དེ་དག་ཐམས་ཅད་བཅོམ་ལྡན་འདས་ཀྱིས་ཤེས་པ་སོ་སོར་སྦྱངས་སོ། །དེ་བཞིན་གཤེགས་པས་སངས་རྒྱས་ཐམས་ཅད་ཀྱི་ཡུལ་གྱི་རྒྱུ་འཐུན་པའི་ཆོ་འཕྲུལ་གྱི་བྱིན་གྱི་རླབས་ཀྱི་ཏིང་ངེ་འཛིན་གྱི་སྟོབས་རྒྱུན་བཅད་པ་དང་། དེའི་ཚེ་སྔོན་ཇི་ལྟར་བཞུགས་པ་བཞིན་དུ་ཡང་དག་པར་སྣང་སྟེ། དེ་དེ་ལྟར་ཤིན་ཏུ་ལྷམ་མེ། ལྷན་ནེ། ལྷང་ངེར་བཞུགས་སོ། །དེ་དེའི་བར་དུ་ཡང་རང་གི་གཟི་བརྗིད་ཀྱི་འོད་ཟེར་རྣམས་ཀྱིས་སངས་རྒྱས་ཀྱི་ཞིང་ཐམས་ཅད་སྣང་བས་ཁྱབ་པར་མཛད་ནས་བཞུགས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་བརྒྱ་སྟོང་ཕྲག་དུ་མ་དེ་དག་ཐམས་ཅད་ངོ་མཚར་ཐོབ་ཅིང་རྨད་དུ་བྱུང་བ་ཐོབ་སྟེ། བཅོམ་ལྡན་འདས་ལ་མེ་ཏོག་དང་། དྲི་དང་། ཕྱེ་མ་དང་། རིན་པོ་ཆེ་དང་། རས་བཅོས་བུ་དང་། ཆོས་གོས་དང་། ཕྱང་འཕྲུལ་དང་། རྒྱན་སྣ་ཚོགས་དང་། རོལ་མོའི་སྒྲ་སྣ་ཚོགས་ཀྱིས་མཆོད་པ་བྱས་ཏེ། བསྐོར་བ་བྱས་ནས་སྤྱན་སྔར་འཁོད་དོ། །དེ་བཞིན་དུ་བཅོམ་ལྡན་འདས་ཀྱི་ཉན་ཐོས་རྣམས་ཞེས་བྱ་བ་ནས་དེ་བཞིན་དུ་ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། གྲུལ་བུམ་དང་། ཡི་དགས་དང་། ཤ་ཟ་དང་། སྲུལ་པོ་དང་། ལུས་སྲུལ་པོ་དང་། མི་དང་། མི་མ་ཡིན་པ་ཐམས་ཅད་ཀྱི་བར་དེ་དག་ཐམས་ཅད་ཀྱིས་བཅོམ་ལྡན་འདས་ལ་མེ་ཏོག་དང་། དྲི་དང་། ཕྱེ་མ་དང་། རིན་པོ་ཆེ་སྣ་ཚོགས་དང་། རས་བཅོས་བུ་དང་། ཆོས་གོས་དང་། ཕྱང་འཕྲུལ་དང་། རྒྱན་སྣ་ཚོགས་ཞེས་བྱ་བ་ནས་མཆོད་པའི་བར་དུ་བྱས་ཏེ། བསྐོར་བ་བྱས་ནས་ཆོས་ཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འཁོད་དོ། །བདུད་ཤོར་བ་ཚུལ་ཁྲིམས་རྟེན་བདུད་ཀྱི་རིས་བརྒྱད་ཁྲི་དང་དེ་ནས་འཛམ་བུའི་གླིང་འདིར་བབས་ནས། དགེ་སྦྱོང་གཽ་ཏ་མས་སྐུ་ཡངས་པ་ཀུན་ཏུ་བསྟན་པ་ཇི་ལྟར་རྒྱུན་བཅད་པ་མཐོང་སྟེ། དེ་ཡུལ་མ་ག་དྷཱ་ན་བཞུགས་པར་ཀུན་ཏུ་སྣང་ངོ་། །དེ་བདག་ཅག་གིས་སྐྲག་པས་སྒྱུའི་སྟོབས་ལས་མ་ཉམས་སམ་སྙམ་ཞིང་། ད་ལྟ་ན་དེར་འཁོར་དང་བཅས་ཏེ་འདུས་པའི་ནང་དུ་འདུག་ན། དེ་བདག་ཅག་གི་ཕྱིར་འདུག་ནས་སྡིག་པ་མི་བྱེད་དམ་སྙམ་སྟེ། གང་བདག་ཅག་གིས་དེར་དང་པོར་སོང་ནས་འདི་ལ་རྒྱུ་གང་ཡིན་པར་འགྱུར་བ་མཉན་པར་བྱ་གོར་མ་ཆག་སྙམ་མོ།