།བྱང་ཆུབ་སེམས་དཔའ་དེ་དག་ཀྱང་ང་ཁོ་ན་དང་ཐབས་ཅིག་ཏུ་དེ་ཉིད་དུ་འདོང་བར་འདོད་དེ། དེར་དེ་དག་འདོད་པའི་འདོད་ཆགས་ཀྱི་རྒྱུས་སླུ་བར་གྱུར་ན་མི་རུང་ཞིང་དེར་ངའི་སྐྱེས་བུ་དམ་པ་མ་ཡིན་པའི་བྱེད་པ་འགྲོ་བར་གྱུར་ན་མི་རུང་བས། དེ་དག་གི་དོན་དུ་ངས་བཤད་དོ། །ཡང་དེ་བཞིན་གཤེགས་པ་ཙམ་པ་ཀའི་མདོག་གིས་བྱང་ཆུབ་སེམས་དཔའ་ཉི་མའི་ཤུགས་ཀྱི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་མ་འཇིགས་ཤིག་མ་འཇིགས་ཤིག །སྐྱེས་བུ་དམ་པ་ཁྱེད་ལ་འདི་ལྟ་སྟེ། གཟུངས་སྔགས་གང་གིས་སྲིད་པ་གསུམ་གྱི་བཙོན་རར་ཐམས་ཅད་དུ་མངོན་པར་མི་དགའ་བའི་འདུ་ཤེས་ཅན་དང་། མཚན་མ་མེད་པའི་ཏིང་ངེ་འཛིན་རྣམ་པར་ཐར་པའི་སྒོ་ལ་རེག་ནས་རྫོགས་པར་བྱས་ཏེ་གནས་པ་དང་། མི་གཡོ་བའི་ཏིང་ངེ་འཛིན་ལ་འཇུག་པ་དང་། མགོ་མཉམ་དུ་ཡོངས་སུ་མྱ་ངན་ལས་འདས་པར་འགྱུར་བའི་གཟུངས་སྔགས་ཉི་མ་སྣང་བའི་པད་མ་ཞེས་བྱ་བ་ལུས་ཀྱི་ཚོར་བ་ཐམས་ཅད་སྒྲུབ་པར་བྱེད་པ། ལུས་ཀྱི་འདུ་ཤེས་ཐམས་ཅད་སྒྲུབ་པར་བྱེད་པ། དུལ་བའི་ས་སྒྲུབ་པར་བྱེད་པ། རྣམ་པར་གྲོལ་བ་སྒྲུབ་པར་བྱེད་པ། སྲིད་པའི་རྒྱ་མཚོ་ཡོངས་སུ་གཅོད་པ་སྒྲུབ་པར་བྱེད་པ། དཀོན་མཆོག་གསུམ་གྱི་གདུང་གི་གགས་ལྡོག་པ་སྒྲུབ་པར་བྱེད་པ། བྱམས་པ་ཆེན་པོ་སྒྲུབ་པར་བྱེད་པ། སྙིང་རྗེ་ཆེན་པོ་སྒྲུབ་པར་བྱེད་པ། ཤེས་རབ་རྣམ་པར་གྲོལ་བ་ཐམས་ཅད་སྒྲུབ་པར་བྱེད་པ། བདུད་བཞི་དང་ཕས་ཀྱི་རྒོལ་བ་ཐམས་ཅད་འདུལ་བ་སྒྲུབ་པར་བྱེད་པ། ཟད་པ་ཤེས་པ་དང་མི་སྐྱེ་བ་ཤེས་པ་སྒྲུབ་པར་བྱེད་པ། ལོངས་སྤྱོད་དང་། ཚེའི་འདུ་བྱེད་ཐམས་ཅད་དང་། ཞི་བ་དང་། གཏན་དུ་ཡོངས་སུ་མྱ་ངན་ལས་འདས་པ་སྒྲུབ་པར་བྱེད་པ་ངས་སྦྱིན་པར་མཛད་དོ། །རིགས་ཀྱི་བུ་གང་ལ་ལ་ཉི་མ་སྣང་བའི་གཟུངས་སྔགས་འདི་སེམས་རྩེ་གཅིག་པས་ཉན་པར་བྱེད་ན། འདོད་ཆགས་ལ་སོགས་པའི་ཉོན་མོངས་པ་ཐམས་ཅད་སྲབ་མོར་བྱེད་དོ། །འཆི་བའི་དུས་བྱས་ནས་ཀྱང་ལྷ་རྣམས་ཀྱི་ནང་དུ་ཚེ་རབས་བདུན་འཁོར་བར་བྱེད་ཅིང་ཚེ་རབས་དྲན་པར་ཡང་འགྱུར་ལ། དེར་འདོད་པ་རྣམས་ཀྱིས་ཀྱང་གོས་པར་མི་འགྱུར་རོ།