།འབྱུང་པོ་ཆེན་པོ་ཀླུ་རྣམས་ཐམས་ཅད་གཡོས། །དྲང་སྲོང་གནས་པ་དེར་ནི་འདུས་ནས་སུ། །ཐམས་ཅད་སྟོབས་དང་གཟུགས་དང་དཔལ་ལས་ཉམས། །དགེ་སྦྱོང་མདངས་ཀྱི་སྟོབས་ལ་བལྟ་བར་བྱོས། །དེ་ནས་བདུད་ཤོར་བ་གཞན་ཚུལ་ཁྲིམས་རྟེན་ཞེས་བྱ་བ་དེས་སྨྲས་པ། ཐུགས་མི་དགྱེས་པ་མ་མཛད་བདག་ལ་གསོན། །ཀླུ་རྣམས་བདག་ཉིད་རྩེ་བ་འདི་ལགས་ཏེ། །འདི་ལྟར་ཤཱཀྱའི་བུ་ནི་ཕྱེར་རློག་པའི། །ཚོགས་ཅན་འདུས་པ་ལ་ནི་མངོན་བརྟག་མཛོད། །སྡིག་ཅན་གྱིས་སྨྲས་པ། བློ་མཆོག་དེར་ནི་མྱུར་དུ་འགྲོ་བར་བྱོས། །ཀླུ་ཡི་ཚོགས་ནི་ཐམས་ཅད་སྤྲོ་བར་བྱོས། །ཇི་སྟེ་ཤཱཀ་བུ་ཚོགས་བཅས་གསད་ནུས་ན། །ཀླུ་རྣམས་ཀྱི་ནི་ཡུལ་ཡང་མཆོག་ཏུ་འགྱུར། །དེ་ནས་བདུད་ཤོར་བ་ཚུལ་ཁྲིམས་རྟེན་དེ་བདུད་ཀྱི་གནས་དེ་ནས་སྲོག་ཆགས་བརྒྱད་ཁྲི་དང་ལྷན་ཅིག་ཆས་སོ། །དེ་ནས་དེ་བཞིན་གཤེགས་པ་ཤཱཀྱ་ཐུབ་པ་སྔོན་གྱི་སྨོན་ལམ་མཐར་ཕྱིན་པས་དྲང་སྲོང་ཐུབ་པ་ཐམས་ཅད་དབང་དུ་མཛད། སེམས་ཅན་ཐམས་ཅད་ཡོངས་སུ་སྨིན་པར་མཛད། སངས་རྒྱས་ཀྱི་ཡུལ་ཐམས་ཅད་ཀྱི་ཆོ་འཕྲུལ་གྱི་བྱིན་གྱི་རླབས་ཀྱི་རྒྱུ་འཐུན་པ་བཤད་པ་ཡང་དག་པར་བསྟན། བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་སྐྱོ་བར་མཛད། ལྷ་དང་། ཀླུ་དང་། གནོད་སྦྱིན་ཞེས་བྱ་བ་ནས་མི་དང་། མི་མ་ཡིན་ཐམས་ཅད་རབ་ཏུ་དགའ་བར་མཛད། སངས་རྒྱས་ཀྱི་ཞིང་འདི་ཐམས་ཅད་ཤིན་ཏུ་ཡོངས་སུ་སྤྱད་པ་མཛད། སངས་རྒྱས་ཀྱི་ཞིང་ཡོངས་སུ་དག་པ་ཐམས་ཅད་ཀྱི་ནང་ན་སངས་རྒྱས་ཀྱི་ཞིང་འདི་མཆོག་ཏུ་ཆེས་གཟི་བརྗིད་དང་ལྡན་པ་དང་། ཆེས་སྐལ་བ་དང་ལྡན་པ་དང་། ཆེས་བསོད་ནམས་ཀྱི་ས་བོན་བྱེད་པའི་མདངས་དང་ལྡན་པ་དང་། སངས་རྒྱས་ཀྱི་ཞིང་ཐམས་ཅད་ཀྱི་མཆོད་པར་འོས་པ་མཛད་དེ། དེ་ནས་དེ་བཞིན་གཤེགས་པས་རྫུ་འཕྲུལ་མངོན་པར་འདུ་མཛད་པ་རྒྱུན་བཅད་དོ། །དེ་ལ་སངས་རྒྱས་ཀྱི་ཞིང་འདི་ན་སེམས་ཅན་གང་དག་ཡོད་པ་དེ་དག་ཐམས་ཅད་བཅོམ་ལྡན་འདས་ཀྱི་སྐུ་ལ་ཆུད་པར་གྱུར་ཏེ། དེ་དག་ཐམས་ཅད་བཅོམ་ལྡན་འདས་ཀྱིས་ཤེས་པ་སོ་སོར་སྦྱངས་སོ།