མཛའ་བོའི་གཟུགས་ཀྱིས་དེར་འགྲོ་བར། །འདི་ལྟར་བདག་གིས་དེ་བསམས་ནས། །རང་གི་མགུལ་ན་དྲི་ང་བའི། །རོ་མྱགས་འཇིགས་སུ་རུང་བ་མཐོང་། །ནམ་མཁའི་ཤིང་གིས་སླར་སྨྲས་པ། །བདུད་དང་ཀླུ་དང་བསམ་གཏན་པའི། །ཡུལ་གསུམ་དག་ཏུ་བཤད་པ་ལ། །བདག་ཅག་གི་ནི་ཡུལ་བཅོམ་ཡང་། །ཀླུ་རྣམས་ཀྱི་ནི་ཡུལ་བརྟན་ནོ། །ཀླུ་དེ་དག་ཀྱང་གཟི་བརྗིད་ཆེ། །དམག་རྣམས་མང་ཞིང་སྟོབས་ཀྱང་ཆེ། །དེ་དག་གི་ནི་ཡུལ་མཆིས་པ། །ཀུན་ཏུ་གཞན་གྱིས་མི་ཐུབ་ལགས། །འདོད་པའི་ཁམས་ན་གང་སུ་དག །ཀླུ་ཡི་བདག་པོ་གནས་གྱུར་པ། །དེ་དག་རྣམས་ལ་གཽ་ཏ་མ། །ཐལ་བར་རླག་པར་མྱུར་དུ་བསྒོ། །སྡིག་ཅན་གྱིས་སྨྲས་པ། ཀྱེ་བསོད་ནམས་ཤེས་རབ་ཆེན་པོ་ཅན། །ཀླུ་ཡི་གནས་སུ་ཉིད་སོང་ལ། །གཽ་ཏ་མ་དང་དམག་འགྱེད་པར། །ཐམས་ཅད་ལ་ནི་ཁྱོད་ཀྱིས་བསྒོ། །དེས་སྨྲས་པ། དེ་བཞིན་དུ་བགྱིའོ་ཞེས་ནས་དམག་བརྒྱ་སྟོང་གོ་བགོས་པ་དེ་དག་ལ། ལག་པ་བསྒྲེང་སྟེ་བསྒྲགས་པ་ནི། །ཀླུ་ཡི་རྟེན་དུ་བདག་ཅག་འདེང་། །གཽ་ཏ་མ་དང་དམག་འགྱེད་ཅིང་། །སྲོག་དང་བྲལ་བར་བྱེད་དུ་གཞུག །དེར་ནི་བདག་ཅག་གྲོགས་བྱ་བར། །ཐམས་ཅད་ལ་ནི་བསྒོ་བར་བྱ། །དེ་ན་འཁོད་པ་དེ་དག་ཀྱང་གང་དུ་ཡང་། སུ་ཡང་འགྲོ་བར་མ་ནུས་པ་དང་། ཤོར་བ་ནམ་མཁའི་ཤིང་དེ་གདོང་མཆི་མ་དང་བཅས་ཤིང་སྤུ་ཟིང་ཞེས་བྱེད་པར་གྱུར་ཏེ། ཐལ་མོ་རབ་ཏུ་སྦྱར་བ་བྱས་ནས་སྡིག་ཅན་ལ་སྨྲས་པ། བདག་ཅག་གིས་ནི་གང་དུ་ཡང་། །མཆི་བར་བགྱི་བའི་རྔོ་མ་ཐོགས། །སྒྱུ་འཕྲུལ་བརྟན་པ་གཽ་ཏ་མ། །དྲང་སྲོང་གི་ནི་སྒྱུ་ལགས་སོ། །བདག་ཅག་ཐམས་ཅད་རྐང་པ་བཅིངས། །ལུས་རྣམས་ཀུན་ལ་རྡུལ་ཡང་བྱུང་། །གང་གིས་དགྲ་ལས་ཁྱེད་རྒྱལ་བར། །གཞན་ཞིག་ཀྱང་ནི་མཛད་པར་གསོལ། །བདུད་སྡིག་ཅན་ཇེ་སྡུག་བསྔལ་ཞིང་ཡིད་མི་བདེ་ནས་མྱ་ངན་དུ་གྱུར་པ་དེ་འདི་ལྟ་བུའི་བློ་སྐྱེས་ཏེ། གང་བདག་གིས་ཀླུའི་རྟེན་ཐམས་ཅད་དུ་གང་ཀུན་ཏུ་སྨྲ་བར་བྱེད་པ་དང་། མངོན་པར་མི་དགའ་བ་སྐྱེད་པར་བྱེད་པ་དང་། ཀླུ་ཐམས་ཅད་ཀུན་དུ་གཤེ་བར་བྱེད་པའི་བདུད་ཀྱི་སྟོབས་དེ་ལྟ་བུ་ཡང་དག་པར་རྗེས་སུ་དྲན་པར་བྱ་གོར་མ་ཆག་སྙམ་མོ།