།སྲོག་གཅོད་པ་དང་མ་བྱིན་པར་ལེན་པ་དང་མི་ཚངས་པར་སྤྱོད་པ་ལ་དགའ་བ་རྣམས་ནི་ཆོས་བསྟན་པ་དག་ཐོས་ནས་དེ་དག་རྣམས་སྤོང་བར་འགྱུར་རོ། །དེ་དག་རྣམས་ལ་ཆོས་བསྟན་པ་དེས་ཀྱང་ལས་སུ་རུང་བར་བྱས་ནས། མྱ་ངན་ལས་འདས་པའི་མཐར་ཐུག་པར་འགྱུར་རོ། །དེ་ལ་རྒྱུ་དེ་དག་གིས་ན་ཆོས་སྟོན་པར་བྱེད་པ་པོས་ཕན་བཏགས་པ་ལ་ལན་གླན་པར་སླ་བ་མ་ཡིན་ནོ། །ལུས་སྦྱིན་པར་བྱེད་པ་པོའི་མ་དང་ཕ་དག་ལ་ཡང་ལན་གླན་པར་བྱ་མི་ནུས་ཏེ། གསོ་སྐྱེད་བྱེད་པ་པོ་དེ་དག་ཆོས་ལ་རབ་ཏུ་བཀོད་པར་གྱུར་པ་ནི་མ་གཏོགས་ཏེ། གང་གི་ཚེ་བུས་མ་དང་ཕ་དག་ཆོས་ལ་རབ་ཏུ་འགོད་པར་བྱེད་པར་གྱུར་པ་དེ་ལྟར་ན་ཅུང་ཟད་ཅིག་ཕན་བཏགས་པར་འགྱུར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཁམས་གསུམ་ན་ཆེས་ཁྱད་པར་དུ་འཕགས་པ་འཁོར་བ་ལས་ངེས་པར་ཐར་པའི་འཕགས་པ་ལ་ཡང་ལན་གླན་པར་བྱ་བར་མི་ནུས་པ་སྟེ། དེ་རྟོགས་ཤིང་བསྒྲུབ་པ་ལ་ཀུན་ཏུ་དགའ་བའི་རྒྱུས་ལན་གློན་པ་རྣམས་ནི་མ་གཏོགས་སོ། །དེ་བཞིན་གཤེགས་པ་ལ་ཡང་བྱ་བ་བྱས་པར་འགྱུར་ལ་བདག་ཉིད་ཀྱང་བདེ་ལེགས་ལ་སྦྱར་བར་འགྱུར་རོ། །དེ་ནས་དུས་དེའི་ཚེ་རྨ་བྱའི་མངའ་བདག་དེས་གཙུག་ལག་གི་ཚིགས་སུ་བཅད་པའི་དབྱངས་བརྗོད་པ། ཇི་ལྟར། བདེ་ལེགས་མྱ་ངན་འདས་འགྲོ་བའི། །གང་ཡང་ཆོས་ནི་སྟོན་བྱེད་པ། །དེ་ནི་འབྲེལ་བ་ཀུན་གཅོད་པའི། །ལུས་ཅན་རྣམས་ཀྱི་བླ་མ་ཡིན། །གཏི་མུག་རང་བཞིན་ཞགས་བཅད་ནས། །ཤིས་པ་གཞན་ནི་སྟོན་པར་བྱེད། །ཆོས་རྣམས་རབ་ཏུ་སྟོན་པ་དང་། །ལམ་སྟོན་པར་ནི་དེ་རབ་བརྗོད། །ཆོས་གང་གིས་ནི་མི་རྣམས་ཀྱང་། །སྲིད་པའི་རྒྱ་མཚོ་ལས་གྲོལ་བ། །དམ་ཆོས་མཆོག་རབ་ཡིན་པར་བརྗོད། །གང་ཡང་འཇིག་རྟེན་ཆོས་མ་ཡིན། །གང་ཡང་ལུས་ཅན་རྣམས་ལ་ནི། །ཞིང་ནི་བཞི་པོ་འདི་རྣམས་ཡིན། །ཐེག་པ་མཆོག་ཏུ་བླ་མེད་དང་། །དབང་པོ་ཚང་བ་དེ་རྙེད་པ། །དེ་ཡི་སྐྱེ་འདི་འབྲས་བཅས་པར། །ལམ་སྟོན་མཛད་པས་གསུངས་པ་ཡིན། །མི་གང་ཆོས་ལ་མི་དགའ་བ། །དེ་ནི་ཕྱི་ནས་འགྱོད་པར་འགྱུར། །རྟག་ཏུ་རྣམ་པར་ཆགས་པའི་ཡིད། །རྟག་ཏུ་འདོད་པ་རྗེས་སུ་ཚོལ།