།དེ་གང་གི་ཚེ་འཕགས་པ་རྣམས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གོམས་པར་བྱེད་ན་དེ་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ། །བྱང་ཆུབ་སེམས་དཔའ་དང་། རང་རྒྱལ་བ་དང་། དགྲ་བཅོམ་པ་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ། །དབེན་པ་ལ་མངོན་པར་དགའ་བར་འགྱུར་རོ། །གང་དག་གིས་དེ་ལ་འཕགས་པའི་ཤེས་རབ་ཀྱི་དབང་པོ་ལེགས་པར་སྦྱང་བར་བྱས་པ་དང་། ཤིན་ཏུ་མཐར་ཕྱིན་པར་འགྱུར་བའི་ཆོས་དེ་ལྟ་བུ་དག་དེའི་སེམས་དང་སེམས་ལས་བྱུང་བ་དག་གི་ནང་དུ་སྐྱེ་བར་འགྱུར་རོ། །དེ་ཆོས་ཐམས་ཅད་ལ་ཞུགས་པར་འགྱུར་ཞིང་ཐེ་ཙོམ་མེད་པ་དང་ཐེ་ཙོམ་ལས་རྒལ་བར་འགྱུར་རོ། །ལྷ་དང་ལྷ་མ་ཡིན་དུ་བཅས་པའི་འཇིག་རྟེན་གྱིས་མི་རྫི་བར་འགྱུར་རོ། །དེ་ལྷའི་དབང་པོ་ཐམས་ཅད་དང་། གནོད་སྦྱིན་གྱི་དབང་པོ་དང་། ལྷ་མ་ཡིན་གྱི་དབང་པོ་དང་། ནམ་མཁའ་ལྡིང་གི་དབང་པོ་དང་། མི་འམ་ཅིའི་དབང་པོ་དང་། མིའི་དབང་པོ་ཐམས་ཅད་ཀྱིས་དད་པར་བྱ་བའི་འོས་སུ་གྱུར་པ་དང་། དྲན་པར་བྱ་བའི་འོས་སུ་གྱུར་པ་དང་། མངོན་པར་དགའ་བར་བྱ་བའི་འོས་སུ་གྱུར་པ་དང་། མཆོད་པ་བྱ་བའི་འོས་སུ་གྱུར་པ་དང་། ཕྱག་བྱ་བའི་འོས་སུ་གྱུར་པ་དང་། རབ་ཏུ་བསྲུང་བའི་འོས་སུ་གྱུར་པ་ཡིན་ནོ། །དེ་ཕྱི་མའི་དུས་ན་འཆི་བའི་ཚེ་ཕྱོགས་བཅུ་ཀུན་ཏུ་གོམས་པའི་སངས་རྒྱས་བཅོམ་ལྡན་འདས་དག་མཐོང་བར་འགྱུར་རོ། །སངས་རྒྱས་བཅོམ་ལྡན་འདས་དེ་དག་ཀྱང་དེ་ལ་ཕྱག་རྐྱོང་བར་མཛད་ཅིང་དེ་ལ་འདི་སྐད་དུ་སྐྱེས་བུ་དམ་པ་ངེད་ཀྱི་སངས་རྒྱས་ཀྱི་ཞིང་ཡོངས་སུ་དག་པར་ཚུར་ཤོག །དེར་གནས་པར་བྱོས་ཤིག །དེར་ངེད་ཀྱིས་རིགས་པས་ས་བཅུ་ལ་གཞག་པར་མཛད་དོ་ཞེས་ཀྱང་གསུང་བར་འགྱུར་རོ། །དེ་སངས་རྒྱས་མཐོང་བ་དང་། འཕགས་པའི་དགའ་བ་དང་། དད་པ་དེས་འཆི་བའི་དུས་བྱས་ནས་སངས་རྒྱས་ཀྱི་ཞིང་ཡོངས་སུ་དག་པ་སྟོང་པ་མ་ཡིན་པ་དེ་དག་ཏུ་སྐྱེ་བར་འགྱུར་རོ། །དེ་དེར་ཡང་ས་བཅུ་འཐོབ་ཅིང་རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །རིགས་ཀྱི་བུ་མི་ཟད་པའི་སྦུབས་ལུང་བསྟན་པ་ཆེན་པོ་འདི་ནི་དེ་ལྟར་ཕན་ཡོན་ཆེ་བ་ཡིན་ནོ།