འཕགས་པས་བྱིན་གྱིས་བརླབས་པ་དང་། ཆོས་ལ་དམིགས་པའི་བཟོད་པ་དེ་ལྟ་བུ་འཐོབ་པར་འགྱུར་ཏེ། དེས་ཀྱང་དེའི་ཡན་ལག་དང་ཉིང་ལག་དག་ཕྱུང་ཞིང་བཅད་ན་ཡང་སེམས་ཀྱི་སྐད་ཅིག་གཅིག་ཀྱང་ཁྲོ་བ་སྐྱེད་པར་མི་འགྱུར་ཞིང་ཁྲོ་བ་ཐམས་ཅད་སྤངས་པར་འགྱུར་རོ། །ལྷའི་དབང་པོ་ཐམས་ཅད་ནས་མིའི་དབང་པོ་ཐམས་ཅད་ཀྱི་བར་གྱིས་དད་པར་བྱ་བའི་འོས་སུ་གྱུར་པ་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་བར་དུ་འགྱུར་རོ། །དེ་བཞིན་དུ་སྐྱེས་བུ་དེ་མི་ཟད་པའི་སྦུབས་ལུང་བསྟན་པ་འདི་ཐོས་པ་ཙམ་གྱི་མོད་ལ་གལ་ཏེ་བསམ་གཏན་གྱི་ཕ་རོལ་ཏུ་ཕྱིན་པ་ལ་གོམས་པར་བྱེད་ན་མྱུར་དུ་འཕགས་པས་བྱིན་གྱིས་བརླབས་པ་དང་། ཆོས་ལ་དམིགས་པའི་བསམ་གཏན་དང་། རྣམ་པར་ཐར་པ་དང་། གཟུགས་མེད་པའི་སྙོམས་པར་འཇུག་པ་དང་། ཏིང་ངེ་འཛིན་གྱི་སྒོ་དང་། གཟུངས་ཀྱི་སྒོ་དང་། བཟོད་པའི་སྒོ་དེ་ལྟ་བུ་བྱེ་བ་ཕྲག་བརྒྱ་སྟོང་ཐོབ་པར་འགྱུར་རོ། །དུས་ཐམས་ཅད་དུ་སངས་རྒྱས་ཐམས་ཅད་ཀྱིས་དགོངས་པར་འགྱུར་རོ། །དེ་ལྷའི་དབང་པོ་ཐམས་ཅད་ནས་མིའི་དབང་པོ་ཐམས་ཅད་ཀྱི་བར་གྱིས་བསམས་པར་འགྱུར་ཞིང་དད་པར་བྱ་བའི་འོས་སུ་གྱུར་པ་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་བར་དུ་འགྱུར་རོ། །རིགས་ཀྱི་བུ་གང་ལ་ལ་མི་ཟད་པའི་སྦུབས་ལུང་བསྟན་པ་ཞེས་བྱ་བ་འདི་ལན་ཅིག་ཙམ་སེམས་རྩེ་གཅིག་པས་ཉན་པར་བྱེད་ན་དེ་ལ་ལྷག་པར་ཡང་དགའ་བ་དང་། དད་པ་དང་། ཉེ་བར་རྟོག་པ་ཀུན་ཏུ་སྐྱེད་པར་བྱེད་དོ། །དེ་ལས་ཀྱི་སྒྲིབ་པ་དང་། སེམས་ཀྱི་སྒྲིབ་པ་དང་། ཆོས་ཀྱི་སྒྲིབ་པ་དང་། ཉོན་མོངས་པའི་སྒྲིབ་པ་དགེ་བའི་རྩ་བ་ཐམས་ཅད་ཀྱི་བགེགས་བྱེད་པ། འཕངས་པ། སོ་སོར་མ་རྟེན་པ། མ་ཟད་པ། མ་སྦྱངས་པ་གང་གཱའི་ཀླུང་གི་བྱེ་མ་སྙེད་ཀྱང་མ་ལུས་པར་ཟད་པར་འགྱུར་ཏེ། དེ་ལ་འབྲས་བུ་འགྲུབ་པར་མི་འགྱུར་རོ། །མཚམས་མེད་པ་བྱེད་པ་དང་། དམ་པའི་ཆོས་སྤོང་བར་བྱེད་པ་དང་། འཕགས་པ་ལ་སྐུར་པ་འདེབས་པར་བྱེད་པའི་ལས་རྣམས་ནི་མ་གཏོགས་སོ། །དེ་གང་གི་ཚེ་འཕགས་པ་རྣམས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གོམས་པར་བྱེད་ན་དེ་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ།