བརྩོན་འགྲུས་དང་ལྡན་པ་དག་དང་། གཏོང་བ་དང་ལྡན་པ་དག་དང་། ཤེས་རབ་དང་ལྡན་པ་དག་ཏུ་གྱུར་ཅིག །དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་གང་སུ་དག་ཕྱོགས་བཅུའི་སངས་རྒྱས་ཀྱི་ཞིང་དག་ནས་ཡང་དག་པར་ཞུགས་པ་དེ་དག་ཀྱང་སངས་རྒྱས་ཀྱི་ཞིང་མི་མཇེད་འདིའི་ནང་དུ་ཆུད་པར་གྱུར་ཅིག །དེ་ཉིད་དུ་འཁོད་ནས་ཀྱང་རང་རང་གི་དགེ་བའི་ཕྱོགས་ལ་སྟོབས་ཇི་ལྟ་བ་དང་། ཇི་ལྟར་འཚམ་པ་བཞིན་དུ་འཁོད་ནས་བསམ་གཏན་བྱེད་པར་གྱུར་ཅིག་སྙམ་དགོངས་སོ། །བསམ་གཏན་བྱེད་པ་དེ་དག་ཁ་ཅིག་གི་ལུས་ལས་འོད་འདི་ལྟ་བུ། དཔེར་ན་འབྲུ་མར་གྱི་མར་མེ་ལྟ་བུ་བྱུང་ངོ་ཞེས་བྱ་བ་ནས་ཁ་ཅིག་གི་ལུས་ལས་འོད་འདི་ལྟ་བུ། དཔེར་ན་ཟླ་བ་དང་ཉི་མ་བྱེ་བ་ཕྲག་བརྒྱ་སྟོང་མང་པོའི་འོད་ལྟ་བུ་བྱུང་ངོ་ཞེས་བྱ་བའི་བར་དུ་སྦྱར་རོ། །དེ་ན་ད་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འདུས་པས་སངས་རྒྱས་ཀྱི་ཞིང་མི་མཇེད་དེ་སྣང་བ་ཆེན་པོས་ཁྱབ་པར་གྱུར་ཏོ། །ད་ལྟར་གང་དག་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ན་སྙོམས་པར་ཞུགས་པར་གྱུར་ལ། སྔོན་ཆད་དེར་ཕྱིན་པ་ནི་མ་ཡིན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི་དེ་ལྟར་ཏིང་ངེ་འཛིན་ལས་ལངས་ནས་སངས་རྒྱས་ཀྱི་ཞིང་མི་མཇེད་དེར་ཆས་སོ། །དེར་ཕྱིན་ནས་ཀྱང་དེ་བཞིན་གཤེགས་པ་དེ་མཐོང་བར་འགྱུར་རོ། །འདུས་པ་ཆེན་པོ་དེ་ཡང་མཐོང་བར་འགྱུར་རོ། །གཟུངས་སྔགས་ཆེན་པོ་དེ་ཡང་ཐོས་པར་འགྱུར་རོ། །སྐྱིལ་མོ་ཀྲུང་དུ་འདུག་ནས་རང་རང་གི་དགེ་བའི་ཕྱོགས་ཀྱི་བསམ་གཏན་རྣམ་པ་སྣ་ཚོགས་ཀྱིས་རྩེ་བར་འགྱུར་རོ། །རིགས་ཀྱི་བུ་ཁྱོད་ཀྱང་ད་ལྟར་ཏིང་ངེ་འཛིན་ལས་ལངས་ཀྱིས་རིགས་ཀྱི་བུ་ཁྱོད་ཀྱིས་ཀྱང་སངས་རྒྱས་ཀྱི་ཞིང་མི་མཇེད་དེར་འགྲོ་བར་བྱའོ། །རིགས་ཀྱི་བུ་སངས་རྒྱས་ཀྱི་ཞིང་མི་མཇེད་དེ་ན་ཡང་སེམས་ཅན་དག་མཆོག་ཏུ་ཚེ་ཐུང་བ་དག་ཡིན། ནད་མང་བ་དག་ཡིན། བློ་ཆུང་བ་དག་ཡིན། དགེ་བའི་རྩ་བ་ཀུན་ཏུ་སྤྱོད་པ་ཆུང་བ་དག་ཡིན། བསོད་ནམས་ཆུང་བ་དག་ཡིན། དགེ་བའི་རྩ་བའི་བྱ་བ་ཚོལ་བ་ཆུང་བ་དག་ཡིན། འཇིག་རྟེན་ཕ་རོལ་ལ་འཇིགས་པར་མི་ལྟ་བ་དག་ཡིན།