Degé Kangyur volume 66, F.219.b

ལ་སོགས་པའི་བདུད་ཀྱི་བུ་མོ་ལྔ་བརྒྱ་པོ་དེ་དག་ཀྱང་སངས་རྒྱས་ཀྱི་མཐུས་བདུད་ཀྱི་གནས་སུ་འཁོད་བཞིན་སེམས་ཡོངས་སུ་སྦྱང་བའི་སངས་རྒྱས་རྗེས་སུ་དྲན་པའི་ལུང་བསྟན་པ་འདི་ཐམས་ཅད་ཐོས་སོ། །​ཐོས་ནས་ཀྱང་བུད་མེད་ཀྱི་དངོས་པོ་མི་སྣང་བར་གྱུར་ཏེ་སྐྱེས་པ་ཉིད་ཐོབ་བོ། གང་དག་སྔོན་ཡོངས་སུ་སྦྱང་བ་བྱས་པ་དེ་དག་ཐམས་ཅད་སངས་རྒྱས་རྗེས་སུ་དྲན་པའི་ཏིང་ངེ་འཛིན་དང་ལྡན་པར་གྱུར་ཏོ། །​ཇི་སྐད་བཤད་པ་བཞིན་དུ་ཡོན་ཏན་དེ་དག་དང་ལྡན་པར་གྱུར་ཏོ། །​དེ་དག་ཐམས་ཅད་ཚངས་པ་ཆེན་པོའི་ཆ་བྱད་དུ་བདག་ཉིད་མངོན་པར་སྤྲུལ་ནས་ཚངས་པ་ཆེན་པོ་རེ་རེ་ཡང་བྱེ་བ་བརྒྱ་སྟོང་ཕྲག་མང་པོས་ཡོངས་སུ་བསྐོར་ཅིང་བྱེ་བ་བརྒྱ་སྟོང་ཕྲག་མང་པོས་མདུན་གྱིས་བལྟས་ཏེ། སིལ་སྙན་དང་། ཕེག་རྡོབ་པ་བྱེ་བ་བརྒྱ་ཕྲག་མང་པོས་ཡོངས་སུ་བསྐོར་ནས་དེ་དག་བདུད་ཀྱི་གནས་བསམ་གྱིས་མི་ཁྱབ་པ་བཀོད་པ་ནས་བཅོམ་ལྡན་འདས་ཀྱི་ཐད་དུ་བབས་ཏེ། བཅོམ་ལྡན་འདས་དེ་ལ་ལྷ་རྫས་ཀྱི་མེ་ཏོག་དང་། ཕྲེང་བ་དང་། སྤོས་དང་། བྱུག་པ་དག་དང་། གདུགས་དང་། རྒྱལ་མཚན་དང་། བ་དན་དག་དང་། རིན་པོ་ཆེའི་རས་བཅོས་བུ་དང་། ཆོས་གོས་སྣ་ཚོགས་གཏོར་ཅིང་མངོན་པར་གཏོར་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །​འཕགས་པ་འདུས་པ་ཆེན་པོ་ཉི་མའི་སྙིང་པོའི་ལེའུ་བཅུ་གཅིག་པ་ལས་སངས་རྒྱས་རྗེས་སུ་དྲན་པའི་ལེའུ་སྟེ་དགུ་པ་རྫོགས་སོ།​། །​།དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྐར་མ་ལ་དགའ་བ་ལ་འདི་སྐད་ཅེས་བཀའ་སྩལ་ཏོ། །​རིགས་ཀྱི་བུ་ལག་འགྲོའི་ཚོགས་ཐམས་ཅད་ཀྱི་ཞལ་ཏ་བྱོས་ཤིག་ཅེས་བཅོམ་ལྡན་འདས་ཀྱིས་བཀའ་སྩལ་པ་དང་། ཉོན་མོངས་པ་མེད་པའི་སེམས་ཀྱིས་གསོལ་པ། བཅོམ་ལྡན་འདས་ཀྱིས་དུས་ལགས་ཀྱིས་གཤེགས་ཤིག །​བཅོམ་ལྡན་འདས་གང་ཁྱོད་ཀྱིས་མཛད་པ་མཛོད་ཅིག །​བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་



The English translation of this folio by 84000 Translating the words of the Buddha can be found at:
https://read.84000.co/translation/toh257.html?part=UT22084-066-015-915#UT22084-066-015-915