།བུད་མེད་མཚམས་མེད་པ་བྱེད་པའི་ལས་ཀྱི་སྒྲིབ་པ་སྲིད་པའི་རྒྱུ་རྣམས་ཟད་པར་འགྱུར་ཞིང་ལྷག་མ་མེད་པའི་བར་དུ་ཡང་འགྱུར་རོ། །ཟག་པ་ཐམས་ཅད་ཟད་པ་དང་། བྱང་གྲོལ་གྱི་བདེ་བ་དང་ལྡན་པའི་བར་དུ་ཡང་འགྱུར་རོ། །ཡང་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་རབ་ཏུ་བཏུད་ནས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །ཁྱོད་ནི་དེད་དཔོན་གཅིག་པུ་ལགས། །ཆོས་རྣམས་ཀུན་ལ་ངེས་པ་སྟེ། །མཐོང་བའི་གུས་པ་སྐྱེས་པ་ཡིས། །བཤེས་གཉེན་དཔལ་ཡང་ཉེ་བར་འཛིན། །མེ་ཏོག་གཅིག་དང་བདུག་པ་ཡིས། །དེ་བཞིན་གཤེགས་ལ་མཆོད་བགྱིས་ན། །ཡན་ལག་ཀུན་གྱི་མཆོག་ལྡན་པའི། །བཤེས་གཉེན་སྡུག་པ་ཉེ་བར་འཛིན། །ཚོགས་ནི་ཆེན་པོ་བསྡུས་པ་ཡང་། །དུས་གཅིག་ཏུ་ནི་འདིར་མཛད་པས། །ལྷ་རྣམས་ཐམས་ཅད་བསྔགས་བགྱིད་ཅིང་། །བཤེས་གཉེན་དཔལ་ཡང་ཉེ་བར་འཛིན། །དེར་ནི་འཇིག་རྟེན་མགོན་པོ་ཡིས། །འདི་ནི་ལན་ཅིག་ཁོ་ན་བསྟན། །རྟག་ཏུ་ལྷ་མིན་ཤེས་རབ་ལྡན། །བཤེས་གཉེན་དཔལ་ཡང་ཉེ་བར་འཛིན། །དཔལ་གྱི་མེ་ཏོག་སྙིང་པོ་ནི། །དཔལ་རྣམས་ཀུན་གྱིས་ཀུན་ཏུ་བརྒྱན། །དེ་ཡིས་ཤཱཀྱའི་དཔལ་ཞུ་བར། །བདག་ཅག་ཕོ་ཉར་མངགས་པ་ལགས། །བཙུན་པ་བཅོམ་ལྡན་འདས་བྱང་ཕྱོགས་ཀྱི་ཕྱོགས་ཆ་ན་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གང་གཱའི་ཀླུང་བརྒྱད་ཅུའི་བྱེ་མ་སྙེད་འདས་ནས་སྙིགས་མ་ལྔ་དང་ལྡན་པ་དེ་ན་འཇིག་རྟེན་གྱི་ཁམས་སྤོས་ཐམས་ཅད་ཡང་དག་པར་འཕགས་པ་ཞེས་བགྱི་བ་མཆིས་སོ། །སངས་རྒྱས་ཀྱི་ཞིང་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་མེ་ཏོག་གི་སྙིང་པོ་ཞེས་བགྱི་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །དེ་བཞིན་གཤེགས་པ་དེས་བདག་འདིར་མངགས་ལགས་ཏེ། དེ་བཞིན་གཤེགས་པ་དེ་ཁྱོད་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་འབྱང་བའི་གཟུངས་སྔགས་འདི་འཆད་པ་ལ་དད་པ་སྦྱིན་པར་མཛད་ཅིང་གནོད་པ་ཆུང་ངམ། བསྐྱོད་པ་ཡང་ངམ། སྟོབས་དང་ལྡན་ནམ། བདེ་བ་ལ་རིག་པར་གནས་སམ་ཞེས་ཀྱང་ཞུ་བར་མཛད་ལགས་ན་བཙུན་པ་བཅོམ་ལྡན་འདས་ཅི་བསྙུང་བ་མི་མངའ་ལགས་སམ།