།བཞི་པ་རབ་ཀྱི་མཐའ་གནས་ཡིད་ལ་བྱེད་པ་སངས་རྒྱས་རྗེས་སུ་དྲན་པ་སྒོམ་པ་དེ་ལྟ་བུ་དེ་ནི་དེ་ལྟར་དོན་ཆེ་བ་ཡིན་ནོ། །སུ་ལ་ལ་བཞི་པ་རབ་ཀྱི་མཐའ་གནས་ཡིད་ལ་བྱེད་པ་སངས་རྒྱས་རྗེས་སུ་དྲན་པ་འདི་དེ་ལྟར་ཐོས་པ་ཙམ་རྣ་ལམ་དུ་ཐོས་ན། དེ་ལ་མིའམ་མི་མ་ཡིན་པའི་བར་དེ་ཉེ་བར་བརྟགས་ནས་དད་པ་དང་། དགའ་བ་དང་། མཆོག་ཏུ་དགའ་བ་སྐྱེའོ། །དེ་བཙོན་རའི་འཆིང་བ་དམ་པོ་ལས་ཡོངས་སུ་ཐར་བར་འགྱུར་རོ། །གང་སུ་དག་སྡུག་བསྔལ་བར་གྱུར་པའི་སེམས་ཅན་ཐམས་ཅད་ཀྱང་སྡུག་བསྔལ་དག་ལས་ཡོངས་སུ་ཐར་བར་འགྱུར་རོ། །ལོངས་སྤྱོད་ཀྱི་སྡུག་བསྔལ་དང་། ཆད་པ་དང་། བརྡེག་པ་དང་། གཡང་ས་དང་། མེ་དང་། ཆུ་དང་། དུག་དང་། དགྲ་ཐམས་ཅད་དང་། འབྱུང་པོ་ཐམས་ཅད་དང་། ནད་ཀྱི་འཇིགས་པ་དང་། གནས་ཀྱི་འཇིགས་པ་དང་། རྒྱལ་པོའི་འཇིགས་པ་དང་ཞེས་བྱ་བ་ནས་བྲན་གྱི་འཇིགས་པ་ཞེས་བྱ་བའི་བར་དང་། ངན་འགྲོར་འགྲོ་བའི་འཇིགས་པ་ཞེས་བྱ་བའི་བར་ལས་ཡོངས་སུ་ཐར་བར་འགྱུར་རོ། །བདེ་འགྲོར་འགྲོ་བའི་རྒྱུར་འགྱུར་རོ། །སུ་སངས་རྒྱས་རྗེས་སུ་དྲན་པ་དེ་ལྟ་བུ་ཐོས་པ་ཙམ་རྣ་ལམ་དུ་གྲགས་ན་དེ་ལ་ཉེ་བར་བརྟགས་ནས་དད་པ་སྐྱེས་ཏེ། དེ་ལྟར་དོན་ཆེ་ཞིང་ཕན་ཡོན་ཆེ་བ་ཡིན་ན་སུ་ཇི་ལྟར་བསྟན་པ་བཞིན་དེ་བཞིན་དུ་བསྒོམ་པ་ལྟ་སྨོས་ཀྱང་ཅི་དགོས། ཆོས་ཀྱི་རྣམ་གྲངས་འདི་བཤད་པ་ན་སྔོན་ཡོངས་སུ་སྦྱང་བ་བྱས་པ་དཀྲིགས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་དྲུག་ནི་སངས་རྒྱས་རྗེས་སུ་དྲན་པའི་ཏིང་ངེ་འཛིན་དེ་ཐོབ་པར་གྱུར་ཏོ། །ཇི་ལྟར་སྔར་བཤད་པ་བཞིན་དུ་ཡོན་ཏན་དེ་དག་དང་ཡང་ལྡན་པར་གྱུར་ཏོ། །དེའི་ཚེ་སྲོག་ཆགས་ཁྲག་ཁྲིག་ཕྲག་བརྒྱད་ཅུ་རྩ་བཞི་ནི་སྡུག་བསྔལ་ལ་ཆོས་ཤེས་པའི་བཟོད་པ་ཐོབ་པར་གྱུར་ཏོ། །དེའི་ཚེ་སེམས་ཅན་དཔག་ཡས་པ་ཁ་ཅིག་ནི་མཐར་གྱིས་གནས་པའི་སྙོམས་པར་འཇུག་པའི་རྣལ་འབྱོར་དང་འབྲས་བུ་དང་པོ་ལ་གནས་པར་གྱུར་ཏོ། །ཁ་ཅིག་ནི་དགྲ་བཅོམ་པ་ཉིད་ཀྱི་བར་ཐོབ་པར་གྱུར་ཏོ། །དེའི་ཚེ་སེམས་ཅན་དཔག་ཡས་པ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྔོན་མ་བསྐྱེད་པའི་སེམས་བསྐྱེད་དོ། །མུན་བྲལ་མ་ལ་སོགས་པའི་བདུད་ཀྱི་བུ་མོ་ལྔ་བརྒྱ་པོ་དེ་དག་ཀྱང་སངས་རྒྱས་ཀྱི་མཐུས་བདུད་ཀྱི་གནས་སུ་འཁོད་བཞིན་སེམས་ཡོངས་སུ་སྦྱང་བའི་སངས་རྒྱས་རྗེས་སུ་དྲན་པའི་ལུང་བསྟན་པ་འདི་ཐམས་ཅད་ཐོས་སོ།