣམས་ནི་ཆོས་བསྟན་པ་ཐོས་ནས་རྒྱུ་དང་འབྲས་བུ་ལ་དད་པ་དང་ལྡན་པར་འགྱུར་རོ། །ལོག་པའི་ལྟ་བ་ལ་སེམས་ཀུན་ཏུ་ཞུགས་པ་རྣམས་ནི་ཡང་དག་པའི་ལྟ་བ་དང་ལྡན་པར་འགྱུར་རོ། །སྲོག་གཅོད་པ་དང་མ་བྱིན་པར་ལེན་པ་དང་མི་ཚངས་པར་སྤྱོད་པ་ལ་དགའ་བ་རྣམས་ནི་ཆོས་བསྟན་པ་དག་ཐོས་ནས་དེ་དག་རྣམས་སྤོང་བར་འགྱུར་རོ།