བདེན་པ་དང་རྗེས་སུ་འཐུན་པའི་བཟོད་པ་དེ་ཟུང་ཤིག །འདོད་པ་གློག་གི་འོད་ལྟ་བུ་སེལ་བར་བྱེད་པ་འདི་གཉིས་དང་། ཆོས་ཀྱི་སྒོ་མོ་དེར་ཁྱེར་ལ་ངའི་བཀས་དེ་བཞིན་གཤེགས་པ་ཤཱཀྱ་ཐུབ་པ་ལ་གནོད་པ་ཆུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་ཀྱང་ཞུས་ལ། དེ་ལ་འདི་སྐད་དུ་ཁྱོད་ལ་དེ་བཞིན་གཤེགས་པ་ཙམ་པ་ཀའི་མདོག་ཞུ་བར་མཛད་ལགས་ཏེ། བཙུན་པ་བཅོམ་ལྡན་འདས་ཅི་བསྙུང་བ་མི་མངའ་ལགས་སམ། གནོད་པ་ཆུང་ངམ། ཁྱོད་ཀྱི་འཁོར་གུས་པར་ཉན་ལགས་སམ། ཆོས་འཚལ་བ་ལགས་སམ། ཆོས་ཀྱིས་གནས་པ་ལགས་སམ། ཆོས་ལ་བརྩོན་པ་ལགས་སམ། སངས་རྒྱས་ཀྱི་ཡུལ་ཐམས་ཅད་ན་ཉོན་མོངས་པ་སེལ་བར་བགྱིད་པ་དེ་དག་དང་། ཆོས་ཀྱི་སྒོ་ལ་དེ་བཞིན་གཤེགས་པ་དེས་དད་པ་སྩལ་ཏེ། དེ་ནས་འདོད་པ་གློག་གི་འོད་ལྟ་བུ་སེལ་བར་བགྱིད་པ། ཆོས་ཀྱི་སྒོའི་གཟུངས་སྔགས་མཐུ་སྟོབས་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཀུན་ཏུ་ཟད་པར་བགྱིད་པ། གཟུགས་ཀྱི་འདོད་ཆགས་ཐམས་ཅད་ཟད་པར་བགྱིད་པ་ནས། མ་རིག་པའི་མུན་པའི་ཕུང་པོ་ཐམས་ཅད་རབ་ཏུ་འཇོམས་པའི་བར་བགྱིད་པ། སྡུག་བསྔལ་གྱི་ཁུར་འདོར་བར་བགྱིད་པ་བསྐུར་ལགས་སོ་ཞེས་གསོལ་ཅིག། །།འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་གསུམ་པ། དེས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་དེ་བཞིན་འཚལ་ལགས་སོ། །ཡང་དེའི་ཚེ་བྱང་ཆུབ་སེམས་དཔའ་བརྒྱད་ཁྲིས་ཚིག་འཐུན་པར་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་བལྟ་བ་དང་། ཕྱག་བགྱི་བ་དང་། མཆོད་པ་དང་། བསྙེན་བཀུར་བགྱི་བ་དང་། འདུས་པ་ཆེན་པོ་དེ་ལ་ཡང་བལྟ་བའི་སླད་དུ། བདག་ཅག་ཀྱང་མཆི་བར་འཚལ་ཏེ། དེ་བཞིན་གཤེགས་པ་དེ་ལས་འདུས་པ་ཆེན་པོ་སངས་རྒྱས་ཀྱི་ཡུལ་ཐམས་ཅད་ན་ཉོན་མོངས་པ་སེལ་བར་བགྱིད་པའི་ཆོས་ཀྱི་སྒོ་བདག་ཅག་གིས་མཉན་པར་བགྱིད་ལགས་སོ། །དེ་ནས་དེ་བཞིན་གཤེགས་པ་ཙམ་པ་ཀའི་མདོག་དེས་དེ་དག་ལ་འདི་སྐད་ཅེས་བཀའ་སྩལ་ཏོ།