Degé Kangyur volume 66, F.215.a

།།བཅོམ་ལྡན་འདས་ལ་ཀླུ་ཐམས་ཅད་སྐྱབས་སུ་ཉེ་བར་གནས་པ་བདུད་སྡིག་ཅན་གྱིས་ཐོས་ཏེ། ཤས་ཆེར་འཁྲུགས་ཤིང་སྐྲག་ལ་རྒྱ་ཤུག་གི་འདབ་མ་བཞིན་དུ་ལུས་རབ་ཏུ་འདར་ཞིང་ལུས་རྔུལ་ནས་ལག་པ་གཉིས་བསྒྲེང་སྟེ་འདི་སྐད་ཅེས་སྨྲས་སོ། །​ལག་འགྲོ་རྣམས་ནི་སྐྱབས་སུ་དོང་། །སྐྱེ་དགུ་ཐམས་ཅད་རྨོངས་གྱུར་ཅིང་། །​འཆི་མེད་ལམ་ལ་གཞོག་བྱེད་པ། །​མི་ཟད་གཡོ་སྒྱུ་ཅན་ལ་ལྟོས། །​དེའི་ཚེ་ན་བདུད་ཀྱི་བུ་མོ་མུན་བྲལ་མ་ཞེས་བྱ་བ་དེས་འདི་སྐད་ཅེས་སྨྲས་སོ། །​སེམས་ཅན་གང་དག་ཐོས་ཙམ་གྱིས། །​དགེ་སྦྱོང་ལ་ནི་སྐྱབས་སུ་མཆིས། །​གང་དག་དེ་ཡི་ཚིག་ཐོས་ཤིང་། །​དེ་མཐོང་བ་ལྟ་སྨོས་ཅི་འཚལ། །​བརྩོན་འགྲུས་སྣ་ཚོགས་སྦྱོར་བ་ཡིས། །​ཁྱོད་ཀྱིས་ཡུན་ནི་རིང་དུ་གཟིགས། །​བཀའ་མཆིད་སྣ་ཚོགས་ལྷན་ཅིག་མཛད། །​དེ་ཡི་སྒྱུ་ནི་མ་བསླབས་སམ། །​བདུད་ཀྱིས་སླར་སྨྲས་པ། །​དགེ་སྦྱོང་གཽ་ཏམ་བརྟན་པ་ཡིན། །​རང་བཞིན་མཁས་པ་ཆེན་པོ་སྟེ། །​སྟོང་པའི་ཆོས་ལ་ཡང་དག་ཞུགས། །​རྒལ་ནས་སྐྱེ་དགུ་སྒྲལ་བར་བྱེད། །​མུན་བྲལ་མས་སྨྲས་པ། སྟོང་པ་ལ་ནི་གང་ཞུགས་པ། །​བདུད་རྣམས་བྱེ་བས་མི་བསྐྱོད་དེ། །​བྱང་གྲོལ་བདེ་བ་སྦྱིན་བགྱིད་པ། །​དེ་ལ་བདག་ནི་སྐྱབས་སུ་མཆི། །​མཚན་ཉིད་མ་མཆིས་ལྡན་པ་ཡི། །​དེ་བཞིན་ཉིད་ལ་གང་རྟེན་ཅིང་། །​ཡེ་ཤེས་ཀྱི་ནི་ཕ་རོལ་ཕྱིན། །​དེ་ལ་བདག་ནི་སྐྱབས་སུ་མཆིས། །​སྒྱུ་དེ་བདག་གིས་བསླབ་པར་བགྱི། །​སེམས་ཅན་ཐམས་ཅད་རྣམ་པར་དགྲོལ། །​ཆོས་རྣམས་ཀུན་ལ་དབང་སྒྱུར་བའི། །​བླ་མེད་སངས་རྒྱས་འགྲུབ་པར་ཤོག །​བདུད་ཀྱི་བུ་མོ་ལྔ་བརྒྱ་སྙེད་བདུད་ཀྱི་གནས་དེར་འཁོད་ནས་བྱང་ཆུབ་ཏུ་སྨོན་ལམ་བཏབ་པར་གྱུར་ཏེ། བདུད་སྡིག་ཅན་ཤས་ཆེར་འཁྲུགས་ཤིང་དངངས་ཏེ་རྨོངས་ནས་སྟོབས་ཀྱི་ཤུགས་ཀྱིས་འཆག་སར་ཞུགས་ཏེ། བདུད་ཀྱི་སྟོབས་ཀྱི་ཤུགས་ཀྱི་ཆོ་འཕྲུལ་གྱིས་བྱིན་གྱིས་བརླབ་པ་དེ་ལྟ་བུ་བྱིན་གྱིས་བརླབས་སོ། །​གང་གིས་དྲང་སྲོང་སྐར་མ་ལ་དགའ་བ་དེ་ནས་སོང་ནས་རིང་པོ་མ་ལོན་པར་དྲང་སྲོང་ཐུབ་པའི་གནས་རྟེན་དེར་བདུད་ཀྱི་གནས་དེ་ནས་ནམ་མཁའ་ལས་རྡོའི་ཆར་པ་མེ་རབ་ཏུ་འབར་བའི་ཆར་མངོན་པར་རབ་ཏུ་དབབ་པར་བརྩམས་ཏེ།