གཟུགས་ཀྱི་འདོད་ཆགས་ཐམས་ཅད་ཀུན་ཏུ་ཟད་པར་བགྱིད་པ། གཟུགས་མེད་པའི་འདོད་ཆགས་ཀུན་ཏུ་ཟད་པར་བགྱིད་པ་ནས། མ་རིག་པའི་མུན་པའི་ཕུང་པོ་ཐམས་ཅད་རབ་ཏུ་འཇོམས་པའི་བར་བགྱིད་པ་དང་། སྡུག་བསྔལ་གྱི་ཕུང་པོའི་ཁུར་འདོར་བར་བགྱིད་པ་འདི་བསྐུར་ལགས་སོ་ཞེས་གསོལ་ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོ་དེས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདེན་པ་དང་རྗེས་སུ་འཐུན་པའི་བཟོད་པ་ཡོན་ཏན་དང་། ཕན་ཡོན་དང་བཅས་པ་བདག་གིས་བཟུང་ལགས་ན། བཙུན་པ་བཅོམ་ལྡན་འདས་སངས་རྒྱས་ཀྱི་ཞིང་མི་མཇེད་དུ་མཆི་བ་ལ་འཇིགས་པ་འབའ་ཞིག་མཆིས་ལགས་སོ། །དེ་ཅིའི་སླད་དུ་ཞེ་ན། ད་ལྟར་བཅོམ་ལྡན་འདས་ལས་བདག་གིས་མངོན་དུ་ཐོས་ཤིང་མངོན་དུ་བཟུང་ལགས་ཏེ། འདི་ལྟར་སངས་རྒྱས་ཀྱི་ཞིང་མི་མཇེད་དེ་ན་སེམས་ཅན་རྣམས་འདོད་ཆགས་ཀྱི་ཤས་ཆེ་བ་དམུས་ལོང་དང་འདྲ་བ་དག་ལགས་ཏེ། དེ་ན་བུད་མེད་ཀྱང་གཟུགས་མི་སྡུག་པ་དང་། ཚུལ་དུ་མི་ཤིས་པ་དང་། མཆོག་ཏུ་གཟུགས་ཀྱི་རྒྱགས་པས་དྲེགས་པ་ནས་སེམས་ཅན་རྣམས་བསམ་གཏན་ལ་རབ་ཏུ་སྤྱོད་པ་བགྱིས་པ། མངོན་པར་ཤེས་པས་རྣམ་པར་རྩེ་བ། སྐྱེས་བུ་དམ་པ་མཁས་པ་ཆེན་པོ་དག་ཀྱང་ལྷག་པར་བུད་མེད་ཀྱི་དབང་དུ་འགྱུར་བ་ལགས་སོ། །བུད་མེད་ཀྱི་ཉེས་པས་དགེ་བའི་རྩ་བ་ཐམས་ཅད་ལས་ཡོངས་སུ་ཉམས་པ་དག་དང་། ངན་སོང་བ་དག་དང་། སེམས་ཅན་དམྱལ་བའི་བར་འབྱུང་ཞིང་འབྱུང་བར་འགྱུར་བའི་སླད་དུའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཙམ་པ་ཀའི་མདོག་དེས་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ནི་བདག་གི་དོན་དུ་སྨྲ་བ་མ་ཡིན་ཞིང་བདག་ལ་ཕན་པའི་ཕྱིར་ཞུགས་པ་མ་ཡིན་ནོ། །རིགས་ཀྱི་བུ་ཁྱོད་ནི་སེམས་ཅན་ཐམས་ཅད་ཀྱི་དོན་དུ་སྨྲ་བ་ཡིན་ཞིང་ཁྱོད་ནི་སེམས་ཅན་ཐམས་ཅད་ལ་ཕན་པའི་ཕྱིར་ཞུགས་པ་ཡིན་ནོ། །རིགས་ཀྱི་བུ་སངས་རྒྱས་ཀྱི་ཞིང་མི་མཇེད་ན་དེ་བཞིན་གཤེགས་པ་ཤཱཀྱ་ཐུབ་པའི་འཁོར་ན་དགེ་བསྙེན་དྲི་མ་མེད་པར་གྲགས་པ་ཞེས་བྱ་བ་སྣང་བ་གང་ཡིན་པ་དེ་ཡང་སུ་ཡིན།