ཀླུ་ཐམས་ཅད་ཀུན་དུ་གཤེ་བར་བྱེད་པའི་བདུད་ཀྱི་སྟོབས་དེ་ལྟ་བུ་ཡང་དག་པར་རྗེས་སུ་དྲན་པར་བྱ་གོར་མ་ཆག་སྙམ་མོ། །དེ་ནས་དེའི་ཚེ་བདུད་སྡིག་ཅན་གྱིས་ཀླུའི་རྟེན་ཐམས་ཅད་དུ་ཤ་སྦྲང་དང་། སྦྲང་བུ་མཆུ་རིངས་དང་། སྦྲང་བུ་གདུག་པ་རྣམས་སྤྲུལ་ཏོ། །ཐམས་ཅད་དྲི་ང་བས་བཀང་ངོ་། །རྡུལ་དབྱུང་བ་དང་མངོན་པར་མི་དགའ་བར་བྱས་སོ། །དེ་བཞིན་དུ་ཀླུ་དང་། ཀླུ་ཆེན་པོ་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་ཐམས་ཅད་མངོན་པར་མི་དགའ་ནས་དེ་དག་ཐམས་ཅད་ཀྱིས་རྣམ་པར་བལྟས་ཏེ། བདག་ཅག་ལ་ཅོ་འདྲི་བར་བྱེད་པ་སུ་ཡིན་སྙམ་ན་དེ་དག་གིས་མ་ཤེས་ཤིང་མ་མཐོང་ངོ་། །གླིང་བཞི་པ་འདིའི་ཀླུ་དང་། ཀླུ་ཆེན་པོ་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་གང་དག་ཡིན་པ་དེ་དག་ཐམས་ཅད་ཀྱང་ཁྲོ་བས་ཟིལ་གྱིས་ནོན་ནས་དེ་དག་ཐམས་ཅད་ཀྱིས་ཀྱང་རང་གི་གནས་བོར། ཀླུའི་རྒྱལ་པོ་དགའ་བོ་དང་ཉེ་དགའ་གཉིས་འཁོར་བརྒྱ་སྟོང་ཕྲག་དུ་མས་ཀྱང་རང་གི་གནས་བོར་ནས་རིའི་རྒྱལ་པོ་རི་རབ་ཀྱི་འདབ་ན་རི་ཁ་ལ་ཏི་ཡ་ཞེས་བྱ་བ་ཡོད་དེ། རི་ཁ་ལ་ཏི་ཡ་དེའི་རྩེ་མོ་ན་དྲང་སྲོང་ཐུབ་པ་རྣམས་ཀྱི་གནས་ཀྱི་རྟེན་ཀུན་རྟེན་ཅེས་བྱ་བ་རྒྱར་དཔག་ཚད་བཞི་ཁྲི་པ་ལྷ་རྫས་ཀྱི་རིན་པོ་ཆེ་སྣ་བདུན་གྱིས་བརྒྱན་པ་བཞི་ཡོད་པ། དྲང་སྲོང་ཐུབ་པའི་གནས་དེར་སྐྱབས་ཀྱི་དོན་དུ་རྟེན་ཅིང་ཞུགས་སོ། །དེར་དེ་དག་ཞུགས་མ་ཐག་ཏུ་འདི་ལྟ་བུའི་ལུས་ཆུང་ངུར་གྱུར་ཏེ། དཔེར་ན་མིག་སྨན་བསྐུ་བའི་ཐུར་མ་བཞིན་ནོ། །དེ་དག་ཀྱང་རང་ཁྲོས་པའི་མཐུས་རེ་རེ་ཡང་འདི་ལྟ་བུའི་ལུས་རི་རབ་ཙམ་དུ་ཡང་དག་པར་ཤེས་ཏེ། དེ་དག་གིས་སྐད་འབྱིན་ཀྱང་མ་ནུས་སོ། །དེ་ནས་འགྲོ་བར་ཡང་མ་ནུས་ཏེ། མྱ་ངན་ཆེན་པོ་དང་ཁྲོས་པས་ཟིལ་གྱིས་ནོན་ནས་དེར་འཁོད་དོ། །དེ་བཞིན་དུ་ཀླུའི་རྒྱལ་པོ་ཆེན་པོ་རྒྱ་མཚོ་འཁོར་བྱེ་བ་བརྒྱ་སྟོང་ཕྲག་དུ་མ་དང་། དེ་བཞིན་དུ་ས་སྲུང་གི་བུ་ཞེས་བྱ་བའི་བར་དང་། དེ་བཞིན་དུ་ཤིན་ཏུ་བརྟན་པ་ཞེས་བྱ་བའི་བར་དང་། དེ་བཞིན་དུ་འཇོག་པོ་ཞེས་བྱ་བའི་བར་དང་། དེ་བཞིན་དུ་མ་དྲོས་པ་ཞེས་བྱ་བའི་བར་དང་། དེ་བཞིན་དུ་བཏང་བཟུང་ཞེས་བྱ་བའི་བར་དང་།