གཞན་ལ་མི་སྨོད་ཅིང་བདག་ལ་མི་བསྟོད་པ། ཕྲག་དོག་དང་སེར་སྣ་རྣམ་པར་སྤངས་པ། སེམས་ཅན་ཐམས་ཅད་ལ་སྙིང་བརྩེ་བ། ཐར་པ་ལ་མངོན་པར་བརྩོན་པ་དག་གནས་ལ། གཎྜཱི་བརྡུངས་ནས་ལོངས་སྤྱོད་པར་བྱེད་ན་དགེ་སློང་གི་དགེ་འདུན་དེ་ལྟ་བུ་ལས་སེམས་ཅན་རྣམས་བསོད་ནམས་ཚད་མེད་པ་དེ་ལྟ་བུ་འཛིན་པ་དག་ཏུ་བྱེད་དོ། །རྒྱལ་པོ་ཆེན་པོ་ཡེ་ཉུང་སྟེ་དགེ་སློང་གི་དགེ་འདུན་ལྔའི་ཚོགས་ཤིག་ཡོད་དུ་ཟིན་ཀྱང་། གལ་ཏེ་ཡང་ཚུལ་ཁྲིམས་ཡོངས་སུ་དག་ཅིང་ངོ་ཚ་ཤེས་པ་དང་། ཁྲེལ་ཡོད་པ་ཕུན་སུམ་ཚོགས་ལ་འཇིག་རྟེན་ཕ་རོལ་གྱི་ཁ་ན་མ་ཐོ་བ་ལ་འཇིགས་པར་ལྟ་ཞིང་སྦྱངས་པའི་ཡོན་ཏན་དང་། འཕགས་པའི་རིགས་ལ་མངོན་པར་བརྩོན་པ་ཡིན་ན། རྒྱལ་པོ་ཆེན་པོ་དེ་ནི་དགེ་སློང་གི་དགེ་འདུན་རྒྱ་མཚོ་དང་འདྲ་བར་གསུངས་ཤིང་། དེ་ནི་མི་དཔག་ཏུ་མེད་པ་དག་ལ་ཕན་པ་བྱེད་པ་དང་། དོན་བྱེད་པ་དང་། སེམས་ཅན་ཐམས་ཅད་ཀྱི་སྡུག་བསྔལ་ཐམས་ཅད་ལས་རབ་ཏུ་རྣམ་པར་ཐར་བར་བྱེད་པ་ཡིན་པར་གསུངས་ན། དགེ་སློང་གི་དགེ་འདུན་བཅུའི་ཚོགས་དང་ཞེས་བྱ་བ་ནས་བརྒྱ་སྟོང་གི་ཚོགས་ཞེས་བྱ་བའི་བར་དག་ལྟ་སྨོས་ཀྱང་ཅི་དགོས། རྒྱལ་པོ་ཆེན་པོ་དགེ་སློང་གི་དགེ་འདུན་གང་ལ་བྲམ་ཟེ་དང་ཁྱིམ་བདག་ཆེན་པོ་དད་པ་ཅན་དག་རིམ་གྲོ་བྱ་བའི་ཕྱིར་གཎྜཱི་རྡུང་བ་དག་ཏུ་བྱེད་ཅིང་། དེར་ཡང་གལ་ཏེ་དགེ་སྦྱོང་ལྟར་བཅོས་པ་སྡིག་པ་སྤྱོད་པའི་དགེ་སློང་ཉུང་ཡང་རུང་། མང་ཡང་རུང་བ་དག་ཀྱང་འདུ་ལ། དེར་གལ་ཏེ་དགེ་སློང་ཆོས་ཀྱིས་གནས་པ། ཚུལ་ཁྲིམས་ཡོངས་སུ་དག་པ། ངོ་ཚ་ཤེས་པ་དང་། ཁྲེལ་ཡོད་པ་ཕུན་སུམ་ཚོགས་པ་དགེ་སློང་ལྔ་ཡང་འདུ་ན། རྒྱལ་པོ་ཆེན་པོ་དགེ་སློང་གི་དགེ་འདུན་དེ་ནི་ཆོས་ཚད་མེད་པ་དང་ལྡན་པ་ཡིན་ཞིང་། སྦྱིན་གནས་ཆེན་པོ་དང་། ལྷ་དང་མི་ཐམས་ཅད་ཀྱིས་མཆོད་པར་འོས་པར་འགྱུར་རོ། །རྒྱལ་པོ་ཆེན་པོ་དེ་ལྟ་བས་ན་དགེ་སློང་ཆོས་ཀྱིས་གནས་པ་དག་དང་། ཆོས་ཀྱི་ཀུན་དགའ་ལ་དགའ་བ་དག་ཁྱེད་ཀྱི་ལག་ཏུ་ངས་ཡོངས་སུ་གཏད་དོ། །ཁྱིམ་ན་གནས་པ་དང་རབ་ཏུ་བྱུང་བ་ལ་ལས་དེ་དག་ལ་རྐྱེན་གང་ཡང་རུང་བ་དག་གིས་གཙེས་སམ། གནོད་པར་བྱས་ན་མི་རུང་གིས། ཁྱེད་ཀྱིས་སྲུངས་ཤིག།