དགོན་པའི་གནས་གཅིག་ཏུ་ཡེ་ཉུང་ན་ཡང་དགེ་སློང་ཆོས་ཀྱིས་གནས་པ་ལྔའི་ལེན་པར་ངས་གནང་སྟེ། གཎྜཱི་བརྡུངས་ནས་ཕྱོགས་བཞིའི་དགེ་སློང་བློ་བུར་དུ་ལྷགས་པ་དག་དང་ལྷན་ཅིག་ཏུ་ལོངས་སྤྱོད་པ་དང་། ཉེ་བར་སྤྱོད་པ་དང་། གནས་ཁང་དང་། མལ་ཆ་དང་། སྟན་དང་། བཟའ་བ་དང་། བཏུང་བ་དང་། ན་བའི་གསོས་སྨན་དང་། ཡོ་བྱད་དག་ལོངས་སྤྱོད་པར་ངས་གནང་ངོ་། །གལ་ཏེ་གཙུག་ལག་ཁང་གཅིག་དང་། དགོན་པའི་གནས་གཅིག་ཏུ་དགེ་སློང་བརྒྱ་སྟོང་གི་བར་གནས་པར་བྱེད་ན། དེར་ཡང་གཎྜཱི་བརྡུངས་ནས་ཕྱོགས་བཞིའི་དགེ་སློང་བློ་བུར་དུ་ལྷགས་པ་དག་དང་ལྷན་ཅིག་ཏུ་སྨན་གྱི་ཡོ་བྱད་ཀྱི་བར་དག་ལ་ལོངས་སྤྱོད་པར་ངས་གནང་ངོ་། །མ་ཆགས་པ་དག་དང་། མ་བཅིངས་པ་དག་དང་། མ་ཆུམས་པ་དག་དང་། ནམ་གྱི་ཆ་སྟོད་དང་། ནམ་གྱི་ཆ་སྨད་དག་ལ་མི་ཉལ་བའི་སྦྱོར་བ་ལ་རྗེས་སུ་བརྩོན་པ་དག་དང་། འཁོར་བ་ལ་རྒྱབ་ཀྱིས་ཕྱོགས་པ་དག་དང་། མྱ་ངན་ལས་འདས་པ་ལ་ནང་དུ་ཕྱོགས་པ་དག་དང་། གཞན་ལ་མི་སྨོད་པ་དག་དང་། བདག་ལ་མི་སྟོད་པ་དག་དང་། ཆོག་ཤེས་པ་དང་། སྦྱངས་པའི་ཡོན་ཏན་སྤྱོད་པ་དང་། རབ་ཏུ་དབེན་པ་དང་། བརྩོན་འགྲུས་བརྩམས་པ་དག་དང་། མཉམ་པར་བཞག་པ་དང་། དྲན་པ་ཉེ་བར་གཞག་པ་དག་གིས་གནས་པ་དག་ལོངས་སྤྱོད་པར་ངས་གནང་ངོ་། །རྒྱལ་པོ་ཆེན་པོ་དགེ་སློང་གི་དགེ་འདུན་གྱི་ནང་ན་སེམས་ཅན་དེ་ལྟ་བུ་དག་གནས་ཏེ། རྒྱལ་པོ་ཆེན་པོ་དགེ་སློང་གི་དགེ་འདུན་གྱི་ནང་ན་སེམས་ཅན་དེ་ལྟ་བུ་དག་ལ་སེམས་ཅན་རྣམས་ཀྱིས་ལོངས་སྤྱོད་དང་། ཉེ་བར་སྤྱོད་པ་ཡོངས་སུ་བཏང་བས་བསོད་ནམས་ཚད་མེད་པ་སྐྱེད་དོ། །རྒྱལ་པོ་ཆེན་པོ་གཙུག་ལག་ཁང་ངམ། དགོན་པའི་གནས་གང་ན་དགེ་སློང་ལྔའམ། ལྷག་པར་གནས་ཀྱང་རུང་སྟེ། ཚུལ་ཁྲིམས་དང་ལྡན་པ་དག་དང་། ཚུལ་ཁྲིམས་ཡོངས་སུ་དག་པ་དང་། ཁ་ན་མ་ཐོ་བ་ཕྲ་མོ་དག་ལ་ཡང་འཇིགས་པར་ལྟ་བ་དག་གནས་པར་བྱེད་ཅིང་། དེ་བཞིན་གཤེགས་པས་གསུངས་པ་སྟོང་པ་ཉིད་དང་ལྡན་པའི་མདོ་སྡེ་དེ་དག་ཀྱང་སྟོན་པར་བྱེད། ཁ་ཏོན་དུ་བྱེད་ལ། གཞན་ལ་མི་སྨོད་ཅིང་བདག་ལ་མི་བསྟོད་པ།