སངས་རྒྱས་ཀྱི་ཞིང་དེ་ན་སེམས་ཅན་ནི་ཕལ་ཆེར་ངན་སོང་གསུམ་དུ་འགྲོ་བ་དག་ཡིན་ནོ། །རིགས་ཀྱི་བུ་དག་དེར་རིག་སྔགས་ཀྱི་རྟེན་ལུང་སྟོན་པ་ཆེན་པོ་འདི་དེ་དག་གིས་ཐོས་པ་ཙམ་གྱི་མོད་ལ་དེ་དག་ངེས་པར་འབྱེད་པའི་ཆ་དང་འཐུན་པའི་དགེ་བ་དག་གི་ཀུན་ཏུ་སྦྱོར་བས་ངན་སོང་གི་ལམ་དག་ལས་སྒྲོལ་བར་བྱེད་དོ། །དེ་དག་སྔོན་བྱས་པའི་དད་པའི་དབང་པོ་ལ་གོམས་པས་དགའ་བར་འགྱུར་བ་ནས། ཤེས་རབ་ཀྱི་དབང་པོའི་བར་ལ་གོམས་པས་དགའ་བར་འགྱུར་བའི་བར་དང་། སྨོན་ལམ་དང་། འཁོར་བའི་སྐྱོན་དང་། ཚངས་པའི་གནས་པ་བསྒོམ་པ་གོམས་པ་ལ་དགའ་བར་འགྱུར་བ་ཡིན་ནོ། །ཐོས་པ་ཙམ་གྱིས་དེ་དག་གི་ཚེ་འཕེལ་བར་འགྱུར་རོ། །ནད་མེད་པ་འཕེལ་བ་དང་། ལོངས་སྤྱོད་དང་ཉེ་བར་སྤྱོད་པ་འཕེལ་བ་དང་། དགེ་བའི་བྱ་བ་འཕེལ་བ་དང་། དགེ་བའི་རྩ་བ་ཡང་དག་པར་སྒྲུབ་པ་འཕེལ་བ་དང་། ཤེས་རབ་འཕེལ་བ་དང་། བྱམས་པ་འཕེལ་བ་ནས། བཏང་སྙོམས་ཀྱི་བར་འཕེལ་བ་དང་། ལེགས་པར་བྱས་པའི་ལས་འཕེལ་བ་མཆོག་ཏུ་འགྱུར་རོ། །ཐོས་པ་ཙམ་གྱིས་དེ་དག་ཐམས་ཅད་ཡང་དག་པའི་ལྟ་བ་དང་ལྡན་པར་འགྱུར་རོ། །གང་དག་རིག་སྔགས་ཀྱི་རྟེན་ལུང་བསྟན་པ་ཆེན་པོ་འདི་བཀུར་སྟིར་བྱས་ཏེ་ཉན་པར་བྱེད་ཅིང་ཉིན་ཞག་བདུན་དུ་ལས་གཞན་མི་བྱེད་པར་སེམས་རྩེ་གཅིག་པས་ཆོས་འདི་དག་རྣམ་པར་སྒོམ་པར་བྱེད་པའི་སེམས་ཅན་དེ་དག་ནི་དགེ་བ་བཅུའི་ལས་ཀྱི་ལམ་དང་ལྡན་པ་དག་དང་། ལེགས་པར་སྤྱོད་པ་གསུམ་དང་ལྡན་པ་དག་དང་། དཀོན་མཆོག་གསུམ་ལ་སྐྱབས་དང་། སྨོན་ལམ་གྱི་ཤུགས་ལ་མངོན་པར་དགའ་བ་དག་དང་། ཆོས་ཀྱིས་གནས་པ་དག་དང་། དཀོན་མཆོག་གསུམ་གྱི་གདུང་གསལ་བར་བྱེད་པ་དག་ཏུ་འགྱུར་ཏེ། སེམས་ཅན་གང་དག་དེར་སྔོན་གྱི་སྐྱེ་གནས་མྱོང་བར་འགྱུར་བ་མཚམས་མེད་པ་བྱེད་པ་ནས་ལྟུང་བའི་རྩ་བ་བྱུང་བའི་བར་དག་ནི་མ་གཏོགས་སོ། །དེ་ནས་ཤི་འཕོས་ནས་ཀྱང་སངས་རྒྱས་ཀྱི་ཞིང་མི་མཇེད་འདིར་སྐྱེས་ཤིང་སྐྱེ་བར་འགྱུར་བ་དག་ཡིན་ཏེ། གང་དག་གི་སྡིག་པའི་ལས་རབ་ཏུ་ཆེན་པོའི་འབྲས་བུ་རྣམ་པར་སྨིན་པར་སྔོན་ཆད་ཡོངས་སུ་མ་སྤྱད་པའི་སེམས་ཅན་དེ་དག་གིས་རིག་སྔགས་ཀྱི་རྟེན་ལུང་སྟོན་པ་ཆེན་པོ་འདི་ཐོས་ན་ཡང་ཡོན་ཏན་དེ་ལྟ་བུ་དེ་དག་ཐོབ་པར་འགྱུར་རོ།