ངེས་པར་འབྱུང་བའི་ཕ་རོལ་དུ་འགྲོ་བའི་གཟུངས་སྔགས་འདི་བཟུང་ནས་མི་མཇེད་ཀྱི་འཇིག་རྟེན་གྱི་ཁམས་སུ་སོང་ཤིག །ཁྱོད་ཀྱིས་འདོད་པའི་བདུད་ཀྱི་མཆིལ་པ་ཐམས་ཅད་དང་། ཕ་རོལ་གནོན་པ་དང་། ཡུལ་ལ་བརྩོན་པའི་ཕ་རོལ་གནོན་པས་ཕ་རོལ་གནོན་པ་བྱེད་དུ་ཟིན་ཀྱང་། སུས་ཀྱང་ཁྱོད་ཀྱི་ལུས་སམ་སེམས་ལ་འདོད་པའི་ཀུན་ཏུ་སྦྱོར་བ་དག་གིས་གོས་པར་བྱེད་མི་ནུས་ན་གཟུངས་སྔགས་འདི་ཇི་ལྟར་ཐོས་པ་བཞིན་དུ་སངས་རྒྱས་ཀྱི་ཞིང་མི་མཇེད་དུ་སོང་ནས་ཀྱང་སྦྱོར་བ་བྱོས་ཤིག །དེར་གལ་ཏེ་བདུད་བྱེ་བ་ཕྲག་བརྒྱ་གསང་སྔགས་ཀྱི་སྦྱོར་བ་ཐམས་ཅད་དང་། སྨན་གྱི་སྦྱོར་བ་ཐམས་ཅད་དང་། ཆོས་ཀྱི་སྦྱོར་བ་ཐམས་ཅད་དང་། ལྷ་དང་། མི་གཞན་དག་གིས་འདོད་པའི་དྲི་ང་བ་དག་གིས་གོས་པར་བྱ་བ་ལྟ་ཅི་སྨོས། དེ་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོ་ལ་སོགས་པ་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དང་། ལྷ་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དང་། ལྷ་དང་། མི་རྣམས་ངོ་མཚར་རྙེད་ཅིང་རྨད་དུ་བྱུང་བ་རྙེད་པར་གྱུར་ནས་འདི་སྐད་ཅེས་གསོལ་ཏོ། །སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་གཟིགས་པ་དང་། མངའ་བརྙེས་པ་ནི་ངོ་མཚར་ལགས་སོ། །མཆོག་ཏུ་ངོ་མཚར་ལགས་ཏེ། འདོད་པས་ཀུན་ཏུ་གདུང་བ་རྣམ་པར་འཇིག་པར་བགྱིད་པའི་གཟུངས་སྔགས་འདི་ནི་བདག་ཅག་གིས་སྔོན་མ་ཐོས་ལགས་སོ། །དེ་ནས་འཁོར་དེར་ལྷའི་བུ་མོ་དང་། མིའི་བུ་མོ་བརྒྱད་ཁྲི་བཞི་སྟོང་གིས་བསྙེན་བཀུར་བྱས་ནས་གཟུངས་སྔགས་འདི་ཐོས་པར་གྱུར་ཏོ། །ཐོས་མ་ཐག་ཏུ་དེ་དག་གི་མོ་མཚན་ནུབ་པར་གྱུར་ཅིང་། ཕོ་མཚན་བྱུང་བར་གྱུར་ཏེ། ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དེ་ནས་དེ་བཞིན་གཤེགས་པ་ཙམ་པ་ཀའི་མདོག་གིས་མེ་ཏོག་ཙམ་པ་ཀའི་ཕྲེང་བ་བཞེས་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །ཀྱེ་རིགས་ཀྱི་བུ་མེ་ཏོག་ཙམ་པ་ཀའི་ཕྲེང་བ་འདི་དང་། གཟུངས་སྔགས་ཉི་མ་སྣང་བའི་པད་མ་ཞེས་བྱ་བ་འདི་དང་། བདེན་པ་དང་རྗེས་སུ་འཐུན་པའི་བཟོད་པ་དེ་ཟུང་ཤིག