གཞན་ལ་ཕན་པ་ལ་རབ་ཏུ་ཞུགས་པའི་བྱང་ཆུབ་སེམས་དཔའ་གཞན་ཡང་ཆོས་ཆེན་པོ་གཞན་ལྔ་པ་ལྷ་དང་མི་རྣམས་ཀྱི་དོན་དང་ཕན་པ་དང་བདེ་བར་འགྱུར་བའོ། །འདི་ཡང་གང་ཞེ་ན། འདི་ལྟ་སྟེ་ཆོས་སྟོན་པའོ། །ཆོས་སྟོན་པ་ནི་གང་གི་ཕྱིར་སྦྱིན་པ་ཐམས་ཅད་ཀྱི་ནང་ནས་བླ་ལྷག་པ་ཡིན་ཏེ། རྒོད་པ་འདི་དག་ཐམས་ཅད་འཇོམས་པར་བྱེད་པ་ནི། འདི་ལྟ་སྟེ་ཆོས་སྟོན་པར་བྱེད་པའོ། །ཆོས་སྟོན་པ་དང་ཉན་པ་དང་། ཆོས་སྟོན་པ་ལ་གུས་པ་དང་། ཆོས་སྟོན་པ་ལ་དང་བ་དང་། ཆོས་སྟོན་པ་ལ་གཅེས་པར་བྱེད་པ་དང་། ཆོས་སྟོན་པ་ལ་སྒྲུབ་པ་དང་། ཆོས་སྟོན་པ་རྒྱུན་མི་འཆད་པར་བྱེད་པ་དང་། དེ་བཞིན་གཤེགས་པས་ཀྱང་ཆོས་བླ་མར་མཛད་པ་ཡིན་ན་གཞན་ཉན་ཐོས་དང་རང་སངས་རྒྱས་རྣམས་ལ་ལྟ་སྨོས་ཀྱང་ཅི་དགོས། གང་གི་ཕྱིར་ཡོན་ཏན་བཅུ་གཅིག་དང་ལྡན་པར་གྱུར་པའི་ཆོས་སྟོན་པ་ནི་གཅེས་པར་འགྱུར་བ་ཡིན་ནོ། །ཡོན་ཏན་བཅུ་གཅིག་གང་ཞེ་ན། འདི་ལྟ་སྟེ་ཡུལ་དང་དུས་སུ་རིགས་པ་དང་གོ་བར་འགྱུར་བ་དང་། འགལ་བ་མེད་པ་དང་གསལ་བ་དང་རྙེད་པ་དང་བཀུར་སྟིའི་རྩ་བས་མ་ཡིན་པ་དང་། གདུལ་བྱའི་སེམས་ཀྱི་རྗེས་སུ་འཐུན་པར་ཆོས་སྟོན་པ་དང་། སྦྱིན་པའི་འབྲས་བུ་སླུ་བ་མེད་པར་སྟོན་པ་དང་། ཐེག་པ་ཆེན་པོ་དང་ཡང་དག་པར་ལྡན་པ་དང་འཁོར་བའི་ཉེས་དམིགས་ཀྱི་ཆོས་སྟོན་པ་དང་། མཐོ་རིས་སུ་འབབ་པར་འགྱུར་བའི་ཆོས་སྟོན་པ་དང་། ལས་དང་འབྲས་བུ་ཀུན་ཏུ་སྟོན་པར་བྱེད་པས་སྟོན་པ་སྟེ། དེ་ལྟར་རྣམ་པ་བཅུ་གཅིག་གིས་ཆོས་སྟོན་པར་བྱེད་པ་ནི་ཉན་པ་པོ་རྣམས་དང་རབ་ཏུ་སྨྲ་བར་བྱེད་པ་རྣམས་ལ་ཡང་གཅེས་པར་འགྱུར་བའི་ཆོས་རྣམས་ཡིན་ནོ། །དོན་དུ་བྱེད་པ་དང་ཡོན་ཏན་དུ་བྱེད་པ་དང་བདེ་བར་བྱེད་པ་དང་མྱ་ངན་ལས་འདས་པའི་མཐར་ཐུག་པར་བྱེད་པ་རྣམས་ཇི་ལྟ་ཇི་ལྟར་ཡོངས་སུ་སྔོ་བར་བྱེད་པ་དེ་ལྟ་དེ་ལྟར་འགྱུར་བ་ཡིན་ནོ། །ཆོས་སྨྲ་བ་ནི་གང་གི་ཕྱིར་རྣམ་པ་སྣ་ཚོགས་པའི་སྦྱིན་པ་འདི་དག་རྣམས་ཐམས་ཅད་ཀྱི་དྲུང་ན་ཡང་དམ་པའི་ཆོས་སྟོན་པའི་སྦྱིན་པ་ནི་ཤིན་ཏུ་ལྷག་པ་ཡིན་ནོ། །ལུས་ཅན་རྣམས་ཐམས་ཅད་ལ་ཡང་མྱ་ངན་ལས་འདས་པའི་མཐར་ཐུག་པའི་བདེ་བ་རྣམས་དང་ལྡན་པར་འགྱུར་རོ།